Klei Aê Diê Blŭ: Y‑Mathiơ 14:22-27
Êlan kliăng: “Ƀiădah Yêsu blŭ kơ digơ̆ mtam, lač, “Dôk êđăp ênang bĕ! Kâo gơ̆ yơh, đăm huĭ ôh!”(Y‑Mathiơ 14:27)
Klei êmuh ksiêm mĭn: Ya ngă Khua Yang Yêsu amâo nao mbĭt hŏng phung ƀĭng kna găn hang nah dih? Tơdah ƀuh phung ƀĭng kna tuôm hŏng dleh dlan kyua angĭn tlă phă digơ̆, ya klei Khua Yang ngă leh? Ya klei đru drei dưi mđĭ ai ti anăp klei rŭng răng hlăm klei hdĭp?
Leh mbliư̆ kpŭng kơ êbeh êma êbâo čô ƀơ̆ng, Khua Yang Yêsu mtrŭt phung ƀĭng kna trŭn hlăm mran găn êa ksĭ nao ti hang dih êlâo, bi Ñu dôk čiăng brei phung lu đuĕ wĭt. Khua ƀĭng kna Y‑Mathiơ amâo lač ôh mta phŭn ƀiădah Khua ƀĭng kna Y‑Yôhan brei thâo kyua êpul lu čiăng mpŭ kơ Khua Yang jing mtao, leh anăn Ñu amâo brei ôh diñu dưi ngă klei anei (Y‑Yôhan 6:14-15). Leh phung ƀuôn sang wĭt leh, Khua Yang Yêsu “…Ñu đĭ čư̆ hjăn Ñu, čiăng wah lač. Tơl adiê mmăt leh, Ñu dôk hjăn Ñu tinăn” (êlan 23). Wăt tơdah mâo sa hruê lu bruă leh anăn êgah êmăn ƀiădah Khua Yang ăt mđing uêñ pioh mnĭt mmông kriêp ñăt čiăng blŭ hrăm hŏng Aê Diê Ama, kyua mơ̆ng anăn Ñu dưi thiăm ai ktang čiăng lŏ ngă bruă hlăm klei bi mtlaih anak mnuih. Akâo kơ Khua Yang đru drei msĕ si Ñu grăp hruê, djă pioh klei bhiăn kjăp hlăm klei wah lač čiăng kơ klei hdĭp mngăt hriê kơ prŏng.
Tơdah phung ƀĭng kna nao leh ti krah êa ksĭ Galilê, diñu tuôm hŏng dleh dlan “êa poh yă tlă čhŏng, kyuadah angĭn thut phă digơ̆.” Klei Mrâo Mrang Jăk Y‑Markôs brei thâo “Yêsu ƀuh phung ƀĭng kna wah čhŏng hŏng klei rŭng răng, kyuadah angĭn tlă phă digơ̆…” (Y‑Markôs 6:48). Wăt tơdah Khua Yang Yêsu čiăng kơ mmông bi blŭ hrăm hŏng Aê Diê Ama, wăt tơdah Ñu čiăng mdei leh sa hruê mă bruă suăi êmăn ƀiădah Ñu amâo dưi lui ôh phung ƀĭng kna. Khua Yang ktuê dlăng digơ̆ leh anăn Ñu “ƀuh” nanao digơ̆. Ñu ƀuh klei dleh dlan, klei huĭ hyưt phung ƀĭng kna dôk tuôm, Ñu nao hŏng digơ̆ hlue si klei digơ̆ amâo bi mĭn ôh. Hlăm brô 3-6 mmông aguah, Khua Yang Yêsu êbat ti dlông êlah êa nao kơ phung ƀĭng kna. Hlăm mlam mmăt tơdah diñu dôk mdrơ̆ng hŏng angĭn êbŭ ktang phĭt leh anăn ƀuh sa čô mnuih êbat ti dlông êlah êa anăn digơ̆ huĭ snăk leh anăn mĭndah anăn jing “ksơ̆k”, Khua Yang Yêsu thâo klei phung ƀĭng kna rŭng răng kyua anăn bi juh digơ̆: “Dôk êđăp ênang bĕ! Kâo gơ̆ yơh, đăm huĭ ôh!” (êlan 27b). Klei Khua Yang Yêsu blŭ suôt jih klei rŭng răng, huĭ hyưt hlăm phung ƀĭng kna leh anăn đru digơ̆ mdih thâo kral Khua Yang, Pô kiă kriê nanao leh anăn brei klei êđăp ênang kơ diñu wăt tơdah nah êngao angĭn êbŭ thut ktang, êa poh yă tlă čhŏng.
Phung đăo hruê anei ăt dôk tuôm hŏng lu angĭn êbŭ, klei rŭng răng kwang dar msĕ si yan adiê ngă, klei ruă tưp, klei blah ngă, luč bruă mă… Năng ai drei dlăng jŭm dar amâo ƀuh ôh hlei pô dưi đru pô msĕ si phung ƀĭng kna ti krah êa ksĭ hlăk đưm. Klei hriăm hruê anei mñă kơ drei Khua Yang Yêsu ăt dôk “ƀuh” leh anăn “ƀuh” nanao klei ruă ai tiê, dleh dlan, luč čang hmang hlăm phung ƀuôn sang Ñu leh anăn Ñu srăng hriê čiăng bi mtlaih drei. Drei mâo klei mđĭ ai lu snăk tơdah Khua Yang lač hŏng drei: “Dôk êđăp ênang bĕ! Kâo gơ̆ yơh, đăm huĭ ôh!”
Diih dôk hmư̆ mơ̆ asăp êdu êun Khua Yang hlăk êjai rŭng răng hlăm klei hdĭp anei?
Wah lač: Ơ Khua Yang Yêsu, kâo bi mni kơ Ih kyua Ih ƀuh nanao leh anăn thâo kral kơ ya klei dleh dlan, luč čang hmăng hlăm kâo, Ih srăng hriê leh anăn hmao đru kâo. Akâo kơ Ih đru kâo dôk hơĭt ai tiê mă bruă kơ Ih wăt tơdah ya klei srăng tuôm. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 12:11-13:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
