Pajlug 19:24-29
Nqe cim:
“Metub, yog koj tso kev kawm tseg ces tsis ntev koj yuav tsis nco tej uas koj twb paub lawm.” (Pajlug 19:27).
Phau txhais HMOWSV hais li no:
“Kuv tub e, yog koj tso tej lus qhuab qhia tseg mas koj yuav yuam kev ntawm tej lus uas tswvyim qhia.”
Lus nug rau sawvdaws xav:
- Tus menyuam tawv ncauj muaj tus yamntxwv twg?
- Vajntxwv Xalumoos kom qhia cov menyuam tawv ncauj li cas?
- Peb kawm tau dabtsi qhov uas qhia menyuam hauv zaj kawm no?
Vajntxwv Xalumoos qhia paub cov yamntxwv ntawm tus menyuam tawv ncauj. Tim ib, tus menyuam tubnkeeg. Tubnkeeg txog qib uas nkees cev diav mus hais mov los rau ntawm lub qhov ncauj (nqe 24). Qhov kev tubnkeeg no qhia tawm tus menyuam tsis paub nws feem xyuam, tsis paub ua zoo, tsis nco niamtxiv txiajntsig ua zaub mov rau nws noj. Tus menyuam tawv ncauj tsis nco txog niamtxiv tej dag zog tu nws. Tim ob, tus menyuam tsis hwm niam hwm txiv. Nws muab lub siab “ntxeev siab rau nws txiv thiab ntiab nws niam tawm hauv tsev mus” (nqe 26). Nws saib tsis taus niamtxiv lub hwjchim, txojkev hlub thiab kev qhia nws. Txiv qhia nws los nws twb ntxeev siab rau txiv, niam yug nws, hlub nws los nws twb ntiab niam tawm tsev. Nws ua rau niamtxiv txajmuag vim tej uas nws ua thiab nws tej kev txhaum. Tim peb, tus menyuam muaj lub siab tsis nyiam ua zoo, saib niamtxiv tej lus qhia tsis muaj nqis. Yim hnub nws yim poob rau qhov yuam kev ua txhaum, “neeg siab phem yeej nyiam kev phem kev qias.” (nqe 28).
Txuas ntxiv, Vajntxwv Xalumoos kuj qhia kom cov niamtxiv qhia tej menyuam tawv ncauj. Nws qhia hais tias thaum qhuab ntuas, tus neeg ruam yuav dhau los ua neeg ntse; thaum qhia lawm, tus menyuam tawv ncauj yuav paub nws qhov txhaum (nqe 25). Vajntxwv Xalumoos kuj hais nruj rau cov menyuam tawv ncauj li no: “Metub, yog koj tso kev kawm tseg ces tsis ntev koj yuav tsis nco tej uas koj twb paub lawm.” Yog tsis lees txim thiab tsis hloov “yeej yuav mag nplawm xwb” (nqe 29).
Tu siab kawg nkaus rau tsevneeg uas muaj cov menyuam tawv ncauj. Qhov kev tu siab ntawd tsis yog niamtxiv ris xwb tiamsis yog tus menyuam ntawd ris qhov tsis zoo thiab. Tsis txhob saib kev nrhiav nyiaj txiag, meejmom rau tej mnyuam es saib kev qhia menyuam tsis tseemceeb. Tsis txhob hlub, tuaj menyuam tog dhau, nyob tsam nws tubnkeeg, tsis paub nws feem xyuam, tsis paub ua zoo. Thaum tsis qhia menyuam ces tej uas menyuam ua yuav raug lub tebchaws, txoj cai txiav txim. Niamtxiv tsis kam qhuab ntuas menyuam, ces tsev tu plaub yuav siv lub txim los qhia cov menyuam tawv ncauj ntawd. Thov Vajtswv pab rau cov niamtxiv muaj kev txawj ntse qhia tej menyuam, thiab kuj thov Vajtswv pab cov menyuam tawv ncauj ntsia pom tej uas nws tsis yog, tig rov los lees txim, hloov.
Thov Vajtswv,
Tus Tswv, thov Koj pub kom nyuam yaus muaj kev txawj ntse, cob qhia tau cov menyuam tawv ncauj. Tus Tswv thov Koj qhia cov menyuam paub lees txim, kho tej uas lawv ua txhaum thiab paub ua zoo rau niamtxiv, pogyawg. Amees.
Peb puas muaj menyuam tawv ncauj? Peb twb qhia lawv li cas lawm? Puas muaj yam dabtsi cheemtsum hloov?
Nyeem Vajluskub hauv peb lub xyoo: Amaus 5
Kênh Youtube BHKTHN:
