Rôm 3:21-26
“Na ‘Bok Kei-Dei jô̆ lu sư jing bơngai ‘lơ̆ng rơgoh, Sư huay pă jô̆ yo bơih” ( Rôm 3:25b)
Nơ̆r jet tơchĕng pơwao:
– ‘Bok Pôl pơma tơdrong kiơ gah tơdrong ‘lơ̆ng tơpăt Kră Yang ‘Bok Kei-Dei?
– Yua đơ̆ng yơ kon bơngai gơh jô̆ ‘lơ̆ng tơpăt?
– Tơdrong Kră Yang Yêsu dŏng pơklaih tơ kơpal ‘long pơglang wă bơtho tơdrong kiơ kơ đĭ-đăng kon bơngai păng ăn kơ lu bơ̆n?
Lăm chăl Sơ̆p Hla bơar ‘Bok Kei-Dei âu tơ’bôh tơdrong kăl yua tôch đon kon bơngai pơm yoch păng tơdrong dŏng pơklaih ư-ang đơ̆ng Kră Yang ‘Bok Kei-Dei đơ̆ng ]long pơglang Kră Yang Yêsu. Tơ kông Gôl gô tha âu bơih, tơdrong ‘lơ̆ng tơpăt păng tơdrong ‘mêm mơnat đei tơ’bưh băl tôm tơdrong.
Pơma gah tơdrong ‘lơ̆ng tơpăt Kră Yang ‘Bok Kei-Dei păng khôi juăt, ‘Bok Pôl tơbăt khôi juăt wă tơ’bôh tơdrong ‘lơ̆ng tơpăt Kră yang mă-lei ưh kơ gơh dŏng pơklaih kon bơngai đơ̆ng tơdrong yoch. Sư pơma tơpăt lăp minh tơdrong lui kơ Kră Yang Yêsu ‘Bok Dŏng Pơklaih đĕch gơh klaih, na kon bơngai gơh jô̆ ‘lơ̆ng tơpăt (trong 21-22) “ Đĭ-đăng kon bơngai weh ataih đơ̆ng ‘Bok Kei-Dei kiơ̆ tơdrong yoch ngăl”
(trong 23). Tơdrong hơgăt lê̆ lăm tơdrong arih ‘lơ̆ng rơgoh Kră Yang wă tơ’bôh kơ lu bơ̆n bơngai yoch păng ưh kơ gơh dŏng pơklaih kơdih kâu, kon bơngai ưh kơ layơ arih ‘lơ̆ng tơpăt thoi Kră Yang ‘Bok Kei-Dei. Mă-lei yua kơ tơdrong ‘mêm păng tơdrong mơnat , Kră Yang pơm tơ’bôh tơdrong mơnat ăn đĕch mă hlĭch dêh hăm tơdrong ăn tơdrong dŏng pơklaih lăm Kră Yang yêsu (trong 24). Tơdrong ‘lơ̆ng tơpăt ưh kơsĭ đơ̆ng bơ̆n adrin kơdih dah yua đŏng pơm kiơ̆ khôi juăt ôh, mă-lei noh đơ̆ng tơdrong mơnat ăn đĕch đơ̆ng Kră Yang Yêsu ăn kơ kon bơngai. Lu bơ̆n gơh jô̆ ‘lơ̆ng tơpăt yua đơ̆ng mơnat ăn đĕch păng yua đei đon lui gơnang tơdrong dŏng pơklaih đơ̆ng Kră Yang Yêsu (Êphêsô 2:8). Gơh jô̆‘lơ̆ng tơpăt wă khan đơ̆ng Kră Yang ‘Bok Kei-Dei roi tơbăt khan bơ̆n ‘lơ̆ng tơpăt bơih, tơdrong yoch lu bơ̆n ôp rơgoh, ‘mong tôm đêl hre, păng tơdrong arih gơh rơgoh tơpă. ‘Nâu ‘noh tôm tơdrong đơ̆ng Kră Yang ‘Bok Kei-Dei ngăl (Rôm 6:23).
‘Long pơglang jơ̆ anih ‘lơ̆ng rơgoh Kră Yang ‘’Bok Kei-Dei tơblah hăm tơdrong yoch kon bơngai, noh kư̆m anih tơdrong ‘mêm Kră Yang ‘Bok Kei-Dei trong ăn kơ kon bơngai gơh klaih “ na ăn Kon Pôm Sư Yêsu lôch tang kon bơngai tơ ‘long pơglang wă huai lu bơngai yoch, wă kơ lu bơngai yoch noh lui kơ Kon Sư”(trong 25). Tơdah Kră Yang achăng lê̆ tơdrong yoch, lei Sư tơhiong lê̆ tơdrong ‘lơ̆ng tơpăt mơ̆n. Tơdah Sư sek tơlang lu bơ̆n ưh kơ mơnat, lu bơ̆n gô hiong răm. Mă-lei lăm tơdrong Kră Yang Yêsu lôch tang, Sư oei ‘lơ̆ng tơpăt kơplah tơdrong mơnat Sư oei mơnat kơ lu bơngai yoch.
Kơpal ‘long pơglang, tơdrong tơpăt Kră Yang pơm keh bơih păng jơhngơ̆m mơnat Sư mă đei tuh ăn tơdrong hil mĭl kơ Kră Yang Yêsu mă ayăt hăm tơdrong yoch, kơplah tơdrong mơnat ăn tuh ăn kơ dôm lu bơngai lui kơ Yêsu. Thoi noh, ‘long pơglang ưh kơ sĭ wă dŏng pơklaih bơ̆n đĕchmă noh wă tơ’bôh tơdrong arih ‘lơ̆ng Kră Yang ‘Bok Kei-Dei, Sư kư̆m ‘lơ̆ng tơpăt kư̆m ‘mêm mơnat; Sư kư̆m ‘lơ̆ng rơgoh Sư kư̆m pơm ‘lơ̆ng kơ đe. Apinh Kră Yang ăn kơ lu bơ̆n bơwei tơdrong arih ‘lơ̆ng rơgoh, ‘mêm mơnat păng đĭ jơhngơ̆m pơm tơ’bôh tơdrong ‘mêm Kră Yang kơ bơngai nai dơ̆ng.
Ơ Kră Yang, inh bơnê kơ Ih yua kơ inh jơ̆ minh ‘nu bơngai yoch trŏ kơ lôch hiong, mă-lei yua đơ̆ng Kră Yang Yêsu lôch tang na inh gơh jô̆ jing ‘lơ̆ng tơpăt. Apinh tơgŭm inh arih hăm tơdrong mơnat ân đĕch đơ̆ng Kră Yang đei ‘măn ăn kơ inh. Yua anăn Kră Yang Yêsu Krist, Amen.
Lu bơ̆n hăm tơpă mơn đei tơdrong ‘mêm păng ‘lơ̆ng tơpăt Kră Yang ‘măn ăn kơ bơ̆n kơdih?
Đŏk Sơ̆p Hla bơar ‘Bok Kei-Dei lăm pêng sơnăm: Đaniel 11.
Kênh Youtube BHKTHN:
