Kaulaxais 3:15-17
Nqe cim:
“Nej cov uas Yexus Khetos hu los koom ua ib lub cev, nej yuav tsum cia Yexus Khetos txoj kev ncaj ncees coj nej lub neej. Nej yuav tsum niaj hnub ua Vajtswv tsaug” (Kaulauxais 3:15).
Lus nug rau sawvdaws xav:
- Timthawj Paulus hais li cas rau cov ntseeg hauv Kaulauxais?
- Paulus ntuas cov ntseeg yuav tsum ua dabtsi?
- Yam uas Paulus hais txog hauv ntu Vajluskub no yog dabtsi?
- Peb pheej ua Vajtswv tsaug li cas hauv lub neej?
Ua ntej yuav xaus ntu uas hais txog lub neej tshiab hauv Yexus Khetos, Timthawj Paulus hais ob yam rau cov ntseeg hauv Kaulauxais uas yog: kev kaj siab thiab tus Tswv Yexus Khetos tej lus nyob hauv cov ntseeg lub siab (nqe 15-16). Ob yam no yog qhov tseemceeb uas txhua tus ntseeg Yexus lawm yuav tau saj thiab muaj. Kev kaj siab hauv tus Tswv yuav tsum muaj nyob hauv tus ntseeg Yexus lub siab txhua lub tsamthawj tsis hais tau zoo lossis txomnyem. Thaum muaj kev kaj siab peb thiaj paub ua Vajtswv tsaug rau txhua yam. Tus Tswv tej lus yog lus txawj ntse, yam muaj nqis rau peb txhua tus sab ntsujplig (Ntawv Nkauj 119:105). Yog ib tug ntseeg Yexus tiamsis tsis paub tus Tswv tej lus, ces yuav tsis sawv ruaj khov hauv kev ntseeg. Yog li ntawd, Paulus thiaj kom cov ntseeg yuav tsum khaws Yexus tej lus huv tibsi rau hauv siab, thiaj yuav muaj lub neej haum Vajtswv siab.
Txuas ntxiv yog Paulus ntuas cov ntseeg yuav tsum ua lub neej nyob hauv kev ntseeg, yog niaj hnub pheej ua Vajtswv tsaug. Thaum muaj Yexus txoj kev ncaj ncees coj peb lub neej lawm, peb yuav paub nco Vajtswv txiajntsig thiab paub ua Vajtswv tsaug rau txhua yam uas Vajtswv ua pub rau peb lawm. Lo lus Yexus txoj kev ncaj ncees “coj” yog ua lub neej cia Yexus nrog phua plaub ntug. Nyob hauv peb txhua tus lub neej yeej muaj yam zoo yam phem, lub siab qub thiab lub siab tshiab pheej sib txeeb ua plaub ntug txog yam qub thiab yam tshiab. Tiamsis thaum tus Tswv txoj kev ncaj ncees los phua plaub ntug hauv lub neej lawm ces yuav ua rau Vajtswv cov me nyuam los koom tau nrog tus Tswv lub cev. Thaum ntawd, txhua yam uas los koom lub cev yuav paub nco tus Tswv txiajntsig thiab txawj ua lub neej sib haum nrog sawvdaws.
Los ntawm lub siab pheej ua Vajtswv tsaug, peb yuav tsum ib leeg qhia ib leeg thiab koom siab ua ke hu nkauj qhuas Vajtswv. Txhua yam uas peb niaj hnub ua, peb yuav tsum ua kom tsimnyog peb yog cov ntseeg Yexus thiab “cia li ua Vajtswv tus uas yog peb Leej Txiv tsaug” (nqe 16b-17).
Lub neej nco Vajtswv txiajntsig thiab ua Vajtswv tsaug tsis yog nyob ntawm peb tus kheej lub neej xwb tiamsis yuav tsum yog ntawm kev ua neej nrog cov ntseeg sawvdaws ib yam nkaus. Timthawj Paulus hais txog peb zaug ua Vajtswv tsaug hauv peb nqe Vajluskub, txhais tau hais tias kev ua Vajtswv tsaug tseemceeb heev rau cov ntseeg. Thaum Vajtswv cov me nyuam muaj lub siab pheej ua Vajtswv tsaug, thaum Pawg Ntseeg ua Vajtswv tsaug, ces yuav ua rau coob leej ntau tug paub ua Vajtswv tsaug. Lwm tus yuav saib pom peb lub neej uas nyob kaj siab thiab pheej ua Vajtswv tsaug los ntawm peb tej lus hais thiab peb tes haujlwm.
Thov Vajtswv,
Tus Tswv, thov Koj txojkev kaj siab, txojkev ncaj ncees thiab Koj tej lus los nyob puv nkaus hauv nyuam yaus lub siab, kom nyuam yaus pheej ua koj tsaug tsis tu hauv lub neej. Amees.
Peb lub neej puas pheej ua Vajtswv tsaug los ntawm tej lus hais thiab tes haujlwm lawm tau?
Nyeem Vajluskub hauv peb lub xyoo: Yaxayas 58
Kênh Youtube BHKTHN:
