Henplais 7:23-28
Nqe cim:
“Mauxes txoj kevcai ibtxwm tsa cov neeg uas zoo tsis heev ua Povthawj Hlob, tiamsis tej lus uas Vajtswv cog tseg tom qab Mauxes txoj kevcai tsa Leej Tub tus uas zoo kawg nkaus ua povthawj mus ibtxhis li” (Henplais 7:28).
Lus nug rau sawvdaws xav:
– Tswv Yexus zoo dua lwm tus povthawj hlob licas?
– Tswv Yexus ua dabtsi rau cov neeg uas los cuag Nws?
– Nej xav licas thaum paub hais tias muaj ib tug Tus Povthawj Hlob Uas Zoo Txaus Nkaus niaj hnub thov Vajtswv pab nej?
Cov neeg Yudais uas ntseeg Tswv Yexus lawm tseem pheej ntsib tej kev dag ntxias rov qab mus ua raws txoj kevcai qub. Vim li ntawd, tus sau phau Henplais thiaj piav qhia ntxaws heev txog tes haujlwm povthawj raws li txoj kevcai yeej pab tsis tau kom tibneeg ua tau neeg zoo txaus. Tes haujlwm povthawj zoo txaus nkaus yog tes haujlwm povthawj ntawm kev coglus tseg tshiab, tsis txawb rau ntawm txoj kevcai tiamsis yog txawb rau ntawm txojkev tabncuab, tsis yog los ntawm kev ua haujlwm tiamsis yog los ntawm kev ntseeg. Thiab tus povthawj hlob uas ua tes haujlwm no yog Tswv Yexus ntag, Nws yog Tus Povthawj Hlob Uas Zoo Txaus Nkaus, zoo dua tagnrho txhua tus povthawj hlob ntawm txoj kevcai.
Cov povthawj hlob Levis muaj coob heev tiamsis vim yog tibneeg yeej yuav tuag mus, yuav tsum muaj lwm tus los tuav lawv tes haujlwm. Tiamsis Tswv Yexus “muaj sia nyob mus ibtxhis, thiab nws tes haujlwm ua povthawj tsis poob mus rau lwm tus ua” (nqe 24). Cov povthawj hlob Levis yog tibneeg yoojyim poob mus rau kev txhaum. Ua ntej yuav los ua haujlwm, lawv yuav tsum hlawv tsiaj theej tus kheej lub txhoj, tomqab ntawd mam tua tsiaj hlawv pub rau cov pejxeem. Tiamsis Tswv Yexus “yog tus uas zoo kawg nkaus, nws tsis muaj ib qho txhaum li” (nqe 26). Tsis tas li ntawd xwb, Tswv Yexus muab Nws lub cev los theej sawvdaws lub txhoj “tib zaug xwb, theej tau mus ibtxhis li lawm”, txhais tau hais tias Nws txojkev tuag daws tau tagnho tibneeg ntiajteb tej kev txhaum. Thaum nyob saum tus ntoo khaublig, Tswv Yexus tawm lus hais tias “Tiav lawm lauj”, Nws tuag txhiv neeg ntiajteb tej kev txhaum thiab Nws sawv hauv qhov tuag rov qab los, rov mus nyob saum ntuj ceebtsheej, zaum ntawm Vajtswv ib sab ua tes haujlwm povthawj, uas yog thov Vajtswv pab peb, “Twb yog vim li ntawd, nws thiaj pab tau cov neeg uas nws coj los cuag Vajtswv, tsis hais nimno lossis yav tom ntej, rau qhov nws muaj sia nyob mus ibtxhis thiab thov Vajtswv pab cov neeg ntawd” (nqe 25).
Nyob hauv txojkev nrog tus Tswv mus, tej zaum peb yuav ntsib ntau yam kev sim siab. Dab Ntxwgnyoog niaj hnub tuav tswvyim tawmtsam peb txojkev ntseeg. Tiamsis txawm yuav muaj dabtsi tshwmsim tuaj, los peb muaj lub siab tawv thiab nyob kaj siab hauv qhov tseeb hais tias Tswv Yexus yog Tus Povthawj Hlob Uas Zoo Txaus Nkaus, Nws yog tus muaj sia zees nyob tabtom thov Vajtswv pab peb. Zoo siab kawg li thaum paub hais tias muaj ib tug tabtom hmov tshua thiab thov Vajtswv pab peb, tsis yog thov ib zaug xwb tiamsis niaj hnub thov. Yog li ntawd txawm yuav muaj kev sim siab txomnyem tuaj raug, los peb yeej muaj lub siab tawv tawmtsam thiab kovyeej vim paub hais tias muaj ib tug Povthawj Hlob Uas Zoo Txaus Nkaus tabtom thov Vajtswv pab peb.
Thov Vajtswv,
Tswv Yexus, nyuam yaus ua Koj tsaug, vim Koj tsis yog tsuas ua Tus Povthawj Hlob Uas Zoo Txaus Nkaus xwb tiamsis Koj tseem muab tus kheej los tuag txhiv nyuam yaus tej kev txhaum. Thov pab nyuam yaus ua tau lub neej phim Koj txojkev hlub, tas siab ntsws qhia txojkev cawmdim pub rau lwm tus, thiab ruaj siab thaum ntsib kev sim siab vim paub hais tias Koj tabtom taij thov Leej Txiv pab nyuam yaus. Amees.
Thaum ntsib kev txomnyem hauv lub neej, peb tig ntsia peb Tus Povthawj Hlob Uas Zoo Txaus Nkaus licas?
Nyeem Vajluskub hauv peb lub xyoos: Mathais 15
Kênh Youtube BHKTHN:
