Nêhêmi 4:1-9
“Mă-lei lu nhôn krao khan apinh Kră Yang ‘Bok Kei-Dei lu nhôn păng rơih chă bơngai kral gak kơ măng kơ’năr wă găn lu sư.” (Nêhêmi 4:9)
Nơ̆r jet tơchĕng pơwao:
– Kon pơlei Juđê oei tơ’bơ̆p tơdrong juăt ayơ?
– ‘Bok Nêhêmi jơhngơ̆m sư thoi yơ?
– Lu bơ̆n pơhrăm iŏk tơdrong kiơ đơ̆ng kơmĭl ‘bok Nêhêmi adrin krao khan?
‘Bok Sanbalat jơ̆ ‘bok sek tơlang pơm tih tơ dêh Samari, lăm noh đei pơlei Jêrusalem na ‘bok Sanbalat ‘blĕk dêh, sư yua nơ̆r pơjăm pơjuă wă pơgăn. dang ei, mưh ‘bôh tơdrong jang wă pơtơm, na sư rai blĕk păng hiĕk achơ̆ lu bơngai Juđê. Jê̆ sư đei Tôbiya, bơngai Amnôn, bre sư chă trong wă pơrăm lu bơngai Juđê hăm nơ̆r pơjăm păng hil chrih nơ̆r tơdrăp dêh.
‘Bơ̆t anăp đe pơjăm pơjuă păng đe ayăt ‘bok Nêhêmi ưh kơ pơjah, ưh kơ tơblang. Hăm tơdrong ưh kơ pơm plơ̆, ‘bok Nêhêmi ưh kơ yua đơ̆ng nơ̆r pơma dah pơm tơ’bôh đơ̆ng bơngai nai sư hlôh tơpă, pơjăng hăm bơngai mă juăt kơ chrih hil kơ đe noh dang pơgăn lê̆ tơdrong jang đĕch. Tơplih kơ noh, sư krao khan kơ Kră Yang đĕch, hăm ‘bok Nêhêmi, krao khan noh bơih tu tơm blŭng a ưh kơ trŏ khan trong tuch luch ôh. ‘Bok Nêhêmi tơl tơwih tơdrong đe ayăt kơ sư hăm tơdrong krao khan tơpăt tơpă, sư apinh Kră Yang tơblah hăm bơngai ayăt tơplih kơ kon pơlei sư, păng sư tơl tơwih bơngai ayăt hăm tơdrong sư adrin lăm tơdrong jang ưh kơ đei dơ̆ng pơhiơ̆ dah achăng tŭk ôh. Sư băt Kră Yang krao sư athei sư jang, thoi noh sư ưh kơ wă bu dah tơdrong kiơ pơgăn sư lăm tơdrong jang Kră Yang wă kơ sư pơjing keh. Mưh krao khan bơih ‘bok Nêhêmi pơjao kơ rim bơngai rim tơdrong jang kiơ̆ kơ lu sư gơh jah. Sư nŏng kơ pơlung păng pơgơ̆r kon pơlei man hơmet ming dur pơlei dơ̆ng, lu kon pơlei adrin ‘maih jang (trong 6). Kơplah ‘bôh rai tŏk ‘net ‘net, lu sư ‘blĕk păng hil dêh, lu sư chă đon wă tơblah păng pơrŭng lu nhôn hơwơ̆l hơwang. Pă minh wơ̆t dơ̆ng, ‘bok Nêhêmi păng kon pơlei sư adrin hăm tơdrong krao khan păng rơih chă lu bơngai kral gak kơmăng kơ’năr wă pơgăn lu sư (trong 7-9).
‘Bok Nêhêmi đei pơm kơmĭl ăn kơ lu bơ̆n gơh tơdrong ‘măn jơ krao khan adrol hloh, adrin lăm tơdrong krao khan, păng đĭ jơhngơ̆m lui gơnang kơ Kră Yang mă tơ’bơ̆p tơdrong đe pơm kơnê̆ păng trong ‘lơ̆ng hloh wă tơ’bôh tơdrong bơ̆n gơnang kơ Kră Yang noh tơdrong krao khan. Bơngai lui dang ei, kơplah đĭ jơhngơ̆m arih kiơ̆ Kră Yang krao kư̆m ưh kơ gơh weh wer đơ̆ng tơdrong đe pơm kơnê̆, ayăt đơ̆ng gah lăm păng gah ‘nguaih. Kơmĭl ‘bok Nêhêmi tơbăt dah lu bơ̆n kư̆ kơ lui gơnang păng adrin krao khan Kră Yang tơplih kơ pơm plơ̆. Kră Yang gô ăn tơdrong gơh hơgei wă bơ̆jang păng pơtrơp jang keh tơdrong Kră Yang pơjao.
Ơ Kră Yang, apinh Ih tơgŭm inh đĭ jơhngơ̆m krao khan, ‘măn adrol hloh, adrin krao khan kơplah tơ’bơ̆p tơdrong đe ayăt. Apinh Ih ăn kơ inh gơh hơgei, jơhngơ̆m nuih păng gơnang kơ Ih tơpă wă kơnhăm kơdâu pơjei wă kơ keh tơdrong jang Ih pơjao. Krao khan yua anăn Kră Yang Yêsu Krist, Amen.
Lu bơ̆n hăm đei ‘măn jơ adrol hloh păng adrin krao khan kơplah tơ’bơ̆p đe ayăt ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 40
Kênh Youtube BHKTHN:
