Pajlug 20:16
Nqe cim:
“Yog tus neeg ruam mus coglus them lwm tus tej nujnqis, yuav tau kom nws muab nws tej qhov txhia chaw mus yuam nqi ua ntej” (Pajlug 20:16).
Lus nug rau sawdaws xav:
– Vim li cas Vajtswv cov menyuam yuav tsum xyuam xim thaum coglus them lwm tus tej nujnqis?
– Coglus nrog lwm tus them nuj nqis muaj lub ntsiab li cas?
– Yuav ua cas kom peb qhia tau tshwm Vajtswv kev hlub los ntawm lub tswvyim ntse, ncaj ncees thiab dawbhuv?
Vajtswv Txojlus qhia, Vajtswv cov menyuam yuav tsum xyuam xim rau tes haujlwm uas coglus them lwm tus tej nujnqis. Pab tej kwvtij zej zos them lawv tej nujnqis yog qhov uas nyuaj heev, tej zaus yus yuav rov ua tus tshuav nqis lossis yuav raug tus uas yus pab them nujnqis hais phem rau yus los muaj (Pajlug 6:1-5) tsis tau hais txog cov uas tsis swm, tsis paub. Coglus pab them lwm tus tej nujnqis ces yog tus ua tiv tav rau lwm tus qiv txais thiab yog tus tshuav luag nujnqis lawm. Thaum tus uas mus qiv txais them tsis tau ces tus tswv qiv txais yuav tuaj taij nqi ntawm tus coglus tiv tav qiv txais thiab kom nws them nqi. Muab qhov txhia chaw mus yuam nqi, yog muab tej cuabtam coj mus ua chaw tiv tav.
Raws li Vajluskub nqe 16 hais txog coglus them lwm tus tej nuj nqis kuj xav hais txog sawv cev mus nrog tus neeg yus tsis paub siab qiv txais, ces yus yuav tau nrog them nws tej nuj nqis ntawd (Pajlug 27:13). Kev coglus pab lwm tus them nujnqis, yog tsis xyuam xim ces yuav coglus txhaum rau tus neeg uas tsis tsimnyog pab. Thaum ntawd yuav ua rau peb tshuav nqi, peb yuav pluag, yuav txaj muag thiab muaj txim nrog lwm tus.
Vajtswv yog tus muaj kev hlub thiab Nws yeej hlub tshua txog txhua tus uas pluag txomnyem. Vajtswv Txojlus qhia hais tias, cov uas yog Vajtswv meyuam yuav tsum qhia tshwm Vajtswv kev hlub dhau los ntawm tes haujlwm: “Yog leejtwg muab nws lub tsho ntev tuaj yuam nqi rau koj thiab nws coglus yuav txhiv rov qab, thaum tsaus ntuj koj yuav tsum xa rov rau nws, rau qhov nws muaj tib lub tsho ntawd hnav kom sov xwb. Nws yuav ua li cas pw tsaug zog? Thaum nws quaj thov kuv, kuv yuav teb nws tej lus thov, rau qhov kuv yog tus uas muaj lub siab hlub tshua” (Khiavdim 22:26-27). Peb yuav tsum qhia tshwm Vajtswv kev hlub los ntawm txoj kev txawjntse, kev ncaj ncees thiab dawbhuv. Tsis vim tej phoojywg lo lus mos lus muag lossis pojniam, txivneej tej lus dag ntxias yuav ua rau peb siv tej nyiaj uas Vajtswv pub ua yam tsis muaj nqis (Pajlus 19:27). Peb txhua tus yuav tsum muab siab rau kawm Vajtswv Txojlus kom muaj Vajtswv txoj kev txawjntse, kom tau Vaj Ntsujplig coj qhia thiab qhuab ntuas thiaj pab tau peb khiavdim txoj kev dag ntxias lub vojhlua. Thov Vajtswv pab kom peb ua tib zoo xyuam xim rau hauv txoj ua kev neej qhia tshwm Vajtswv kev hlub thiab Nws kev dawbhuv.
Thov Vajtswv
Fwm Vajtswv tus uas dawbhuv thiab hlub tshua. Thov pab nyuam yaus muaj Koj txoj kev txawjntse, xyuam xim rau kev xav, tes haujlwm kom nyuam yaus ua tau lub neej rau Vajtswv Koj tau Koobmeej. Amees.
Peb yuav ua cas rau kev qiv txais thiab cog lus them lwm tus nuj nqis?
Nyeem Vajluskub hauv peb lub xyoos: Tes Haujlwm5:17-6:7
Kênh Youtube BHKTHN:
