Klei Aê Diê Blŭ: Y-Mathiơ 13:18-23
Êlan kliăng: “Bi kơ mjeh arăng rah leh ti lăn jăk, jing pô hmư̆ klei blŭ leh anăn thâo săng. Sĭt nik ñu mboh tơl sa asăr mjeh lŏ jing sa êtuh, đa năm pluh, đa tlâo pluh” (Y-Mathiơ 13:23)
Klei êmuh ksiêm mĭn: Si ngă Khua Yang Yêsu mblang kơ klei bi hriêng mnuih rah mjeh? Ya jing klei mblang kơ “mjeh” leh anăn dŭm mta lăn? Ti mta lăn klei hdĭp drei jing?
Leh mblang kơ phung ƀĭng kna ya ngă Ñu yua klei bi hriêng mtô kơ phung lu, Khua Yang dơ̆ng mblang klei mblang klei bi hriêng kơ mnuih rah mjeh. Khua Yang thơ̆ng čiăng mblang kơ hlei pô čiăng mâo klei thâo săng sĭt kơ klei êlam hgăm mơ̆ng Klei Aê Diê Blŭ. Ñu amâo mdăp ôh klei anăn kơ phung čiăng tui hriăm. Asăr mjeh jing “klei blŭ” čiăng lač kơ Klei Aê Diê Blŭ arăng mtô leh, pă mta lăn lač kơ pă hnơ̆ng klei wĭt ngă mdjŏ mdê mdê mơ̆ng phung hmư̆ Klei Aê Diê Blŭ. “Mjeh rah ktuê êlan” lač kơ phung hmư̆ Klei Aê Diê Blŭ ƀiădah amâo mâo mđing mĭn, amâo mă tŭ ôh klei blŭ kơ diñu pô leh anăn boh jhat jing yang jhat hriê tlĕ mă hĕ jih jang klei arăng rah leh. “Mjeh rah hlăm anôk lăn boh tâo” čiăng lač kơ phung hmư̆ Klei Aê Diê Blŭ êdu čhut ti êngao, kluôm dhuôm amâo ksiêm mĭn čiăng thâo săng ôh kơ klei êlam hgăm diñu hmư̆ leh. Diñu hdĭp hŏng klei bi kdjhưng ai ƀiădah êđal blă kyuanăn “tơdah mâo klei knap mñai amâodah klei ngă jhat truh kyua klei blŭ, ñu lui wir mtam” (êlan 21). “Mjeh rah hlăm anôk êruê” čiăng lač kơ ai tiê mă tŭ mơh Klei Aê Diê Blŭ ƀiădah amâo brei Klei Aê Diê Blŭ dôk kluôm dhuôm ôh hlăm ai tiê, ai tiê anăn ăt bŏ hŏng klei khăp kơ dŏ ngăn lăn ala, klei uêñ hnĭng kơ klei hdĭp anei ktư̆ hĕ klei hdĭp myang tơl amâo dưi đĭ hriê kơ prŏng leh anăn mboh ôh. “Mjeh rah hlăm anôk lăn jăk”, “lăn jăk” jing lăn mâo klei prăp êmiêt ksă êmă, čiăng lač kơ ai tiê êpa mhao sĭt kơ Klei Aê Diê Blŭ, tơdah Klei Aê Diê Blŭ truh kơ digơ̆, digơ̆ mđing hmư̆, ksiêm mĭn čiăng thâo săng leh anăn mboh boh tŭ dưn kơ Khua Yang. Klei hdĭp mnuih anăn srăng đĭ hriê kơ prŏng leh anăn mboh “tơl sa asăr mjeh lŏ jing sa êtuh, đa năm pluh, đa tlâo pluh” (êlan 23). Khua Yang Yêsu brei ƀuh wăt hnơ̆ng mboh mdê mdê dưn mơh ƀiădah mâo sa anôk msĕ, gru bi knal kơ lăn jăk jing mâo boh.
Brei grăp čô drei lŏ wĭt ksiêm dlăng kơ ai tiê leh anăn kơ knuih hmư̆ Klei Aê Diê Blŭ drei pô. Ti mta lăn ai tiê drei jing? Tơdah drei čiăng mâo Aê Diê mơh ƀiădah ăt khăp mơh kơ lăn ala anei sĭt nik klei hdĭp myang drei srăng êwiăr. Tơdah drei knŏng mđing mĭn mă kơ klei bi kdjhưng ai hlăk hmư̆ Klei Aê Diê Blŭ ƀiădah kƀah boh êlam hlăm klei thâo săng kơ Klei Ñu Blŭ, drei knŏng jing phung đăo ti êngao đuč, kyuadah tơdah tuôm hŏng klei lông dlăng knap mñai ênưih snăk drei lui wir klei đăo. Boh huĭ hyưt hĭn jing êjai drei ăt dôk hlăm sang Aê Diê, ăt hmư̆ Klei Aê Diê Blŭ grăp hruê kăm, ƀiădah Klei Aê Diê Blŭ kluôm dhuôm amâo ba sa mta klei bi mlih ôh hlăm klei hdĭp drei, Klei Aê Diê Blŭ truh leh anăn đuĕ nao, drei ka mâo klei bi mguôp sĭt hŏng Khua Yang ôh. Mnuih đăo mâo boh tŭ dưn jing mnuih mprăp ai tiê ñu msĕ si lăn jăk čiăng kơ Klei Aê Diê Blŭ rah leh anăn mboh.
Ya klei brei drei ngă čiăng dưi jing lăn jăk?
Wah lač: Ơ Khua Yang, brei Klei Ih Blŭ ruêh ai tiê kâo čiăng kơ kâo kmhal jih klei soh. Brei Klei Ih Blŭ bi mlih kâo čiăng kơ Ih yua klei hdĭp kâo jing msĕ si lăn jăk mboh kơ Ih.
Dlăng Klei Aê Diê Blŭ hlăm tlâo thŭn: Y-Mathiơ 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
