Pajlug 20:2-3; Kaulauxais 3:12-17
Nqe cim:
“Tus neeg ruam ua kom muaj kev sib cav sib ceg, tiamsis tus uas txav deb tej ntawd yuav tsis poob ntsejmuag” (Pajlug 20:3).
Peb nyeem ntxiv hauv Phau Txhais Tshiab HMOWSV:
“Qhov uas zam dhau ntawm kev sib cav sib ceg kuj tau koob meej, tiamsis txhua tus neeg ruam yeej sib cav sib ceg.”
Lus nug rau sawvdaws xav:
– Sib cav sib ceg ua rau muaj teebmeem dabtsi?
– Qhov sib txawv ntawm tus neeg ntse thiab tus neeg ruam thaum daws tej teebmeem zoo licas?
– Tus ntseeg yuav tsum muaj tus cwjpwm twg kom txav deb kev sib cav sib ceg?
Tus neeg tsis muaj tswvyim pheej xav hais tias tsuas yog thaum yeej hauv kev sib cav sib ceg thiaj ua rau luag hwm lawv, tiamsis qhov tseeb tsuas ua rau lawv dhau mus ua tus neeg ruam xwb. Kev sib cav sib ceg feem ntau pib ntawm kev khavtheeb, lossis tsis tswj tau lub siab kub. Thaum sib cav sib ceg nrog cov neeg muaj hwjchim, muaj meejmom pheej ua rau tus kheej ntsib teebmeem (nqe 2). Txawm yog tej zaum tej lus peb hais yog cai, tiamsis kev sib cav sib ceg kuj yoojyim ua rau vajntxwv lossis tej nomtswv chim, qhov ntawd kuj tsis yog ntse. Txawm yog dim dhau qhov uas raug tej nomtswv rau txim, los tus neeg ntawd kuj tsis tau luag hwm vim raug luag ntaus nqi hais tias yog tus neeg nyiam sib cav sib ceg. Vajtswv Txojlus hais tias “Qhov uas zam dhau ntawm kev sib cav sib ceg kuj tau koob meej” (nqe 3 PTT).
Kev kub ntxhov yeej muaj nyob hauv lub neej, tiamsis tus neeg muaj tswvyim yuav paub txav deb tej kev sib cav sib ceg, lossis tshaj ntawd, lawv kuj muaj peevxwm txhim kho los ntawm tej tswvyim zoo. Muaj ob daim duab sib txawv hais txog: tus neeg ruam sib cav sib ceg thaum ntsib teebmeem thiab tus neeg ntse nrhiav kev daws teebmeem. Tus neeg ntse xav txog qhov uas ua rau muaj kev sib haum xeeb heev dua qhov uas sib cav sib ceg kom yus yog tus yeej, tiamsis tus neeg ruam tswj tsis taus tus kheej thiab thaum pib nws twb siv kev sib cav sib ceg los txiav txim nrhiav qhov yeej qhov swb, qhov tseeb qhov yog. Kev sib cav sib ceg yog ua los tiv thaiv tus kheej kev khavtheeb, muab hlob thaum xav hais tias yus raug lwm tus saib tsis taus. Tus neeg ntse yeej ibtxwm txo hwjchim, tsis chim sai, xyuamxim daws tej teebmeem.
Timthawj Paulus txhawb txhua tus ntseeg yuav tsum ua lub neej tshiab qhia tshwm kev sib hlub, muaj siab mos siab muag. Timthawj Paulus qhia lub tswvyim pab peb daws tej teebmeem hais tias: “yog li ntawd, nej yuav tsum hlub lwm tus thiab ua siab zoo tsis txhob khavtheeb, tiamsis muaj lub siab mos siab muag thiab ua siab ntev. Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm” (Kaulauxais 3:12b-13). Thov Vaj Ntsujplig pab peb kawm tau Tswv Yexus kev zam txim rau peb tus kheej kom txaus siab hlo zam txim rau lwm tus. Kawm kev txo hwjchim ntawm tus Tswv kom paub txo hwjchim, txhob muab tus kheej lub suab npe, koob meej saib hlob dua qhov uas ua rau tus Tswv tau koob meej thiab kev sib raug zoo, sib koom siab ntawm cov kwvtij ntseeg.
Thov Vajtswv,
Tus Tswv, thov ua Koj tsaug vim Koj hlub thiab zam txim rau nyuam yaus. Thov pub rau nyuam yaus muaj tus cwjpwm txo hwjchim, sib hlub thiab muaj tswvyim los daws tej teebmeem ntawm nyuam yaus tej txheeb ze. Thov pab rau nyuam yaus muaj kev sib koom siab kom ua rau Koj tau koobmeej. Amees.
Peb puas pheej siv kev sib cav sib ceg los ua kom tus kheej muaj yeej?
Nyeem Vajluskub hauv peb lub xyoo: Xakhaliyas 13:1-14:21
Kênh Youtube BHKTHN:
