Mathais 12:18-21
Nqe cim
“Tus tauj iab uas po lawm, nws yuav tsis muab lov, lossis lub teeb uas twb yuav tuag, nws yuav tsis tshuab kom tuag...” (Mathais 12:20a)
Lus nug rau sawvdaws xav:
- Timthawj Mathais siv tus cevlus Yaxayas tej lus los hais txog yam dabtsi
ntawm Tswv Yexus kev ua neej nrog tej neeg ibncig?
- Tus Tswv kev ua neej muaj nqis licas?
- Peb kawm tus Tswv tus qauv ua neej nrog tej neeg nyob ibncig licas?
Timthawj Mathais tsis yog tsuas hais txog kev koom ntawm Tswv Yexus nrog Vaj Leej Txiv, Vaj Ntsujplig thiab tes haujlwm qhia Txojmoo Zoo xwb (nqe 18), Mathais tseem xav kom cov neeg uas nyeem phau Mathais paub txog tus Tswv txojkev ua neej thiab tej uas Nws ua rau cov neeg ibncig. Tus Tswv tsis nrog luag sib cav sib ceg, Nws tsis hais lus nrov thiab paub tswj tus kheej. Tswv Yexus tsis hais lus nrov ntawm tej kev kom lwm tus tig ntsia Nws, thiab Nws kuj tsis mus mloog tej zaj uas tsis muaj qabhau; yog li ntawd thiaj tsis muaj neeg hnov Nws lub suab ntawm tej kev (nqe 19).
Timthawj Mathais kuj hais txog tej yam Tswv Yexus ua rau cov neeg ibncig los ntawm daim duab “tus tauj iab po”, “lub teeb yuav tuag” (nqe 20). Tiam Tswv Yexus nyob, tus tauj iab siv ua ntau yam; tiamsis lawv tsis siv tus tauj iab po uas twb lov lossis ntsoog lawm. Kuj ib yam nkaus li ntawd, thaum lub teeb tas roj lawm, ces luag yuav muab lub teeb ntawd tua kom tus teebxeeb tsis puas. Tus duab “tauj iab po”, “lub teeb yuav tuag” piv txog lub neej uas raug kev nyuaj siab, raug thuam, raug tso tseg lossis siv tsis tau lawm. Tswv Yexus hmov tshua cov neeg uas muaj lub neej zoo li ntawd, Nws pab cawm, hloov lawv los ua neeg muaj nqis. Qhov tseemceeb tshaj, tus Tswv kho lawv sab ntsujplig kom muaj nqis tabmeeg Vajtswv. Txawm yog raug tsimtxom, luag tsis txais yuav, raug hais phem, los Tswv Yexus yeej qhia tshwm lub neej ncaj ncees, thiab thaum kawg Nws yog tus muaj yeej saum tus ntoo khaublig; kom nimno txhua tus tibneeg tsis hais haivneeg twg los puavleej tau suav hais tias yog neeg ncajncees thaum los ntseeg Tswv Yexus, thiab tom ntej lawv yuav tau nrog Nws nyob mus ibtxhis.
Peb yog cov “tauj iab po”, “lub teeb yuav tuag” uas tau Tswv Yexus cawm, hloov thiab pub lub meejmom tseemceeb uas yog tau ua Vajtswv cov menyuam. Peb yuav tsum nco ntsoov qhov no kom peb paub ua tus Tswv tsaug thiab ua lub neej rau Nws tau ntsejmuag. Cia li kawm xyaum tus Tswv tus qauv ua neej, kev hais lus, kev ua zoo rau cov neeg nyob ibncig, kom dhau ntawd peb ua neej qhia tau Txojmoo Zoo rau lwm tus. Nyob ibncig peb tseem tshuav ntau lub neej puas tsus, kev sib raug zoo hauv tsevneeg tu ncua, tsis paub txog tus kheej lub neej tsimtxiaj…, lawv cheemtsum paub txog Tswv Yexus Txojmoo Zoo kom lawv sab ntsujplig tau hloov tshiab, thiab tau txais yam uas muaj nuj nqis tabmeeg Vajtswv.
Thov Vajtswv
Tus Tswv, nyuam yaus tsis tsimnyog tiamsis ua Koj tsaug Koj cawm nyuam yaus, thov Koj pab kom nyuam yaus hmov tshua txog cov neeg tsis tau dim thiab kom lawv lub neej muaj nqis hauv Koj lub npe. Amees.
Peb puas nco txog leejtwg cheemtsum tau txhawb zog hauv kev ntseeg, puas nco txog leejtwg uas tabtom tas kev cia siab kom pab tau lawv rov muaj kev cia siab thiab muaj nqis rau Tswv Yexus?
Nyeem Vajluskub hauv peb lub xyoo: Exekees 13:1-14:11
Kênh Youtube BHKTHN:
