Klei Aê Diê Blŭ: Rôm 3:21-26
Êlan kliăng: “Klei anăn čiăng bi êdah klei kpă ênô Aê Diê, kyuadah hŏng klei gĭr Ñu lui amâo bi kmhal ôh klei soh arăng ngă êlâo tinăn.” (Rôm 3:25b)
Klei êmuh ksiêm mĭn: Si klei khua ƀĭng kna mblang kơ klei kpă ênô Aê Diê? Hŏng ya klei anak mnuih dưi yap jing kpă ênô? Ya klei yuôm kơ phung mnuih leh anăn kơ drei pô kyua mơ̆ng klei Khua Yang Yêsu bi tui ti kyâo bi kal?
Trăn Klei Aê Diê Blŭ anei brei ƀuh klei phung mnuih soh čiăng amâo lŏ mâo klei čang hmăng ôh, leh anăn klei bi tui guh kơang hriê mơ̆ng Aê Diê găn hŏng kyâo bi kal Khua Yang Yêsu. Ti Gôlgôtha yơh, klei kpă ênô leh anăn klei khăp bi tuôm mbĭt kluôm ênŭm.
Mblang kơ klei kpă ênô Aê Diê leh anăn kơ klei bhiăn, khua ƀĭng kna Y-Pôl brei thâo, klei bhiăn bi êdah klei kpă ênô Khua Yang ƀiădah amâo dưi bi mtlaih phung mnuih soh ôh. Ñu bi klă, knŏng hŏng klei đăo kơ Khua Yang Yêsu Pô Bi Mtlaih kơh anak mnuih dưi mâo klei yap kpă (êlan 21-22), “Kyuadah jih jang mnuih soh leh sơăi leh anăn amâo tơl mâo klei guh kơang Aê Diê ôh,” (êlan 23). Hnơ̆ng čuăn doh jăk Khua Yang brei ƀuh drei ngă soh leh, leh anăn amâo dưi bi mtlaih drei pô ôh, anak mnuih amâo tuôm dưi truh tơl kơ hnơ̆ng čuăn klei kpă ênô Aê Diê ôh. Ƀiădah kyua klei khăp leh anăn klei pap, Ñu bi êdah klei pap yuôm bhăn hŏng hdră mkra kơ anak mnuih găn hŏng Khua Yang Yêsu (êlan 24). Klei kpă ênô amâo kbiă hriê mơ̆ng klei gĭr drei pô ôh amâodah bruă ngă tui si klei bhiăn ôh, ƀiădah jing mnơ̆ng brei klei pap găn hŏng Khua Yang Yêsu. Drei dưi mâo klei yap kpă kyua hŏng klei pap leh anăn klei đăo kơ bruă bi tui ngă leh hlăm Khua Yang Yêsu (Êphêsô 2:8). Mâo klei yap kpă, mblang jing Aê Diê hưn mâo klei kpă ênô leh: klei soh drei dưi lăm jih leh, nư drei tla brei leh, leh anăn klei hdĭp jing doh leh. Klei anei kluôm dhuôm jing klei brei mơ̆ng Aê Diê pô (Rôm 6:23).
Kyâo bi kal jing anôk klei doh jăk Aê Diê tlă anăp hŏng klei soh phung mnuih, ƀiădah ăt jing anôk klei khăp Aê Diê ba hriê êlan klei bi mtlaih. “Aê Diê čuăn leh Yêsu Krist brei Ñu jing mnơ̆ng bi tui klei soh hŏng êrah Ñu, čiăng kơ arăng mă tŭ hŏng klei đăo.” (êlan 25). Tơdah Aê Diê lui klei soh, Ñu srăng bi luč hĕ klei kpă ênô. Tơdah Ñu phat kđi drei amâo mâo hŏng klei pap, drei srăng rai luč jih. Ƀiădah hlăm klei săn asei mlei Khua Yang Yêsu, Ñu ăt kluôm dhuôm kpă ênô tơdah brei klei pap kơ phung mnuih soh.
Ti dlông kyâo bi kal, klei kpă ênô Khua Yang dưi wĭt lač leh, leh anăn klei khăp Ñu tuh brei leh. Klei ngêñ Ñu tuh leh ti dlông Khua Yang Yêsu bi kdơ̆ng hŏng klei soh, êjai anăn klei pap Ñu tuh brei ti dlông hlei pô đăo. Snăn, kyâo bi kal amâo knŏng jing mnơ̆ng yua bi mtlaih drei, ƀiădah wăt jing anôk bi êdah knuih Aê Diê kdlưn dlông hĭn: Ñu kpă ênô wăt bŏ hŏng klei khăp; Ñu jing doh jăk wăt bŏ hŏng klei pap. Akâo Khua Yang brei drei djă pioh knhuah hdĭp doh jăk, thâo khăp leh anăn jih ai tiê kah mbha klei khăp Khua Yang kơ mnuih mkăn.
Si ngă drei thâo kral sĭt mơ̆ klei khăp leh anăn klei kpă ênô Khua Yang pioh brei kơ drei?
Wah lač: Ơ Khua Yang, bi mni lač jăk Khua Yang kyuadah kâo knŏng jing sa čô mnuih soh năng djiê, ƀiădah kyua hŏng klei săn asei mlei Khua Yang Yêsu kâo dưi yap kpă. Akâo Khua Yang đru kâo dôk hdĭp năng hŏng klei pap Khua Yang pioh brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniel 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
