I Thexalaunikes 1:1
1Kuv yog Paulus. Kuv thiab Xilas, thiab Timautes sau tsab ntawv no xa tuaj rau nej txhua tus uas nyob hauv lub nroog Thexalaunikes uas ntseeg Vajtswv tus uas yog peb Leej Txiv thiab ntseeg tus Tswv Yexus Khetos. Thov Vajtswv foom koob hmoov rau nej, thiab pab kom nej tau nyob kaj siab lug.
Lus nug rau sawvdaws xav:
– Peb tug neeg uas hais npe tawm hauv nqe Vajluskub no ntsig txog Pawg Ntseeg Thexalaunikes li cas?
– Timthawj Paulus xav hais yam dabtsi thaum nws sau ob zaug lo lus “hauv” (raws li phau txhais tshiab)
– Peb txojkev txuas rau Vajtswv thiab Tswv Yexus Khetos zoo li cas?
Thexalaunikes yog ib lub nroog loj thiab yog tuamceeb rau lub xeev Makedaunias uas yog cov nomtswv Loos kav. Nroog Thexalaunikes nyob ncaj txojkev cov neeg Loos tuaj mus rau sab hnubtuaj. Txojkev no muaj ob lub tshav nkoj, muaj neeg coob heev ua rau lub nroog Thexalaunikes dhau los ua lub nroog tseemceeb rau kev ua lag luam loj thiab npluanuj heev rau lub tebchaws Loos. Nyob hauv lub nroog loj li ntawd, cov ntseeg Tswv Yexus nyob Thexalaunikes tabtom ntsib tej kev txomnyem, raug tsimtxom thiab tej kev ua neej yoojyim ntxias ua rau lawv poob kev ntseeg.
Muaj peb tug neeg tau hais npe nyob hauv tsab ntawv no yog Timthawj Paulus, tus uas sau tsab ntawv, thiab ob tug tabtom nrog nws nyob yog Xilas thiab Timautes. Nkawd yog cov uas nrog Timthawj Paulus coj Txojmoo Zoo mus qhia rau lub nroog Thexalaunikes thiab tsa Pawg Ntseeg no. Vim yog cov neeg Thexalaunikes muaj qee leej nug txog kev ntseeg tiamsis thawj zaug uas lawv mus saib cov ntseeg luv heev, Timthawj Paulus tsis muaj sijhawm teb rau cov ntseeg, yog li nws thiaj sau tsab no teb lawv tej lus nug thiab kuj yog qhuas lawv lub siab uas ncaj ncees rau tus Tswv Yexus.
Peb ua tib zoo saib thaum hais txog Pawg Ntseeg Thexalaunikes, Timthawj Paulus hais txog ob zaug lo lus “hauv” (raws li phau txhais tshiab). “nyob hauv Leej Txiv Vajtswv thiab hauv tus Tswv Yexus Khetos.” Timthawj Paulus hais tias Vajtswv cov menyuam hauv Pawg Ntseeg Thexalaunikes tsis yog txuas rau nws lossis ib tug neeg twg, tiamsis cov ntseeg hauv yuav tsum paub tseeb hais tias lawv muaj txojkev sib raug zoo nrog Vajtswv thiab Tswv Yexus yog tus uas tsa Pawg Ntseeg. Qhov no yog lub keebtiv, yog qhov kev sib txuas ntawm cov ntseeg thiab Pawg Ntseeg, Pawg Ntseeg thiab Vajtswv. Thiab tsuas yog hauv Vajtswv thiab hauv Tswv Yexus, cov ntseeg thiaj tau txais “koob hmoov thiab kev kaj siab” xwb.
“Nyob hauv” Vajtswv thiab Tswv Yexus Khetos kuj yog qhov uas peb txhua tus nimno tau txais hauv tus Tswv txoj koob hmoov hlub, qhia tawm txojkev sib raug zoo muaj sia nrog Vajtswv Vaj Peb Leeg thiab yog qhov uas peb txhua tus tau txais kev kaj siab puv npo ntawm txoj koob hmoov hlub thiab kev kaj siab uas tus Tswv pub kom xwv lub neej tawg paj txi txiv rau Nws.
Thov Vajtswv,
Vajtswv tus muaj kev hlub! Nyuam yaus ua Koj tsaug vim tau nyob hauv Koj txoj koob hmoov hlub thiab kev kaj siab. Thov Koj pab kom nyuam yaus saib qhov no muaj nqis thiab tuav rawv qhov no, rau qhov dhau ntawm Koj tsis muaj leejtwg ua tau ib yam dabtsi li. Amees.
Peb puas tau txais txojkev kaj siab puv npo thaum nyob hauv tus Tswv lawm tau?
Nyeem Vajluskub hauv peb lub xyoo: Loos 14:1-15:13
Kênh Youtube BHKTHN:
