Jôsuê 2:12-24
“Thoi noh lu iĕm gô lê̆ mĕ ‘bă, ‘nhŏng oh, mai oh đĭ-đăng kon mon lu sư oei arih, pơklaih lu sư đơ̆ng tơdrong lôch.” (Jôsuê 2:13)
Nơ̆r jet tơchĕng pơwao:
– Yă Rahap apinh lu bơngai chop lăng athei pơkă tơdrong kiơ?
– Tơdrong ‘nâu tơ’bôh jơhngơ̆m sư hăm bơngai lăm hnam dơnŏ thoi yơ?
– Bơ̆n pơm kiơ wă tơgŭm kơ lu bơngai lăm hnam dơnŏ bơ̆n gơh đei tơdrong dŏng pơklaih?
Kơplah ‘bôh bre ‘bar ‘nu bơngai chop lăng Isơrael năm tơ Jêrikô lei na yă Rahap lui ngeh dêh ‘nâu đei bơngai Isơrael tơgar iŏk. Sư lui ngeh Kră Yang bơgai Isơrael jơ̆ Kră Yang ‘Bok Kei-Dei kơ đĭ đăng teh đak (Jôsuê 2:11). Gô tơblah dŏng lu sư yua kơ Kră Yang ăn kơ lu sư dêh char ‘nâu. ‘Bok Kei-Dei đei pơm kơ đak dơsĭ ‘brê hrĕng kro ăn kơ Isơrael tŏk hlôi, păng tơgŭm lu sư pơlôch ‘bar ‘nu pơtao Amôrit kư̆m gô tơgŭm kơ lu sư pơrăm dêh char Jêrikô. Yă Rahap lui ngeh minh trong wă huay kơ đei pơlôch noh chơ chă tơdrong mơnat đơ̆ng Kră Yang ‘Bok Kei-Dei păng ‘nâu bơih tơ’bôh đơ̆ng đon lui. Đon lui tơpă ưh kơ sĭ dơ̆ng ‘bơ̆t lui ngeh kơ Kră Yang mơsêh đĕch ôh na kư̆m oei adrin chơ chă dơ̆ng tơdrong ôn kơ ‘nơp lăm Kră Yang. Yă Rahap ưh kơ sĭ hli tơrơ tơtơ̆ ‘bơ̆t dôm tơdrong mơsêh Kră Yang đĕch ôh (Jôsuê 2:9-11), na sư kư̆m lui ngeh Kră Yang jơ̆ ‘Bok Kei-Dei ‘bĕnh tơdrong tơgŭm, ‘mêm mơnat kơ lu bơngai mă kơdâu tơkan tơ Sư.
Yă Rahap apinh lu bơngai chop lăng athei yua anăn Kră Yang ‘Bok Kei-Dei na pơkă gô dŏng “Thoi noh lu iĕm gô lê̆ mĕ ‘bă, ‘nhŏng oh, mai oh đĭ-đăng kon mon lu sư oei arih, pơklaih lu sư đơ̆ng tơdrong lôch.” (trong 13). Kơplah krao khan thoi noh, sư lui ngeh Kră Yang gô bơwei sư dah lu bơngai chop lăng ưh kơ wei răk nơ̆r pơkă. Lu bơngai chop lăng gô tơgŭm sư “gô pơm ‘lơ̆ng kơ ih păng pơm trŏ thoi nhôn pơkă” kơplah năr mă Kră Yang ăn dêh char âu kơ lu sư dah sư ưh kơ roi tơdrong jang lu sư kơ đe. ‘Nguaih kơ noh, athei yă Rahap chô̆ brai thêt ‘bơ̆t ‘măng ‘mŏk păng athei akŭm pơpôi đi lu ‘nhŏng oh hnam dơnŏ ih tơ lăm hnam ih lei lu sư gơh bơwei. Sư pơkă gô pơm kiơ̆ thoi noh. Đơ̆ng noh, sư iŏk minh dăng tơlei giĕn tơ jur bre ‘bar ‘nu âu trong ‘măng ‘mŏk yua kơ hnam sư jê̆ dur pơlei. Sư athei bre ‘bar ‘nu noh tŏk tơkông oei to noh lăm pêng năr na đơ̆ng noh wih brŏk.
Yă Rahap đei tơ’bôh đon lui tơpă kơplah sư tơgŭm lu bơngai năm chop lăng păng kơplah sư lui gơnang kơ Kră Yang bơih Tơ’ngla gô bơwei sư hăm hnam dơnŏ sư lăm kơplah năr kon pơlei Isơrael blah dêh char Jêrikô ‘bơ̆t tơdrong lôch răm wă truh kơ dêh char Jêrikô, Rahap ưh kơ đei tơchĕng kơ sư đĕch ôh na kư̆m tơchĕng kơ lu ‘nhŏng oh hnam dơnŏ sư hai mơ̆n. Sư krao apinh wă kơ lu sư gơh arih, pơkă gô bơwei lu sư lăm hnam đei pơm tơdra hăm chô̆ brai thêt ‘bơ̆t ‘măng ‘mŏk hnam sư.
Jing lu bơngai mă đei iŏk tơdrong gơh tơgŭm, tơdrong mơnat đơ̆ng Kră Yang, bơ̆n kư̆m athei tơchĕng kơ tơdrong lôch răm ling lang gô truh kơ lu ‘nhŏng oh hnam dơnŏ bơ̆n dah lu sư ưh kơ lui kơ Kră Yang. Bơ̆n athei krao khan păng adrin đĭ jơhngơ̆m tơgŭm lu sư gơh dŏng pơklaih hăm trong ba lu sư năm tơ ‘Bok Krist păng kơ’nơp lăm Sư. ‘Noh kư̆m tơ’bôh đơ̆ng đon lui tơpă.
Ơ Kră Yang, apinh Ih mơnat kơ inh, păng hnam dơnŏ inh. Apinh Ih tơgŭm inh ưh kơ sĭ tơchĕng inh kơdih đĕch mălei đĭ jơhngơ̆m ba Tơdrong ‘Nao ‘Lơ̆ng Ih kơ lu ‘nhŏng oh hnam dơnŏ inh hai mơ̆n. Krao khan yua anăn Kră Yang Yêsu Krist, Amen.
Bơ̆n hiơ̆k tơgŭm krao khan păng tơgŭm kơ lu ‘nhŏng oh hnam dơnŏ bơ̆n băt kơ Kră Yang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Galati 4
Kênh Youtube BHKTHN:
