Klei Aê Diê Blŭ: Hêbrơ 9:15-22
Êlan kliăng: “Kyuanăn Krist jing Pô ti krah kơ klei bi mguôp mrâo, čiăng kơ phung mâo leh klei iêô dưi mă tŭ ngăn dưn hlŏng lar Aê Diê ƀuăn leh, kyuadah Ñu djiê leh čiăng bi tui phung mnuih mơ̆ng klei soh diñu ngă leh ti gŭ klei bi mguôp tal êlâo” (Hêbrơ 9:15)
Klei êmuh ksiêm mĭn: Ya ngă klei djiê mñă lu blư̆ msĕ snăn lĕ? Si klei mdê klei Khua Yang Yêsu djiê hŏng klei djiê mnơ̆ng ngă yang hdĭp mkăn? Ya klei yuôm bhăn čiăng phung đăo kơ Khua Yang thâo kral?
Klei Aê Diê Blŭ brei thâo klei Khua Yang Yêsu djiê jing klei mphŭn kčưm kơ lu mta klei (êlan 15) amâo djŏ “djiê jih yơh” ôh. Tơdah Khua Yang amâo djiê ôh snăn drei amâo mâo ôh klei hdĭp mrâo; amâo mâo djiê snăn drei amâo dưi bi doh ôh ai tiê kpă drei mơ̆ng klei ƀuah; amâo mâo djiê snăn drei amâo dưi dưn ôh ngăn dưn hlŏng lar.
Pô čih hră mơĭt kơ phung Hêbrơ hưn bi sĭt kơ klei anei jưh ti klei hlăp boh blŭ. Hlăm klei Grek, boh blŭ mblang jing “klei bi mguôp” lŏ mblang jing “hră mtă mtăn” mơh. Boh nik gơ̆ klei čih hră mtă mtăn jing bruă ngă lar snăk. Klei čih hlăm hră mtă mtăn jing yuôm tơdah pô ngă hră mtă mtăn anăn djiê leh (êlan 16-17). Msĕ snăn mơh, čiăng kơ jih jang klei bi kuôl kă hlăm klei bi mguôp jing yuôm sĭt, bi mâo hĕ klei djiê, leh anăn hlăm klei djiê anei jing klei djiê mnơ̆ng ngă yang hdĭp bi êdah hŏng êrah kyuadah “tơdah amâo mâo ôh êrah tuh, amâo mâo klei pap brei kơ klei soh ôh” (êlan 22b). Msĕ hŏng klei anăn mơh, klei bi mguôp mrâo jing yuôm kyua klei Khua Yang Yêsu djiê.
Ƀiădah ya ngă čiăng mâo hĕ klei djiê msĕ snăn lĕ? Kyuadah klei djiê bi êdah sa klei sĭt nik yuôm bhăn snăk anăn jing, Aê Diê doh jăk snăk, Ñu amâo dlăng kơ klei soh jing hơăi mang ôh. Klei soh srăng tla hŏng sa ênoh yuôm snăk, anăn jing klei djiê. Hlăm klei bi mguôp hđăp, čiăng sa čô mnuih ngă soh ăt dôk hdĭp snăn mnơ̆ng ngă yang srăng djiê. Kyuadah anak mnuih ăt ngă soh nanao kyuanăn srăng mâo lu mnơ̆ng ngă yang hdĭp srăng djiê leh anăn klei bi mdjiê mnơ̆ng ngă yang hdĭp anei amâo lŏ thâo tuč ruê̆ ôh. Kyua klei khăp prŏng Khua Yang Yêsu, Anak Aê Diê hriê jing mnuih leh ti lăn ala, hdĭp klei hdĭp amâo mâo klei soh ôh, tŭ klei djiê ti kyâo bi kal jing mnơ̆ng ngă yang hdĭp klă ênŭm myơr sa blư̆ man djăp kơ jih jang, pŏk brei sa êlan mrâo čiăng kơ anak mnuih dưi mă tŭ klei pap brei kluôm ênŭm.
Hruê anei, drei mơak snăk tơdah sa čô mnuih soh thâo kmhal kơ klei soh, đăo kơ Khua Yang Yêsu, mă tŭ klei bi mtlaih. Drei bi mni kơ Khua Yang Yêsu kyua jih jang klei Ñu ngă leh kơ drei. Ƀiădah klei drei kkuh mpŭ leh anăn klei drei hdơr knga amâo dưi jing klă ênŭm ôh tơdah drei amâo thâo săng klă ôh si ngă Khua Yang Yêsu bi tui klei soh drei. Mnuih tui hlue Khua Yang amâo djŏ tui hlue klei đăo amâodah tui hlue sa mta klei đăo ôh ƀiădah jing sa čô mnuih thâo kral sĭt knŏng klei Khua Yang Yêsu djiê yơh jing êlan dưi bi doh klei soh ñu. Êrah yuôm Pô jing Aê Diê leh anăn jing Anak Mnuih, knŏng Ñu yơh amâo mâo klei soh ôh tuh leh. Khua Yang Yêsu tŭ klei djiê čiăng bi doh klei soh drei.
Drei thâo săng klă leh mơ̆ si êlan Khua Yang Yêsu bi tui klei soh drei?
Wah lač: Bi mni kơ Ih, Ơ Khua Yang Yêsu kyuadah Ih tŭ leh klei bi kmhal hrô kơ klei soh kâo. Ih tŭ leh klei djiê bŏ hŏng klei ruă knap ti dlông kyâo bi kal čiăng pap brei klei soh kâo. Kâo thâo săng kơ klei pap klei soh jing yuôm bhăn êdimima. Jih klei hdĭp kâo srăng hưn klei Ih djiê tơl Ih lŏ trŭn hriê.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 1:1-2:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
