Mathiơ 5:17-28
“Thoi noh na iĕm athei ‘mêm kơ đĭ-đăng bơngai kư̆m thoi ‘Bă bơ̆n tơ plĕnh ti ‘mêm kơ đĭ-đăng bơngai thoi noh mơ̆n.” (Mathiơ 5:48)
Nơ̆r jet tơchĕng pơwao:
– Kră Yang bơtho kiơ gah tơdrong wei răk khôi juăt?
– Kră Yang bơtho kiơ gah tơdrong arih tơpăt?
– Lu bơ̆n athei arih tơpăt thoi yơ?
Tơdrong Sơ̆p hla bơar ‘Bok Kei-Dei chih roi ‘nâu pơma kơ tơdrong Kră Yang Yêsu bơtho tơkông. Kră Yang khan tơbăt hơđăl Sư truh wă pơm pơkeh tôm mă ‘blep tơdrong juăt păng Sư wă kơ lu bơngai mă gơh klaih yua kơ pham ‘lơ̆ng tơpăt Kră Yang athei wei răk tơdrong juăt, dah pơma pha ‘biơ̆, athei đei tơdrong arih ‘lơ̆ng rơgoh păng “bơtho đe” (trong 19). Tơdrong arih Kră Yang bơtho đei hơgăt kơjung hloh kơ lu thây bơtho tơdrong juăt păng lu bơngai Pharisi wei răk
Kră Yang pơma hơđăl pêng tơdrong arih ‘lơ̆ng tơpăt. Mă mônh, arih ‘lơ̆ng tơpăt, wă khan wei răk tơdrong juăt. Ưh kơ sĭ tơdrong juăt wei răk tơdrong juăt pơm tơ’bôh gah ‘nguaih đĕch na noh lăm jơhngơ̆m. Mă khan bơ̆n ưh kơ đei pơm tơdrong pơlôch bơngai, pơm pơyô kư̆ kă. Mălei lăm jơhngơ̆m mơn kơ blĕk, pơma tơhil, tơchĕng ưh kơ ‘lơ̆ng kơnê̆ kư̆m tôm mah lăm tơdrong pơlôch bơngai, pơm pơyô kư̆ kă bơih. Tơdrong yoch lĕch đơ̆ng lăm jơhngơ̆m đon tơchĕng: “Thoi noh na dah bu tŭk minh apăk dah minh nơ̆r tơdrong juăt iĕ-ioch păng sư bơtho đe wă kơ đe tŭk mơ̆n, bơngai ‘noh ‘Bok Kei-Dei jô̆ sư bơngai iĕ hloh kơ đĭ-đăng lăm lu bơngai lui. Mă-lei dah bu kiơ̆ trŏ kơ tơdrong juăt păng sư bơtho đe wă kơ đe pơm kiơ̆ mă trŏ mơ̆n, bơngai ‘noh gơh pơm tih lăm lu bơngai lui.” (Mathiơ 5:19). Mă ‘bar, wei răk tơdrong juăt athei năm hơdai hăm tơdrong arih băt ‘mêm: Pơm pơhiôk hơiă adrol kơ krao khan pơyơ̆r tơmam soi (trong 23-26). Mă pêng, tơdrong arih tơpăt kăl kơ đei tôm tơdrong thoi Kră Yang Yêsu bơtho: “Thoi noh na iĕm athei ‘mêm kơ đĭ-đăng bơngai kư̆m thoi ‘Bă bơ̆n tơ plĕnh ti ‘mêm kơ đĭ-đăng bơngai thoi noh mơ̆n.” (Mathiơ 5:48). Arih lui yom kơ Kră Yang thoi kơ năm akŭm, pơyơ̆r hŏk pơhrăm nơ̆r ‘Bok Kei-Dei, krao khan, v.v.v… ưh kơ glăi ôh, mălei Kră Yang tơbăt dôm tơdrong noh ưh tam tôm ôh. Kră Yang khan: ““Ơ lu