Yauhas 19:17, Malakaus 15:21
Nqe cim:
“Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus” (Mathais 16:24).
Lus nug rau sawvdaws xav:
– Peb xav licas thaum pom daim duab Tswv Yexus kwv tus ntoo khaublig?
– Nej paub dabtsi txog tus neeg pab kwv Tswv Yexus tus ntoo khaublig?
– Kwv ntoo khaublig nrog tus Tswv mus lub ntsiab yog licas?
Tswv Yexus raug teem txim tuag thiab raug pab tubrog Loos tsimtxom hauv tus tswvxeev lub loog. Tomqab ntawd lawv coj Nws tawm mus rau ntawm qhov chaw rau txim nyob sab nraum ntug nroog. Vajluskub sau tseg hais tias: “Yog li ntawd, lawv thiaj coj Yexus tawm mus; thiab muab Yexus tus ntoo khaublig rau Yexus kwv, lawv coj Yexus mus txog ntawm qhov chaw uas hu ua ‘Pobtxha Taubhau’ (Lus Henplais hu ua ‘Khaulakhauthas’)” (Yauhas 19:16b,17). Daim duab txog tus neeg raug txim liab ntshav tsuas, kwv tus ntoo khaublig hnyav hynav, rhais ib ruam zuj zus mus rau qhov chaw rau txim, ua rau peb pom txog qhov txaus ntshai ntawm kev rau txim ntsia tus neeg txhaum rau saum ntoo khaublig. Tiamsis nyob hauv daim duab Tswv Yexus kwv tus ntoo khaublig, peb tsis pom zoo li ib tug neeg txhaum tsimnyog tuag vim tej kev txhaum nws ua, tiamsis ua rau peb pom txog daim duab Ixaj kwv ib tsuag taws mus lawm saum roob, npaj tus kheej ua khoom fij rau Vajtswv (Chivkeeb 22:6). Tswv Yexus yog yam khoom fij theej tagnrho neeg ntiajteb lub txhoj.
Ncua kev txij tus tswvxeev lub loog mus txog saum roob Khaulakhauthas tsuas muaj kwvlam 600 tshim xwb, tiamsis Tswv Yexus twb tsis tau zaub mov noj, tseem raug tsimtxom hnyav kawg thiab, yog li ntawd tej zaum Nws tsuas kwv tus ntoo khaublig tau ib ncua kev luv luv xwb twb tas zog thiab ntog lawm. Yuav mus taus ntxiv, cov tubrog Loos yuav tsum nrhiav ib tug los pab kwv tus ntoo khaublig hloov Nws. Thiab tus neeg “tau” xaiv yog ib tug txiv neej hla kev txawm yeej qhov chaw ntawd. Phau Malakaus qhia paub hais tias tus txivneej ntawd “hu ua Ximoos; nws tuaj pem yajsab tuaj, yuav mus rau hauv lub nroog. Lawv yuam nws kwv Yexus tus ntoo khaublig. (Tus Ximoos no nyob hauv lub nroog Kulenes; nws ob tus tub yog Alexades thiab Lufus) (Malakaus 15:21 HMOWSV). Kulenes yog ib lub nroog nyob raws ntug hiavtxwv Qaum Afikas, ntawm no muaj ib pawg neeg Yudais coob heev, yog li ntawd tej zaum Ximoos yog neeg Yudais tabtom rov los hauv nroog Yeluxalees ua Kevcai Hla Dhau.
Phau Malakaus qhia hais tias Ximoos yog Alexades thiab Lufus txiv, tej zaum ob tug no kuj yog cov ntseeg nto npe hauv Pawg Ntseeg xubthawj. Thaum sau tsab ntawv rau Pawg Ntseeg Loos, Timthawj Paulus tau hais lus noj qab nyob zoo rau Lufus hais tias: “Kuv xa lus noj qab nyob zoo rau Lufus, nws yog tus uas nquag ua tus Tswv tej haujlwm kawg li; thiab hais noj qab nyob zoo rau nws niam tus uas ib yam li yog kuv niam thiab” (Loos 16:13). Hnub uas los txog hauv Yeluxalees, Ximoos yeej tsis npaj siab tuaj ntsib Tswv Yexus thiab pab kwv Nws tus ntoo khaublig. Tiamsis yog Tswv Yexus ntsib Ximoos thaum tabtom tiv kev txomnyem, pub rau Ximoos tau pab kwv Nws tus ntoo khaublig. Ximoos txais yuav qhov ntawd thiab nws lub neej ntxee mus rau ib lub neej tshiab. Ximoos lub tsevneeg thiaj paub tus Tswv thiab muaj nqis rau Nws.
Tus Tswv nqua hu cov uas xav nrog Nws mus hais tias: “Yog leejtwg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaublig nrog kuv mus” (Mathais 16:24). Tus ntoo khaublig pivtxwv rau txojkev tuag, yog li ntawd tus uas nrog Nws mus yuav tsum tuag tus kheej, txaus siab tiv kev txomnyem, tiamsis koob hmoov pub rau cov uas ncaj ncees nrog tus Tswv mus kuj loj kawg nkaus li!
Thov Vajtswv,
Tswv Yexus, vim nyuam yaus Koj thiaj raug kwv tus ntoo khaublig mus rau qhov chaw rau txim. Koj kuj pub nyuam yaus muaj feem hauv Koj txojkev txomnyem los ntawm nyuam yaus lub neej ua Koj haujlwm txhua hnub. Thov pub rau nyuam yaus muaj lub siab tawv nrog Koj mus, nyob ruaj hauv Koj Pawg Ntseeg txhua lub tsamthawj. Amees.
Peb puas txaus siab “kwv nyias tus ntoo khaublig” nrog tus Tswv mus?
HNUB NO YOG HNUB UA KOOB TSHEEJ NCO TXOG TSWV YEXUS RAUG KEV TXOMNYEM, PEB CIA LI LOS XAV TXOG TSWV YEXUS TXOJKEV HLUB THIAB NWS TXOJKEV TUAG TXHIV PEB SAUM TUS NTOO KHAUBLIG, KOM UA TAU LUBNEEJ TSHAJTAWM TUS TSWV TXOJKEV HLUB RAU TXHUA TUS.
Nyeem Vajluskub hauv peb lub xyoo: Nahus 1:1-2:10
