LĐ Êyiptơ 23:1-9
“Ơ kon bơngai! Tơdrong mă Kră Yang wă kơ ih pơm ‘lơ̆ng tơpăt, wă kơ đei tơdrong ‘mêm mơnat păng yak năm jơhngơ̆m iơ̆m dim, pơ yom kơ ‘Bok Kei-Dei ưh?” ( Mika 6:8)
Nơ̆r jet tơchĕng pơwao:
– Lu tơdrong juăt lăm Sơ̆p Hla ar ‘Bok Kei-Dei âu đei pơm tơ’bôh tơdrong ‘lơ̆ng hơyơ mă Kră Yang đei pơm?
– Lu tơdrong juăt âu pơtrŭt pơlong tơdrong arih bơ̆n thoi yơ?
Lăm Sơ̆p Hla ar ‘Bok Kei-Dei âu, Kră Yang ‘Bok Kei-Dei tơlĕch nơ̆r krao pơtơm hơđăl nhen păng pran gah tơdrong trŏ tơpăt păng jơhngơ̆m ‘mêm mơnat. ‘Nâu bơih lu tơdrong trŏ pơma lăm tơdrong ‘lơ̆ng tơpăt păng tơdrong ‘mêm mơnat Sư. Tơdrong juăt âu pơm tơ’bôh hơđăl rơđah jơhngơ̆m Kră Yang ‘Bok Kei-Dei ‘lơ̆ng rơgoh, tơpăt hơnơ̆ng păng ‘bĕnh hăm tơdrong ‘mêm mơnat.
Kră Yang tơ’bôh kơ kon pơlei Sư athei tơpăt tơnăp lăm nơ̆r pơma, tơpăt hơnơ̆ng lăm tơdrong tơchĕng păng mơ̆ng kơ wă arih sa hăm bơngai nai, mă loi sư hăm lu bơngai dơnuh păng lu bơngai đe pơjăm pơjuă, pơm kơnê̆ “Ih ‘nĕ kơ grê kiơ̆ lu bơngai tơpôl lơ wă pơm tơdrong kơnê̆ ôh” (trong 2), păng “Lăm tơdrong sek tơlang ‘bơm bơngai dơnuh, ih ‘nĕ kơ ‘bơ̆ đŏng tơdrong tơpăt” (trong 6). ‘Nâu ưh kơsĭ kơ tơdrong juăt lăm kon pơlei đĕch mă ‘noh tơdrong Kră Yang hơgăt lê̆ tơdrong ‘lơ̆ng tơplĕnh pơm tơ’bôh tơdrong ‘lơ̆ng ‘Bok Kei-Dei. Sư jơ̆ ‘Bok Kei-Dei sĭt tơpăt, ưh kơ pơma hơlĕnh, jơ̆ ‘Bok Sek Tơlang ưh kơ pơdê ôh jơ̆ Pơtao pơgơ̆r hăm tơdrong ‘lơ̆ng tơpăt tôm tơdrong.
Lăm lu tơdrong ‘lơ̆ng tơpăt âu,lu bơ̆n ưh kơ’bôh jơhngơ̆m pơm ‘lơ̆ng, ‘mêm mơnat ‘Bok Kei-Dei. Sư tơtăm tơchĕng lu bơngai dơnuh hin, lu bơngai tơmoi, mă loi lu bơngai ayăt. Kon pơlei Kră Yang athei arih pơm ‘lơ̆ng tơpăt hăm rim ‘nu bơngai, mă khan dơnuh dah mơdrŏng, hơgei dah kơtul. Sư bơtho ăn kơ kon pơlei Sư ưh kơsĭ wer kơ pơm tơdrong kơnê̆ kơ lu bơngai ayăt mă lei athei tơgŭm lu sư. ‘Nâu ưh kơsĭ kơ tơdrong jang hmă đĕch mă ‘noh tơdrong jang pơm tơ’bôh pơm ‘lơ̆ng Kră Yang Yang hăm lu bơ̆n mă khan kơplah lu bơ̆n oei ayăt hăm Sư ( Rôm 5:8).
Kră Yang khă ‘nĕ kơ sa pơgơ̆m tơmam đe “Ih ‘nĕ kơ iŏk sa pơgâm mŭk tơmam đe, yua kơ iŏk sa pơgâm pơm bơbôl kơ măt bơngai hlôh wao păng ‘bơ̆ đŏng trong bơngai tơpăt” (trong 8 ). Thoi noh, kiơ̆ tơdr]ong Kră Yang bơtho sơngah kơ tơdrong sa pơgâm mŭk tơmam đe noh oei pơm ‘lơ̆ng tơpăt. Tuch luch, Kră Yang krao pơtơm kon pơlei Sư ‘blŏk dơ̆ng tơdrong ơh sơ’ngon pơmat tat lu sư kư̆m ‘blŏk mơnat kơ bơngai nai (trong 9). ‘Noh bơih jơhngơ̆m pơm ‘lơ̆ng lăm tơdrong đei pơm, jơhngơ̆m ‘mêm mơnat ‘bĕnh blai oei ‘blŏk răk hăm jơhngơ̆m băt bơnê.
Lu tơdrong juăt âu pơtrŭt lu bơ̆n dang ei oei lăm teh đak ‘bĕnh kơ tơdrong hơlĕnh pơdăr, ưh kơ tơpăt păng tơklah dih băl. Lu bơ̆n ‘bônh kơ pơhlŭ pơlung oei hreh kơplah bơngai tơpôl pơm glăi pơdê bơngai mơdrŏng bơngai dơnuh, dah ưh kơ hiơ̆k kơ bơngai đei tơdrong pơmat tat. Mă-lei Kră Yang krao pơtơm lu bơ̆n pơm rai kơjung hloh: Arih kiơ̆ tơdrong ‘lơ̆ng tơpăt Sư hăm tơdrong iung năm yua kơ tơdrong sĭt tơpăt, păng pơm tơ’bôh jơhngơ̆m pơm ‘lơ̆ng đơ̆ng Kră Yang hăm tơdrong athei pơm hloi hăm jơhngơ̆m ‘mêm, mă khan kơplah tơdrong ‘noh hơnat hơnot (Mika 6:8).
Ơ Kră Yang jơ̆ ‘Bok Sek Tơlang ‘lơ̆ng tơpăt păng jơ̆ ‘Bă ‘mêm mơnat, Apinh bơtho inh băt pơma tơpăt, pơm ‘lơ̆ng tơpăt păng ‘mêm mơnat. Apinh ăn kơ inh pơm tơ’bôh jơhngơ̆m ‘lơ̆ng Ih lăm nơ̆r pơma păng lăm tơdrong inh pơm. Krao khan yua anăn Kră Yang Yêsu Krist, Amen.
Lu bơ̆n hăm pơm tơdrong ‘lơ̆ng tơpăt, lăp đon tơdrong pơm ‘lơ̆ng păng yak năm hăm lơ̆m dim ‘bơ̆t anăp Kră Yang tŏk bŏk lăm teh đak âu ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Jang 24
Kênh Youtube BHKTHN:
