Klei Aê Diê Blŭ: Klei Bi Hriêng 19:8; II Y-Timôthê 3:14-15.
Êlan kliăng: “Hlei pô duah klei thâo mĭn khăp kơ mngăt ñu pô, hlei pô djă pioh klei thâo săng srăng đĭ kyar.”( Klei Bi Hriêng 19:8)
Klei êmuh ksiêm mĭn: Si jing klei bi mjĕ plah wah klei thâo mĭn hŏng klei khăp kơ mngăt Mtao Y-Salômôn mtô anak ñu? Ya mnơ̆ng yuôm hĭn mnuih thâo mĭn srăng mă tŭ? Ya srăng ngă čiăng dưi mă tŭ klei thâo mĭn mơ̆ng Aê Diê? Ya drei ngă čiăng bi êdah drei pô jing mnuih khăp kơ mngăt pô?
Hlăm Klei Bi Hriêng, lu blư̆ Mtao Y-Salômôn blŭ djŏ kơ klei bi mjĕ sĭt suôr plah wah klei thâo mĭn hŏng mngăt. Kčưm mtô kơ klei thâo mĭn, ñu ktrâo brei êlan čiăng dưi mâo klei thâo mĭn snei: “Klei huĭ mpŭ kơ Yêhôwa jing klei kčưm kơ klei thâo săng; phung mluk bi êmut kơ klei thâo mĭn leh anăn klei bi hriăm” (Klei Bi Hriêng 1:7). Leh anăn ñu hưn klă: “Hlei pô duah klei thâo mĭn khăp kơ mngăt ñu pô” (Klei Bi Hriêng 19:8). Klăk wĭt, “Hlei pô hngah klei mkra bi êmut kơ mngăt ñu pô, ƀiădah hlei pô dôk hmư̆ klei mkra mă tŭ klei thâo săng. Klei huĭ mpŭ kơ Yêhôwa bi hriăm mnuih mâo klei thâo mĭn” (Klei Bi Hriêng 15:32-33a). Leh anăn hlăm Klei Bi Hriêng 19:16, ñu mtô msĕ mơh: “Hlei pô djă pioh klei Yêhôwa mtă srăng hdĭp sui, ƀiădah hlei pô amâo gưt ôh srăng djiê.” Snăn yơh, čiăng mâo klei thâo mĭn sĭt, brei anak mnuih mpŭ kơ Aê Diê leh anăn gưt kơ klei Ñu mtă.
Klei Aê Diê Blŭ brei kơ anak mnuih klei thâo mĭn čiăng thâo kral Aê Diê, mâo klei jăk jĭn, leh anăn yuôm hĭn jing dưi mă tŭ klei thâo mĭn Khua Yang brei čiăng dưi bi mtlaih mngăt. Boh blŭ “khăp” hlăm pruĕ blŭ “khăp kơ mngăt” čiăng lač amâo djŏ khăp msĕ yang đar ôh ƀiădah hlăm boh blŭ phŭn lŏ mblang jing khăp kơ sa mta mnơ̆ng lu êdimima tơl ñu gĭr hŏng jih ai tiê čiăng dưi mâo mnơ̆ng anăn. Snăn yơh, pruĕ blŭ anei dưi săng jing yua klei thâo mĭn Aê Diê brei kơ drei hŏng jih ai tiê čiăng thâo kral êlan hdră leh anăn dưi mă tŭ klei bi mtlaih kơ mngăt. Khua ƀĭng kna Y-Pôl mtă kơ Y-Timôthê, pô ñu dlăng msĕ si anak snei: “leh anăn si ih thâo leh mơ̆ng hlăk hđeh klei čih doh jăk dưi bi hriăm ih kơ klei bi mtlaih hŏng klei đăo hlăm Krist Yêsu” (II Y-Timôthê 3:15). Dlăng leh anăn hriăm Klei Aê Diê Blŭ jing bruă ngă yuôm bhăn snăk čiăng dưi mă tŭ klei thâo mĭn mơ̆ng Aê Diê. Leh anăn klei yuôm hĭn jing hŏng klei knang kơ klei thâo mĭn Aê Diê brei, anak mnuih thâo kral Aê Diê leh anăn mâo klei bi mtlaih hŏng klei đăo kơ Yêsu Krist.
Thâo săng kơ klei bi mjĕ klei thâo mĭn hŏng mngăt, akâo Khua Yang đru drei hur har hriăm klei Ñu čiăng dưi mâo klei thâo mĭn, thâo kral klei soh, kmhal leh anăn đăo kơ klei Yêsu djiê leh ti kyâo bi kal čiăng kơ mngăt drei mâo klei bi mtlaih. “Kyuadah ya tŭ dưn kơ sa čô mnuih tơdah ñu mâo jih lăn ala ƀiădah mngăt ñu luč? Amâodah ya mnơ̆ng ñu srăng brei čiăng bi tui mngăt ñu?”(Y-Mathiơ 16:26). Brei drei thâo khăp kơ mngăt drei pô, jih klei hdĭp drei hung nao kơ klei hdĭp hlŏng lar, leh anăn thâo khăp brei msĕ mơh kơ lu mngăt mnuih ƀrư̆ ƀrư̆ dôk êbat nao kơ klei rai luč hlŏng lar čiăng hưn klei Yêsu bi mtlaih kơ digơ̆.
Si ngă êlâo hĭn drei uêñ mĭn kơ mngăt drei pô leh mơ̆? Ya drei ngă čiăng bi êdah klei khăp kơ mngăt?
Ơ Khua Yang, kâo bi mni kơ Ih kyua Ih brei leh Klei Ih Blŭ pioh bi hriăm kâo. Akâo Ih đru kâo gưt kơ Klei Ih Blŭ, hdĭp hŏng klei thâo mĭn tui si klei Ih čiăng leh anăn hŏng jih ai tiê hung kơ klei bi mtlaih mngăt kâo pô leh anăn jih jang mnuih msĕ mơh.
Dlăng Klei Aê Diê Blŭ hlăm tlâo thŭn: Y-Êskiêl 33:21-34:19.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
https://www.youtube.com/c/bhkthn
