Klei Aê Diê Blŭ: Y‑Yêrêmi 39:1-8
Êlan kliăng: “Mtao Ƀaƀilôn bi mdjiê phung anak êkei Y‑Sêdêkia ti ƀuôn Riblah ti anăp ală Y‑Sêdêkia; leh anăn mtao Ƀaƀilôn bi mdjiê jih jang phung khua Yuđa. Ñu ƀlêč ală Y‑Sêdêkia leh anăn kă gơ̆ hŏng klei săng đai čiăng đoh ba gơ̆ kơ čar Ƀaƀilôn” (Y‑Yêrêmi 39:6-7)
Klei êmuh ksiêm mĭn: Si boh klei mtao, phung khua, phung ƀuôn sang leh anăn mnư̆ ƀuôn prŏng leh ƀuôn Yêrusalem dlưh rai? Si ngă Mtao Y‑Nebukatnetsar phat kđi Y‑Sêdêkia? Si drei ba yua mmông găl Aê Diê brei čiăng gưt asăp Ñu?
Êpul lĭng kahan Ƀaƀilôn ksŭng ngă leh anăn kwang dar ƀuôn prŏng Yêrusalem sui hlăm wang sa thŭn mkrah, knhal tuč “bi mčah mnư̆”. Jih jang phung khua êmua gưl dlông mơ̆ng Ƀaƀilôn “hriê dôk gŭ hlăm ƀăng jang ti krah” (êlan 3) bi êdah phung ƀuôn sang Yuđa klă sĭt luč klei dưi leh anăn klei dưi kiă kriê lĕ hlăm kngan Mtao Nebukatnetsar. Mtao Sêđêkia ƀuh boh klei ênguôt hnĭng anăn êran đuĕ êjai mlam hlue êlan hjăn jing “…ktuê êlan war djam mtao găn ƀăng jang plah wah dua bĭt mnư̆; leh anăn diñu nao phă Arabah” (êlan 4). Ƀiădah amâo lŏ hmao ôh kyua kahan Kaldê hmao tiŏ leh anăn mă ñu, ba ñu kơ Mtao Nebukatnetsar phat kđi ti ƀuôn Riblah, hlăm lăn Hamas. Tinei, rup knhal tuč ală Mtao Sêđêkia dôk buh jing klei bŏ hŏng ênguôt hnĭng hlăk êjai arăng mdjiê phung anak êkei mtao leh anăn phung khua êmua hlăm djuê ana Yuđa ti anăp ñu. Leh anăn Mtao Nebukatnetsar lač “ƀlêč ală Y‑Sêdêkia leh anăn kă gơ̆ hŏng klei săng đai čiăng đoh ba gơ̆ kơ čar Ƀaƀilôn.” Phung Kaldê čuh sang mtao leh anăn sang phung ƀuôn sang, bi klưh hĕ mnư̆ ƀuôn (êlan 7-8).
Klei Aê Diê ư̆ ăn amâo djŏ ôh phưi tha kơ klei soh, sĭt klei ư̆ ăn êgao hnơ̆ng snăn klei bi kmhal jing klă sĭt. Ară anei klei guh kơang Yêrusalem amâo lŏ dôk ôh, ƀuôn jao hlăm kngan phung ti êngao, mtao amâo lŏ mâo klei găl dưi tlaih ôh. Năng hơưi snăk kơ Mtao Sêđêkia. Tơdah mtao hmư̆ asăp Khua pô hưn êlâo Y‑Yêrêmi snăn klei djiê êka amâo srăng mâo ôh (Y‑Yêrêmi 38:20). Hlăk ală mtao dôk thâo ƀuh snăn mtao amâo thâo leh anăn gưt Klei Aê Diê Blŭ ôh. Ară anei amâo lŏ mâo klei găl ôh, mtao tŭ klei bi kmhal msĕ si Yêhôwa lač leh. Ti anăp Mtao Sêđêkia ară anei knŏng jing klei mmăt tĭt leh anăn mtao amâo lŏ mâo klei găl lŏ mkra klei soh ôh.
Grăp čô drei ăt mâo Aê Diê brei ală čiăng ƀuh djăp mta mnơ̆ng leh anăn boh nik čiăng ƀuh klei myang Ñu. Tơdah ală hlăm kđeh ăt ƀuh ƀiădah ală mngăt mmăt amâo thâo ƀuh Aê Diê leh anăn amâo gưt asăp Ñu, snăn klă sĭt truh wưng Ñu kčah, drei ăt srăng amâo lŏ mâo klei găl ôh. Klei Aê Diê Blŭ lač: “Hlei pô đăo kơ Anak mâo leh klei hdĭp hlŏng lar; hlei pô amâo gưt kơ Anak amâo srăng ƀuh ôh klei hdĭp, ƀiădah klei Aê Diê ngêñ dôk leh ti ñu” (Y‑Yôhan 3:36). Hruê mlam Yang Mngăt Jăk ƀuah ai tiê anak mnuih. Kyua klei pap, Ñu gĭr dôk guôn grăp čô kmhal klei soh (II Y‑Pêtrôs 3:9). Ƀiădah sĭt truh hruê Ñu hruê, tơdah amâo kmhal snăn knŏng lĕ hlăm klei mmăt tĭt mơ̆ng klei bi kmhal đuč. Akâo kơ Aê Diê brei kơ brei thâo yua mmông găl Aê Diê brei čiăng gưt asăp Aê Diê.
Drei khăng bi kdung tui hlue asăp Khua Yang mơ̆?
Wah lač: Ơ Aê Diê! Pô ăt dôk nanao klei pap, klei gĭr hŏng kâo. Akâo kơ Ih brei kơ kâo klei thâo mĭn, klei mngač čiăng thâo kral ênoh yuôm hruê mmông leh anăn klei yăl Ih brei čiăng kâo amâo kdung hlue gưt asăp Ih.
Dlăng Klei Aê Diê Blŭ hlăm tlâo thŭn: Y‑Yêrêmi 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
