Malakaus 13:32-37
Nqe cim
“Yog li ntawd, nej yuav tsum zov zoo zoo rau qhov nej tsis paub hais tias thaum twg nej tus Tswv yuav rov los. Tej zaum nws yuav los thaum tsaus ntuj lossis thaum ib taghmo lossis thaum qaib yuav qua lossis thaum kaj ntug.” (Malakaus 13:35).
Lus nug rau sawvdaws xav:
– Qhov tseemceeb hnub Tswv Yexus rov qab los yog dabtsi?
– Tus Tswv qhia kom cheemtsum muaj tus cwjpwm zoo li cas thaum paub hnub tus Tswv los sai sai?
– Peb cheemtsum muaj tus cwjpwm twg rau tes haujlwm uas tus Tswv muab rau peb ua?
Thaum qhia cov thwjtim ntsig txog ceevfaj zov tos, Tswv Yexus tham zaj lus pivtxwv uas hais txog ib tug txivneej yuav mus rau lwm qhov deb, nws cob haujlwm rau cov tubtxib ua thiab hais kom tus uas zov qhovrooj yuav tsum zov tos nws los, “nws yuav los thaum tsaus ntuj, thaum ib taghmo, thaum qaib yuav qua lossis thaum kaj ntug” (nqe 35b), thaum tsaus ntuj yog ncaj rau lub sijhawm 9 teev tsaus ntuj, ib taghmo yog lub sijhawm 12 teev, qaib qua yog lub sijhawm 3 teev yav sawv ntxov, thiab kaj ntug yog lub sijhawm 6 teev, nov yog cov sijhawm uas cov tubtxib nkees, yoojyim tsaug zog heev, thiab yog lub sijhawm tus tswv yuav los lawm.
Dhau zaj lus pivtxwv no, Tswv Yexus qhia paub tsis muaj leejtwg paub hnub uas Nws yuav los tsuas yog Leej Txiv paub xwb (nqe 32), yog li peb yog tus Tswv cov tubtxib, yam uas peb cheemtsum ua tsis yog nrhiav saib hnub twg tus Tswv los, tiamsis yog yuav tsum “ceevfaj, zov tos” (nqe 33) hnub uas ntsib tus Tswv thiab ua tiav feem xyuam Nws muab. Zov tos ua rau peb paub ua yam uas muaj qab hau hauv kev ua neej, rau siab ntso ua tiav tes haujlwm tus Tswv kom ua, siv zog qhia Txojmoo Zoo. Cheemtsum ua tib zoo saib, qhov uas zov tos no tsis ntsig txog txojkev cawm dim, vim peb tau cawm dim tsuas yog ntseeg Tswv Yexus xwb. Hais kom yog dua, zov tos pab tau peb npaj txhij rau hnub uas tus Tswv rov qab los, hnov Nws lub suab qhuas thiab txais tej nqi zog uas Nws muab (I Kauleethaus 3:12-15).
Timthawj Petus twb qhia kom zov tos thiab ua feem xyuam ntawm peb li cas hauv I Petus 4:7-11, yog peb cheemtsum “cia li feeb meej thiab tswj lub siab kom thiaj zoo thov Vajtswv” (nqe 7 Phau Txhais Tshiab). Peb cheemtsum feeb meej vim ze lub sijhawm kawg peb tus yeebncuab yuav npau siav tawmtsam peb ntau yam (I Petus 4:1-6), tshwjxeeb yog cov xibhwb cuav tuaj nkag rau hauv Pawg Ntseeg. Peb cheemtsum tswj lub siab, txhais tau hais tias tswj tus kheej, txuag zoo kom tsis txhob muaj ib yam dabtsi phem los tsuas raug yus sab ntsujplig. Peb cheemtsum thov Vajtswv vim tsis muaj leejtwg xwbtim pab tau nws tus kheej li, tsuas yog vamkhom tus Tswv pab xwb. Thiab qhov tseemceeb yog peb yuav tsum ua tiav tes haujlwm uas tus Tswv hu peb los ua, tej ntawd yog sib hlub, siv tej koob hmoov uas tus Tswv pub los ua haujlwm, thiab khiav ncaj nraim mus rau lub homphiaj uas yog ua kom Vajtswv tau ntsejmuag (I Petus 4:8-11).
Thaum peb zov tos thiab ua tiav feem xyuam tus Tswv kom ua, peb yuav tau tus Tswv siv koomtes nrog Pawg Ntseeg ua tes haujlwm cob qhia cov tubtxib uas ncaj ncees kom muaj cov ua tus Tswv haujlwm muaj lub siab zov tos zoo ib yam li peb.
Thov Vajtswv,
Tus Tswv, thov Koj pub kom nyuam yaus paub ua neej zov tos hnub uas Koj rov qab los ntawm lub siab kub lug, ua tiav feem xyuam uas Koj muab, dhau qhov ntawd thov Koj siv Koj Txojlus cob qhia cov tubtxib uas muaj lub siab ncaj ncees rau Koj lub Tebchaws. Nyuam yaus tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb cob qhia cov neeg tom qab kom muaj lub siab zov tos zoo li cas?
Nyeem Vajluskub hauv peb lub xyoo: I Petus 3:8-4:11
Kênh Youtube BHKTHN:
