Mathais14:22-27
Nqe cim zaj kawm:
“Tamsim ntawd Yexus hais rau lawv hais tias, “Nej tsis txhob poob siab! Yog kuv ntag, tsis txhob ntshai!” (Mathais 14:27).
Lus nug rau sawvdaws xav:
– Yog ua cas Tswv Yexus tsis koom nrog Nws cov thwjtim mus rau sab ntug hiavtxwv tim ub?
– Thaum uas pom Nws cov thwjtim raug cua nplawm, Tswv Yexus ua li cas?
– Zaj no txhawb peb zog li cas hauv lub neej muaj tej cua daj cua dub tuaj raug?
Tom qab uas Tswv Yexus muab mov rau tsib txhiab leej noj tas lawm, Tswv Yexus kom Nws cov thwjtim caij nkoj mus ua ntej rau sab ntug hiavtxwv tim ub, tshuav Tswv Yexus nyob tomqab thaum Nws kom sawvdaws rov mus tsev lawd. Timthawj Mathais tsis qhia paub yog vim li cas, tiamsis timthawj Yauhas qhia paub hais tias, vim tej neeg sawvdaws xav tsa Tswv Yexus ua vajntxwv, tiamsis Tswv Yexus tsis pub lawv ua qhov ntawd (Yauhas 6:14-15). Thaum uas tej neeg sawvdaws mus tsev tas lawm “…nws tib leeg nce mus thov Vajtswv pem roob. Thaum tsaus ntuj lawm nws tseem nyob nws pem roob” (nqe 23). Txawm yog ua haujlwm ib hnub sab kawg nkaus los Tswv Yexus tseem tseg muaj lub sijhawm ntsiag to los sib txuas lus nrog Leej Txiv, qhov ntawd ua rau Tswv Yexus muaj zog ua Nws tes haujlwm pab cawm tibneeg. Thov Vajtswv pab kom peb ua zoo li Tswv Yexus, txhua hnub muaj kev thov Vajtswv tsis tseg tsis tu, peb sab ntsujplig thiaj yuav muaj zog.
Thaum uas cov thwjtim mus txog ib nrab hiavtxwv Kalilais lawd, “Cua ntsawj tom hauv ntej tuaj ua rau dej ntas tej niag twv tuaj ntaus lub nkoj”. Malakaus sau hais tias, Tswv “Yexus pom nws cov thwjtim nquam nkoj nyuaj kawg li” vim cua ntsawj tom hauv ntej tuaj (Malakaus 6:48). Txawm Tswv Yexus tseem cia sijhawm sib txuas nrog Leej Txiv thiab cheemtsum muaj sijhawm so tom qab ib hnub ua haujlwm sab heev los Tswv Yexus tsis tso Nws cov thwjtim tseg. Tswv Yexus yeej saib ntsoov Nws cov thwjtim thiab “pom” lawv txhua sijhawm. Nws pom lawv ntsib kev nyuaj, kev ntshai, Nws thiaj los pab lawv ua rau lawv xav tsis thoob li. Sijhawm plaub teev yuav kaj ntug, Tswv Yexus los kotaw saum nplaim dej los cuag cov thwjtim. Thaum ntuj teb tsaus nti, lawv tabtom ntsib cua daj cua dub thiab tseem pom ib tus tibneeg mus kotaw saum nplaim dej, mas haj yam ua rau lawv ntshai kawg li, lawv xav hais tias ntshai yog lawv pom “dab”. Tswv Yexus paub txog lawv txoj kev qaug zog, Nws thiaj txhawb lawv zog hais tias; “Nej tsis txhob poob siab! Yog kuv ntag, tsis txhob ntshai!” (nqe 27b). Tswv Yexus tej lus hais ua rau lawv kev txhawj ntshai ploj mus tas thiab pab tau lawv feebmeej hais tias, tus ntawd yog Tswv Yexus ntag, tus uas ib txwm nrog lawv nyob thiab pub lawv muaj kev tso siab thaum ntsib tej cua daj cua dub.
Niaj hnub nimno ua ib tug ntseeg kuj yuav ntsib ntau yam cua daj cua dub tuaj ntsawj puag ncig peb lub neej, xws li kev mob kev nkeeg, kev tshaib nqhis, kev tsov rog… Peb tig saib ib ncig tsis muaj leejtwg yuav pab peb yam Tswv Yexus cov thwjtim hnub thaud. Yog li ntawd, zaj kawm hnub no qhia rau peb hais tias, Tswv Yexus yeej saib ntsoov peb, Nws “pom” peb txhua sijhawm ntawm peb tej kev mob kev nkees, kev txomnyem thiab thaum ntsib kev tws Nws yuav los pab cawm peb. Zaj no txhawb peb zog, rau qhov Tswv Yexus yuav hais rau peb hais tias: “Nej tsis txhob poob siab! Yog kuv ntag, tsis txhob ntshai!”
Thov Vajtswv
Tswv Yexus, nyuam yaus ua Koj tsaug uas Koj yeej pom thiab paub nyuam yaus lub neej, Koj yuav los pab cawm nyuam yaus thaum ntsib tej kev txomnyem, nyuaj siab. Thov pab nyuam yaus cia li tso siab plhuav ua Koj tes haujlwm, txawm lub sijhawm yuav zoo li cas los nyuam yaus tsis ntshai. Nyuam yaus tuav Tswv Yexus Khetos lub npe thov, Amees.
Peb puas hnov Vajtswv lub suab txhawb zog thaum uas peb ntsib tej kev txhawj ntshai?
Nyeem Vajluskub hauv peb xyoos: 2 Kauleethaus 12:11-13:13
Kênh Youtube BHKTHN:
