Lukas 17:7-10
Nqe cim:
“Nej cov los kuj ib yam nkaus, thaum nej ua raws li Kuv kom nej ua tas lawm, nej cia li hais tias, peb yog cov tubtxib uas tsis tseemceeb dabtsi li, peb tsuas ua raws li peb tes haujlwm xwb” (Lukas 17:10).
Lus nug rau sawvdaws xav:
- Tej hom neeg hais txog hauv zaj xwm yog piv rau leejtwg?
- Zaj lus pivtxwv no qhia ntsigtxog Vajtswv thiab cov ntseeg Yexus li cas?
- Thaum zeem paub lub ntsiab hauv zaj lus pivtxwv no lawm yuav ua rau peb muaj lub neej pehawm thiab ua Vajtswv haujlwm zoo li cas?
Zaj lus pivtxwv txog ib tug tubtxib mus ua haujlwm tsheej hnub tom nras los txog tsev tseem npaj rooj noj haus tiam nws tus tswv yog tes haujlwm uas nws yuav tsum ua. Tswv Yexus xaus zaj lus pivtxwv ntawd hais tias: “Nej los kuj ib yam nkaus…” (nqe 10). Yog li ntawd, tus tubtxib hauv zaj lus pivtxwv no yog hais txog Yexus cov thwjtim lossis hais txog cov ntseeg Yexus, thiab tus tswv piv txog Vajtswv. Kev ntsigtxog ntawm Vajtswv thiab cov ntseeg Yexus zoo ib yam li tubtxib thiab tus tswv. Qee leej tsis zoo siab thaum xav txog Vajtswv thiab cov ntseeg zoo li tus tswv thiab tubtxib tiamsis ib nyuag txaus siab yog muab hais Vajtswv thiab cov ntseeg zoo li txiv tub lossis zoo li phoojywg. Los ntawm Vajtswv txojkev hlub pub dawb, cov neeg uas los ntseeg Yexus thiaj tau hu Vajtswv ua kuv Txiv thiab Tswv Yexus hu kuj hais tias: “Kuv tsis hu nej ua tubtxib lawm,… tiamsis kuv hu nej ua phoojywg…” (Yauhas 15:15). Nyob hauv Vajtswv kev hlub, tus Tswv “tsis hu” peb ua tubtxib lawm, tiamsis tseeb tiag peb yeej yog tus Tswv cov tubtxib.
Yog tus Tswv cov tubtxib, peb yuav tsum paub fwm Vajtswv. Tus tubtxib mus ua haujlwm tsheej hnub tom nras yeej yog mloog tus tswv lus, thiab thaum los txog tsev sab kawg, tseem npaj pluas noj rau tus tswv kuj yog tes haujlwm nws yuav tsum ua rau tus tswv (nqe 7-8). Yam uas tus tubtxib yuav tsum ua yog fwm thiab mloog nws tus tswv lus txhua lub tsamthawj. Yog Vajtswv cov tubtxib, peb lub dag zog yuav tsum siv los ua haujlwm pub rau Vajtswv. Tus tubtxib tsis muaj cai nroo lossis hais tias khwv dhau lawm yuav so ib pliag, vim nws tsis muaj cai so li, tsuas muaj ua txhua yam uas nws tus tswv txib xwb. Peb yog Vajtswv cov tubtxib, peb tsis muaj cai yuam kom tau qhuas lossis tau pauj txiajntsig thaum mloog tus Tswv lus. “Txawm tus tubtxib ua raws li nej hais los tsis tas nej yuav ua nws tsaug” (nqe 9). “Pauj txiajntsig” lub ntsiab yog zeem paub yam uas luag ua zoo rau yus lawm. Peb txhua tus yeej tsis muaj nqis dabtsi tiamsis yog los ntawm Vajtswv kev hlub pub dawb, thaum los ntseeg Yexus lawm peb thiaj tau los ua Vajtswv cov tubtxib. Peb txhua tus ntseeg yeej yog Vajtswv cov tubtxib thiab“peb tsis tseemceeb dabtsi”. Lo lus “tsis tseemceeb” txhais hais tias “twb tsis tsimnyog”, tiamsis qhov uas peb tau los ua Vajtswv tubtxib yog Vajtswv kev hlub pub dawb xwb.
Vim peb cov ntseeg pheej tsis nco txog peb yog cov tubtxib uas tsis tseemceeb, peb thiaj tsis siv zog ua haujlwm pub rau Vajtswv li uas tsimnyog yuav tsum ua. Yuav tsum nco ntsoov hais tias, Vajtswv tsis tshuav peb li nqi tiamsis tsuas muaj peb tshuav Vajtswv nqi uas yuav them tsis txawj tas xwb.
Thov Vajtswv,
Vajtswv, ua Koj tsaug uas Koj cawm nyuam yaus dim lub txim txhaum thiab pub rau nyuam yaus muaj feem los ua Koj tes haujlwm. Thov pab kom nyuam yaus paub meej nyuam yaus yog leejtwg thiab ua neej phim yog ib tug tubtxib, ua Koj tes haujlwm los ntawm kev fwm thiab ua Koj tsaug mus li. Amees.
Peb puas paub nco Vajtswv txiajntsig kom ua tau lub neej tsimnyog yog Vajtswv ib tug tubtxib lawm tau?
Nyeem Vajluskub hauv peb lub xyoo: Yaxayas 63
Kênh Youtube BHKTHN:
