Klei Aê Diê Blŭ: II Klei Yăl Dliê 20:33-37
Êlan kliăng: “Sa čô amâo dưi ôh jing hlŭn kơ dua čô khua; kyuadah ñu srăng bi êmut kơ sa čô anei leh anăn khăp kơ sa čô mkăn. Amâodah ñu srăng mpŭ kơ pô anei leh anăn bi êmut kơ pô mkăn. Diih amâo dưi ôh mă bruă kơ Aê Diê wăt kơ klei jing mdrŏng” (Y‑Mathiơ 6:24)
Klei êmuh ksiêm mĭn: Ya dua klei soh Mtao Y‑Jôsaphat arăng čih hmăi amâo jăk kơ phung anak čô leh anăn phung ƀuôn sang? Si boh jhat? Si klei bi hmô jhat anei bi mdih phung drei hlăm klei hdĭp tui hlue Khua Yang?
Mtao Y‑Jôsaphat mâo klei hƀuê ênuk čih pioh klei ksiêm dlăng jăk ba klei hmăi jăk kơ lu mnuih, khădah snăn, klei hƀuê ênuk ăt lŏ čih mơh kơ bruă mtao ngă amâo jăk . Hlăm ênuk ñu kiă kriê, mtao bi rai dŭm anôk ti dlông leh anăn rup yang Asêre kbiă mơ̆ng Yuđa (II Klei Yăl Dliê 17:6; 19:3) ƀiădah mtao amâo lăm lui jih hnơ̆ng ôh ngă kơ mnuih ƀuôn sang ăt ka jih ai tiê tui duah Aê Diê mơ̆ng aduôn aê pô (êlan 33). Êngao anăn, tơdah Aê Diê brei mdrŏng sah, ai tiê khăp kơ mdrŏng hlăm ai tiê mtao bi êdah, Mtao Y‑Jôsaphat bi mguôp leh hŏng Mtao Y‑Ahasia jing mtao Israel ƀai snăk, bi mguôp mkra kŭmpăn nao kơ čar Tarsis čiăng mnia blei mah. I Bruă Mtao 22:48 čih snei: “Y‑Jôsaphat ngă kŭmpăn mơ̆ng Tarsis čiăng nao kơ čar Ôphir mă ba mah; ƀiădah diñu amâo jing nao ôh, kyuadah kŭmpăn mčah hĕ ti ƀuôn Êsiôn-Gêber”. Bruă anei amâo bi mơak kơ Aê Diê ôh, Ñu tiŏ nao Khua pô hưn êlâo Y‑Êliêser hưn êlâo, leh anăn knhal tuč Yêhôwa Aê Diê bi rai hdră bruă mtao, kŭmpăn anăn mčah jih, bruă mnia blei luč jih (êlan 37).
Bruă ngă krah dưh leh bi rai dŭm anôk ti dlông mơ̆ng Mtao Y‑Jôsaphat ngă kơ phung ƀuôn sang kkuh mpŭ kơ Aê Diê êjai leh anăn kkuh kơ yang mkăn êjai. Hjăn mtao, năng ai mtao amâo nao ôh ti anôk ngă yang ƀiădah mtao lŏ dưm mah Ôphia jing rup pô kkuh. Amâo djŏ knŏng bi mguôp hŏng mtao ƀai Y‑Ahasia ôh hlăm bruă mnia blei mah, mtao lŏ mjing gŏ sang bi jĕ êrô hŏng Mtao Y‑Ahap, jing mtao ƀai hĭn hlăm hƀuê ênuk Israel. Tơdah Mtao Y‑Asa hdĭp kluôm ênŭm hlue si Klei Aê Diê Blŭ mtô snăn klei jăk mtô bi hmô hmăi leh jăk kơ dŭm thŭn tal êlâo anak ñu kiă kriê jing Mtao Y‑ Jôsaphat, tơl truh Mtao Y‑Jôsaphat jing mdrŏng sah snăn klei hdĭp mphŭn lĕ buh, klei mtao bi hmô soh hmăi leh jhat kơ ênuk êdei, anak khua mtao jing Y‑Jôram jing leh mtao ƀai. Khua Yang Yêsu mtô: “Sa čô amâo dưi ôh jing hlŭn kơ dua čô khua; kyuadah ñu srăng bi êmut kơ sa čô anei leh anăn khăp kơ sa čô mkăn. Amâodah ñu srăng mpŭ kơ pô anei leh anăn bi êmut kơ pô mkăn. Diih amâo dưi ôh mă bruă kơ Aê Diê wăt kơ klei jing mdrŏng” (Y‑Mathiơ 6:24). Anak mnuih jing soh jhat anăn klei hdĭp amâo dưi kluôm ênŭm ôh. Knŏng tơdah drei myơr jih klei hdĭp kơ Aê Diê, jih ai tiê, jih mngăt, jih ai ktang huĭ mpŭ kơ Aê Diê, hdĭp hlue si Klei Aê Diê Blŭ mtô snăn klei hdĭp drei leh anăn anak čô drei dưi mâo klei jăk mơak. Klei bi hmô mơ̆ng Mtao Y‑Jôsaphat mñă kơ grăp čô drei đăm hdĭp krah dưh leh anăn amâo dưi ngă hlŭn kơ dua čô khua ôh.
Si drei hdĭp čiăng amâo ngă hlŭn kơ dua čô khua?
Wah lač: Ơ Khua Yang, akâo kơ Ih pap brei kyua ti krah klei mplư mơ̆ng lăn ala kâo ăt ênưih hlue Khua Yang krah dưh leh anăn jing hlŭn kơ dua čô khua. Akâo kơ Ih brei kâo thâo mơ̆ng klei hdĭp Mtao Y‑Jôsaphat thâo ruah êlan kluôm ênŭm hŏng Khua Yang leh anăn hdĭp bi hmô jăk kơ anak čô.
Dlăng Klei Aê Diê Blŭ hlăm tlâo thŭn: Y‑Yôhan 6:25-71
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
