Klei Aê Diê Blŭ: Y‑Yôhan 19:17; Y‑Markôs 15:21
Êlan kliăng: “Leh anăn Yêsu hưn kơ phung ƀĭng kna Ñu, “Tơdah sa čô čiăng tui hlue Kâo, brei ñu hngah hĕ klei ñu pô čiăng, klam kyâo bi kal ñu pô, leh anăn tui hlue Kâo.” (Y‑Mathiơ 16:24)
Klei êmuh ksiêm mĭn: Si drei thâo săng kơ rup Khua Yang Yêsu klam kyâo bi kal? Ya klei diih thâo kơ pô klam brei kyâo bi kal kơ Khua Yang? Si klei mblang kơ klam kyâo bi kal tui hlue Khua Yang?
Khua Yang Yêsu tŭ klei phat kđi arăng bi mdjiê leh anăn tŭ klei phung kahan Rôm čăm biêng suăi êdimi ti sang khua phat kđi. Leh anăn diñu atăt ba Gơ̆ truh kơ anôk arăng bi mdjiê ti êngao ƀuôn Yêrusalem. “Leh anăn Yêsu kbiă nao klam kyâo bi kal Gơ̆ pô, truh kơ Anôk Klang Kŏ, arăng pia hlăm klei Hêbrơ Gôlgôtha.” (Y‑Yôhan 19:17). Rup sa čô mnuih arăng ba bi mdjiê êrah bŏ asei mlei, klam ti dlông mra mnơ̆ng pioh bi mdjiê pô jing kyâo bi kal ktrŏ snăk, čhuang êbat hŏng klei dleh dlan truh kơ anôk arăng bi mdjiê, lŏ bi kjham hĭn klei huĭ mduĭ kơ klei bi kmhal pơ̆ng msei kđĭn. Ƀiădah hlăm rup Khua Yang Yêsu klam kyâo bi kal, drei amâo ƀuh ôh sa čô mnuih soh năng djiê kyua klei soh ñu ngă, ƀiădah ƀuh rup êkei hlăk ai Y‑Isăk klam djuh dôk êbat đĭ nao kơ čŏng kbuôn čiăng mprăp kơ ñu pô yơh jing mnơ̆ng ngă yang myơr kơ Aê Diê (Klei Mphŭn Dơ̆ng 22:6). Khua Yang Yêsu jing mnơ̆ng myơr ngă yang bi tui klei soh kơ jih jang mnuih.
Knhuang êlan dơ̆ng mơ̆ng sang khua phat kđi truh ti Gôlgôtha kbưi knŏng hlăm brô 600 met, ƀiădah kyua arăng bi ư̆, êdei anăn lŏ tŭ klei čăm biêng suăi ktang snăk, kyuanăn knŏng klam kyâo bi kal čhuang êbat amâo sui ôh Khua Yang lĕ buh. Čiăng lŏ čuê knhuang êlan dôk nao, phung kahan Rôm duah sa čô mnuih klam kyâo bi kal hrô kơ Khua Yang. Leh anăn mnuih arăng ruah jing sa čô pô ƀri tăm găn ti anôk anăn. Klei mrâo mrang jăk Y‑Markôs brei thâo “Mâo sa čô mnuih anăn gơ̆ Y‑Simôn mơ̆ng čar Siren, ama Y‑Aleksanđơr leh anăn Y‑Ruphus, hriê mơ̆ng êngao ƀuôn găn tinăn. Diñu mgô̆ gơ̆ klam kyâo bi kal Yêsu.” (Y‑Markôs 15:21). Siren jing sa boh ƀuôn anôk kdrŭn jưh ti hang êa ksĭ tĭng Dưr (Bắc Phi), mâo sa êpul êya phung Israel êngŭm tinăn, snăn yơh năng ai Y‑Simôn anei jing sa čô Israel wĭt kơ Yêrusalem čiăng nao kơ knăm Bơ̆ng Klei Găn.
Klei mrâo mrang jăk Y‑Markôs hưn mthâo Y‑Simôn jing ama kơ Y‑Aleksanđơr leh anăn Y‑Ruphus, năng ai dua čô anei jing phung đăo kơ Krist sĭt suôr hlăm ênuk Phung Sang Aê Diê tal êlâo. Hlăk čih hră kơ Phung Sang Aê Diê ti ƀuôn Rôm, khua ƀĭng kna Y‑Pôl mơĭt klei kkuh čhưn hŏng Y‑Ruphus, “pô Khua Yang ruah, leh anăn amĭ ñu, jing msĕ si amĭ kâo mơh” (Rôm 16:13). Hruê wĭt kơ ƀuôn Yêrusalem, năng ai Y‑Simôn amâo tuôm mĭn ôh srăng bi tuôm hŏng Khua Yang Yêsu leh anăn klam kyâo bi kal hrô kơ Ñu. Ƀiădah Khua Yang Yêsu pô yơh bi tuôm leh hŏng ñu ti êlan tŭ klei knap mñai, jao kơ ñu mmông găl klam kyâo bi kal hrô kơ Ñu. Ñu tŭ ư mă tŭ klei myun anăn, leh anăn mơ̆ng anăn klei hdĭp ñu čhuang mŭt hlăm sa klei mrâo mrang. Kluôm jih gŏ sang ñu dưi thâo kral Khua Yang leh anăn mâo boh tŭ dưn kơ Ñu.
Khua Yang iêu mthưr hlei pô čiăng tui hlue Ñu brei “klam kyâo bi kal ñu pô” (Y‑Mathiơ 16:24). Kyâo bi kal bi knăl kơ klei djiê, kyuanăn hlei pô tui hlue Khua Yang brei djiê hĕ klei ñu pô jing, hmiêt mkăp tŭ klei knap mñai, ƀiădah lĕ klei jăk jĭn pioh kơ hlei pô sĭt suôr tui hlue Ñu jing prŏng êdimima!
Si ngă drei hmiêt mkăp “klam kyâo bi kal drei pô” tui hlue Khua Yang mơ̆?
Wah lač: Bi mni kơ Khua Yang kyua kâo Ih klam kyâo bi kal truh ti anôk tŭ klei arăng pơ̆ng. Khua Yang ăt brei mơh kơ kâo mmông găl dưi bi mguôp hlăm klei Ih tŭ klei knap mñai hŏng klei kâo myơr jih kluôm klei hdĭp kâo kơ Khua Yang grăp hruê. Akâo Khua Yang brei kơ kâo klei jhŏng čiăng kăp dôk mbĭt hŏng Khua Yang, hŏng Phung Sang Aê Diê Ih hlăm jih jang klei truh.
Dlăng Klei Aê Diê Blŭ hlăm tlâo thŭn: Y‑Nahum 1:1-2:10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
