Daniyees 11:1-4
Nqe cim:
“Tej lus uas qhia tshwm ntawd tsis yog neeg qhia, tiamsis yog Vaj Ntsujplig tus Dawbhuv tshoov neeg lub siab kom lawv qhia Vajtswv txojlus xwb” (II Petus 1:21).
Lus nug rau sawvdaws xav:
- Ntu Vajluskub Daniyees 11:1-4 cev lus tseg ua ntej txog lub tebchaws twg?
- Tej lus muaj tiav li cas hauv keevkwm dhau los?
- Muaj raws li tej lus hais tseg ua ntej lawm, pab peb kev ntseeg txog yam dabtsi?
Hauv Daniyees tshooj 11, tus timtswv tau qhia paub txog Vajtswv tes haujlwm yuav muaj tshwm los rau tej tebchaws nyob cheebtsam nruab nrab sab hnub tuaj, plaub puas xyoo tom qab ntawd. Txawm cev lus tseg tsis tuav ib leejtwg npe, tiamsis keebkwm tau pom muaj tiav raws li ntawd rau tej vajntxwv dhau los lawm tsis poob ib lo li. Peb yuav los saib tus cev lus hais tseg thiab muaj tiav raws li keebkwm dhau los kom paub meej txog Vajtswv yog tus tswj lub ntuj thiab lub ntiajteb.
Nqe 2 hais ua ntej txog yuav muaj plaub tug vajntxwv sawv los tswj kav tom qab Pawxias. Raws li hais tseg, tus vajntxwv tim plaub yog Xaislas. Nws sawv los kav, nws muaj lub siab ntshaw kom txeeb tau tebchaws Kilis huv tibsi, tiamsis nws swb ib tug vajntxwv uas sawv los tom qab ntawd vim tus vajntxwv ntawd “muaj siab tawv heev.” Raws li keebkwm sau tseg, cov neeg Kilis tus vajntxwv Alexander tua yeej cov Pawxias tus vajntxwv xyoo 331 UY. Tiam uas Xawxes ua vajntxwv kav Pawxias, nws tau mus ntaus tebchaws Kilis tiamsis puavleej swb. Xawxias npaj muaj rooj noj rooj haus hu tej nomtswv tuaj noj zoo siab, nws xav muab Vasetis los khav rau sawvdaws, tiamsis hu tsis tau niam poj vajntxwv Vasetis los khav rau tej nomtswv, nws thiaj raws poj vajntxwv Vasetis khiav tawm, thaum ntawd Exethaws thiaj tau los ua poj vajntxwv thiab pab cawm Vajtswv haiv neeg dim ntawm Hamas lub tswvyim phem uas xav tua Vajtswv haiv neeg. Nqe 4 hais tias tsis ntev tus vajntxwv Kilis uas muaj zog heev kuj tuag lawm, tsis muaj tug los hloov nws chaw, thiab lub tebchaws raug tawg“ua plaub pab”. Keebkwm sau tseg hais tias, Alexander tuag lawm, nws lub tebchaws raug muab faib ua plaub lub. Tej ntawd kuj tau muaj sau tseg ua ntej hauv Daniyees 8:5-8 lawm.
Muaj tiav raws li cov cev Vajtswv lus hais tseg ua ntej qhia tau hais tias Vajtswv txojlus hais tau tseeb thiab leej kawg. Vajtswv tib leeg yog tus paub tau txhua yam thiaj qhia yam yuav muaj los yav tom ntej rau cov cev lus hais tseg ua ntej thiab yog tus ua tau txhua yam thiaj muaj fwjchim ua tiav li cov cev lus hais tseg lawm. Tus cev lus Daniyees hais tias: “Nws muab tej uas neeg tsis tau paub thiab tsis pom los nthuav qhia rau sawvdaws; Nws paub tej uas nyob nraim nkoos hauv qhov tsaus ntuj nti thiab muaj qhov pom kev ci kaj nrig nyob puagncig Nws” (Daniyees 2:22). Thaum los xav txog tej lus hais tseg ua ntej hauv Vajluskub yeej muaj tiav, ua rau peb muaj kev ntseeg ntxiv thiab txiav txim siab ua lub neej raws li Vajluskub qhia, ib yam li Petus tau hais tias: “Yog li ntawd peb hajyam cia siab rau tej lus uas cov cev Vajtswv lus tau qhia tseg lawm. Yog nej khaws tej lus ntawd cia rau hauv nej lub siab yuav zoo heev, rau qhov tej lus ntawd zoo ib yam li lub teeb uas ci hauv qhov tsaus ntuj mus txog thaum kaj ntug thiab lub hnubqub uas ci ci thaum kaj ntug yuav ci rau hauv nej lub siab” (II Petus 1:19).
Thov Vajtswv,
Tus Tswv, thov pab kom nyuam yaus kub siab kawm Koj txojlus txhua hnub, Koj txojlus yuav yog lub teeb taws ci rau nyuam yaus pom kev ua neej. Thov pab nyuam yaus paub tso siab thiab ua raws li Koj tej lus qhia txhua hnub. Amees.
Peb puas tseg sijhawm los nyeem thiab kawm Vajtswv txojlus txhua hnub thiab tso siab rau cov cev Vajtswv lus tej lus qhia lawm tau?
Nyeem Vajluskub hauv peb lub xyoo: Yelemis 5:1-19
Kênh Youtube BHKTHN:
