Cov Noob Nplej Uas Txi Ncw – 17/5/2023

7603

 

 

Mathais 13:18-23

Nqe cim:

“Thiab cov noob nplej uas poob rau ntawm qhov av zoo, piv txog Vajtswv txojlus uas neeg hnov thiab totaub: cov neeg ntawd ibtxhia txi tau ib puas lub, ibtxhia txi tau rau caum lub thiab ibtxhia txi tau peb caug lub” (Mathais 13:23).

 

Lus nug rau sawvdaws xav:

–       Tswv Yexus txhais lub ntsiab ntawm zaj lus pivtxwv hais txog tus tseb nplej zoo licas?

–       Lub ntsiab ntawm “cov noob” thiab cov av yog dabtsi?

–       Peb lub neej tabtom yog yam av twg?

Tomqab piav teb lo lus vim licas siv lus pivtxwv los qhuab qhia, tus Tswv pib txhais lub ntsiab ntawm zaj lus pivtxwv hais txog tus tseb nplej. Tus Tswv cim civ txhais lub ntsiab rau cov neeg uas ntshaw totaub tus Tswv Txojlus, Nws tsis zais cov neeg uas xav paub. Lub noob yog zaj lus uas hais txog Ntuj Ceebtsheej” hais txog Vajtswv Txojlus uas tau muab qhia tawm, plaub yam av hais txog plaub qib ntawm cov neeg mloog Vajtswv Txojlus. “Lub noob nplej uas poob rau hauv plawv kev” yog piv txog cov neeg uas hnov Vajtswv Txojlus tiamsis tsis quav ntsej, tsis txais yuav rau tus kheej thiab thaum kawg dab Ntxwgnyoog los txeeb tau tej uas tau tseb tawm. “Cov noob nplej uas poob rau ntawm qhov av uas hauv muaj pobzeb tiv” piv txog cov neeg mloog Vajtswv Txojlus kom dhau xwb, lawv tsis ua tib zoo xav kom totaub lub ntsiab ntawm tej lawv hnov. Lawv txaus siab hlo txais yuav Vajtswv Txojlus tiamsis Txojlus ntawd cog tsis ruaj hauv lawv lub siab, yog li ntawd “thaum lawv raug kev txomnyem lossis kev tsimtxom, ces lawv txawm muab tso tseg tamsim ntawd” (nqe 21). Cov noob nplej uas poob rau hauv lub hauvpaus pos” piv txog lub siab kuj txais yuav Vajtswv Txojlus tiamsis tsis cia Txojlus ntawd kav tagnrho lub siab, nyob hauv tus ntawd lub siab tseem puv npo tej kev nyuaj siab, kev ntshaw nyiaj ua rau txojkev ntseeg cob pob, tsis loj hlob thiab tsis txi txiv. “Cov noob nplej uas poob rau ntawm qhov av zoo”, av zoo yog cov av uas twb muab laij tseg npaj ua ntej lawm, piv txog lub siab nqhis nqhawv Vajtswv Txojlus, thaum Txojlus ntawd tseb tawm, lawv ua tib zoo mloog, ua tib zoo xav kom totaub thiab txi txiv ncw rau tus Tswv. Tus ntawd lub neej yuav loj hlob thiab tawg paj txi txiv “ibtxhia txi tau ib puas lub, ibtxhia txi tau rau caum lub thiab ibtxhia txi tau peb caug lub” (nqe 23). Tswv Yexus qhia pom hais tias txawm txi muaj qib sib txawv los puavleej muaj ib qhov zoo sib thooj, ntawd yog av zoo ces yuav txi txiv.

Peb txhua tus yuav tsum tig ntsia tus kheej kev mloog Vajtswv Txojlus. Peb lub siab yog yam av twg? Yog peb xav tau Vajtswv tiamsis kuj xav tau txhua yam hauv ntiajteb no ces peb lub neej sab ntsujplig yeej yuav loj hlob tsis taus. Yog peb tsuas mloog kom dhau Vajtswv Txojlus tiamsis tsis ua tib zoo xav kom totaub, ces peb tsuas yog cov uas lam tuav npe ntseeg xwb, vim thaum ntsib kev sim siab, txomnyem ces peb yuav tso kev ntseeg tseg. Qhov txaus ntshai tshajplaws yog thaum peb tseem tuaj hauv tuamtsev, tseem hnov Vajtswv Txojlus tiamsis Txojlus ntawd tsis dawm txog ib yam dabtsi hauv peb lub neej, Txojlus ntawd nkag los thiab tawm mus lawm, thiab peb yeej tsis tau muaj kev sib raug zoo tseeb nrog Vajtswv. Tus ntseeg lub neej tawg paj txi txiv yog tus uas npaj lub siab zoo li thaj av zoo tos Vajtswv Txojlus tseb rau thiab tawg paj txi txiv.

 

Thov Vajtswv,

Tus Tswv, thov Koj Txojlus nyob hauv nyuam yaus lub siab kom nyuam yaus paub lees kev txhaum. Thov Koj Txojlus pauv hloov nyuam yaus lub neej kom tau Koj siv ua yam av zoo tawg paj txi txiv pub rau Koj. Amees.

Peb yuav ua licas thiaj ua tau thaj av zoo?

Nyeem Vajluskub hauv peb lub xyoos: Mathais 22

Kênh Youtube BHKTHN:

https://www.youtube.com/c/bhkthn

Bài trướcBình Thuận: Lễ Cảm Tạ Chúa – Dâng Nhà Nguyện Điểm Nhóm Phan Sơn
Bài tiếp theoAsăr Mjeh Mâo Boh – 17/5/2023