Khua Ngă Yang Jăk Klă – 10/5/2023

8478

 

Klei Aê Diê Blŭ: Hêbrơ 7:23-28

Êlan kliăng: “Sĭt nik klei bhiăn mjing phung khua ngă yang prŏng mơ̆ng phung mnuih awăt, ƀiădah klei blŭ kat asei truh leh êdei kơ klei bhiăn mdưm sa čô Anak Pô Aê Diê brei jing jăk klă leh hlŏng lar” (Hêbrơ 7:28)

Klei êmuh ksiêm mĭn: Si klei jăk kdlưn hĭn Khua Yang Yêsu hŏng phung khua ngă yang mkăn? Ya klei Khua Yang Yêsu ngă hŏng phung hriê kơ Ñu? Si diih bi mĭn tơdah thâo mâo sa čô khua ngă yang jăk klă dôk wah lač brei nanao kơ drei?

Phung đăo Israel tơdah leh đăo kơ Khua Yang Yêsu, mâo nanao klei mplư čiăng lŏ wĭt tui êlan klei bhiăn. Kyuanăn, pô čih hră Hêbrơ mblang klă mngač kơ bruă khua ngă yang tui si klei bhiăn amâo dưi đru arăng jing jăk klă ôh. Bruă khua ngă yang jăk klă jing bruă khua ngă yang klei bi mguôp mrâo, amâo dưm phŭn ti dlông klei bhiăn ôh ƀiădah ti dlông klei pap, amâo kna kơ bruă ngă ôh ƀiădah kna kơ klei đăo. Leh anăn Khua Ngă Yang ngă bruă anei jing Khua Yang Yêsu, Khua Ngă Yang jăk klă, kdlưn hĭn kơ jih jang phung khua ngă yang klei bhiăn.

Khua ngă yang Lêwi lu snăk ƀiădah kyua diñu jing mnuih snăn srăng djiê, čiăng nanao lŏ mâo pô čuê bruă ngă. Bi Khua Yang Yêsu “djă bruă khua ngă yang nanao, kyuadah Ñu dôk hdĭp hlŏng lar” (êlan 24). Phung khua ngă yang Lêwi hlăm klei jing mnuih êdu awăt ênưih lĕ hlăm klei soh. Čiăng ngă bruă, êlâo hĭn diñu myơr mnơ̆ng ngă yang bi tui brei kơ klei soh diñu pô, êdei anăn kơh dưi myơr mnơ̆ng ngă yang kơ pô mkăn. Bi Khua Yang Yêsu jing “Doh jăk, amâo mâo klei dưi ƀuah ôh, amâo mâo klei čhŏ ôh, bi ktlah leh mơ̆ng phung soh” (êlan 26). Amâo djŏ knŏng dŭm năn ôh, Khua Yang Yêsu mjing Ñu pô jing mnơ̆ng myơr ngă yang, myơr “myơr knŏng sa blư̆ man djăp kơ jih jang ênuk”, jing hŏng klei Ñu djiê dưi mgaih mkra khut khat leh jih jang klei soh mnuih. Ti dlông kyâo bi kal, Khua Yang hưn lač “Jih jang bruă ênŭm leh sơăi”, Ñu djiê leh čiăng bi tui klei soh kơ phung mnuih leh anăn Ñu kbiă lŏ hdĭp leh mơh, đĭ wĭt ti dlông adiê, dôk gŭ tĭng hnuă kơ Aê Diê ăt lŏ ngă bruă khua ngă yang, anăn jing kăp wah lač brei kơ drei, “Kyuanăn Ñu dưi bi mtlaih hlŏng lar phung nao giăm Aê Diê hlăm Ñu, kyuadah Ñu dôk hdĭp nanao đru wah lač brei kơ digơ̆ ” (êlan 25).

Hlăm knhuang êbat tui hlue Khua Yang, drei srăng bi tuôm hŏng lu mta klei lông dlăng. Yang jhat dôk duah nanao djăp êlan čiăng ngă kơ klei đăo drei. Ƀiădah wăt tơdah mâo ya klei truh dưn, drei ăt dôk kjăp êđăp ênang hlăm klei sĭt nik Khua Yang Yêsu jing Khua Ngă Yang jăk klă, jing Pô dôk hdĭp hlŏng lar dôk wah lač brei kơ drei. Yuôm bhăn êdimima tơdah thâo mâo pô uêñ mĭn leh anăn dôk wah lač brei kơ drei, amâo djŏ knŏng sa blư̆ ôh ƀiădah nanao. Snăn, wăt tơdah hruê tuôm hŏng klei dleh dlan lông dlăng prŏng dlông msĕ si čư̆ dưn, drei ăt hŏng klei jhŏng tlă anăp leh anăn plah mă klei dưi hĭn kyuadah thâo sĭt mâo Khua Ngă Yang jăk klă dôk wah lač brei kơ drei.

Ti anăp klei dleh dlan hlăm klei hdĭp, si drei dlăng phă Khua Ngă Yang jăk klă drei?

Wah lač: Ơ Khua Yang Yêsu, lač jăk kơ Khua Yang kyuadah Ih amâo djŏ knŏng jing Khua Ngă Yang jăk klă ôh ƀiădah wăt myơr Ih pô jing mnơ̆ng myơr ngă yang jăk klă čiăng bi tui brei klei soh kâo. Akâo kơ Ih đru kâo dôk hdĭp năng hŏng klei pap Ih nanao, hŏng jih ai tiê kah mbha klei pap bi mtlaih kơ lu mnuih, leh anăn dôk kjăp ti anăp djăp mta klei lông dlăng kyuadah thâo sĭt Ih dôk wah lač brei kơ kâo.

Dlăng Klei Aê Diê Blŭ hlăm tlâo thŭn: Y-Mathiơ 15

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTus Povthawj Hlob Uas Zoo Txaus Nkaus – 10/5/2023
Bài tiếp theoThầy Tế Lễ Toàn Hảo – 10/5/2023