thây bơtho đe Juđê păng lu bơngai kiơ̆ tơdrong Pharisi, ning-mônh iĕm pơmat-tat dêh, yua kơ iĕm bơngai ‘bơ̆r đak klak ŭnh. Iĕm pơm hăt-hot tĕch lu tơmam hơi thoi lĕ kơ hla lŭnghŭng, hla gơsơ̆m, hla ĕch, hla hlakat, iŏk jên noh pơm pơyơ̆r kơ ‘Bok Kei-Dei minh lăm mơjĭt. Mă-lei dôm tơdrong juăt ‘Bok Kei-Dei mă kăl hloh thoi lĕ kơ pơm ‘lơ̆ng kơ đe, athei ‘mêm kơ ‘Bok Kei-Dei hăm bôl buăl, tơdrong lui kơ ‘Bok Kei-Dei, dôm tơdrong noh iĕm pơhơi ưh kơ wă pơm. Mă tơdrong iĕm pơyơ̆r tơmam hơi noh kư̆m trŏ mơ̆n, mă-lei ưh kơ dang bơ̆n kiơ̆ tơdrong juăt noh hei.” (Mathiơ 23:23). Mă khan bơ̆n pơm kiơ̆ trŏ khôi juăt, mălei oei tam mă arih ‘lơ̆ng tơpăt tơpă hăm bơngai. Tơdrong ưh kơ sĭ khan pơm glăi, na tă kơ pơm ưh kơ tôm. Pơtih gia hơđăl hloh kơ noh lăm tơdrong roi hơ’mon kơ bơngai mơdrŏng pơ̆n khan sư wei răk tôm tơdrong juăt. Mălei Kră Yang oei khan tam mă tôm ‘mơ̆i! Sư ưh kơ đei tôm mah tơdrong ‘mêm mơnat yua kơ lu sư ưh kơ đei ‘mêm kơ bơngai dơnuh (Mathiơ 19:20-21).
Bơ̆n arih tơpăt ưh kơ sĭ khan wă kơ gơh jing kon Kră Yang ‘Bă lu bơ̆n, mălei yua kơ bơ̆n jing kon ‘Bă bơ̆n mă oei tơ plĕnh ti bơih jơ̆ Tơ’ngla ‘lơ̆ng tôm tơdrong. Bơ̆n gơnang kơ Yang Bơhngol ‘Lơ̆ng wă pơm kiơ̆ khôi juăt kiơ̆ thoi nơ̆r Kră Yang Yêsu bơtho. Kră Yang lăng ‘bôh lăm bơ̆n păng tơdrong tơchĕng lăm bơ̆n, thoi noh tơdrong arih tơpăt lăm bơ̆n athei pơtơm đơ̆ng lăm jơhngơ̆m, ‘nĕ kơ wei răk khôi juăt gah ‘nguaih đĕch, păng kăl loi noh tơdrong arih tơpăt athei pơgơ̆p hăm tơdrong ‘mêm. Athei tơ’bôh kơ bơngai nai tơdrong tơpăt păng tơdrong ‘mêm Kră Yang đơ̆ng tơdrong arih bơ̆n pơm ‘lơ̆ng lăm tơdrong arih bơ̆n kơdih, hnam dơnŏ, khul bơngai lui păng lăm teh đak.
Ơ ‘Bă mă ‘lơ̆ng tơpăt, ‘lơ̆ng tôm tơdrong, apinh ‘Bă tơplih tơdrong arih inh, tơgŭm inh arih tơpăt đĭ jơhngơ̆m păng ‘lơ̆ng tôm thoi Kră Yang Yêsu arih păng bơtho wă kơ Anăn Kră Yang gơh ưang đơ̆ng tơdrong arih inh. Krao khan yua anăn Kră Yang Yêsu Krist, Amen.
Pơm thoi yơ bơ̆n wei răk tôm tơdrong Kră Yang bơtho, lăm đon tơchĕng, lăm jơhngơ̆m?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 119:121-176
Kênh Youtube BHKTHN:
