I Vajntxwv 20:35-36
Nqe cim:
“Vim koj tsis mloog tus Tswv lus, mas thaum koj ncaim kuv mus, tsov ntxhuav yuav tom koj. Ces thaum nws ncaim mus lawm, ib tug tsov ntxhuav txawm cia li tom nws lawm tiag” (I Vajntxwv 20:36).
Lus nug rau sawvdaws xav:
- Thaum hnov hais tias vajntxwv Ahaj tsis tua vajntxwv Npeehadas, muaj ib tug cevlus hais kom nws tus phoojywg ua dabtsi rau nws?
- Tus phoojywg no ua licas thiab nws raug dabtsi? Vim licas nws thiaj raug li ntawd?
- Tus Tswv xav kom tus neeg uas pehawm thiab ua Nws haujlwm yuav tsum muaj yam dabtsi?
- Peb txiav txim siab licas thaum ntsib tej uas zoo li zaj no?
Tomqab uas Vajtswv pub rau vajntxwv Ahaj tua yeej cov Xilias zaum ob, vajntxwv tau ua ib qhov txhaum loj heev, ntawd yog tsis mloog Vajtswv tej lus zam tsis tua vajntxwv Npeehadas thiab sib coglus ua ke (I Vajntxwv 20:34, 42). Vajtswv tau txib ib tug cevlus tuaj cuag vajntxwv Ahaj qhia txog Vajtswv tej kev txiav txim. Thaum yuav mus ua tes haujlwm no, tus cevlus thiaj mus cuag nws ib tug phoojywg nyob hauv pab cev Vajtswv lus thiab kom tus ntawd muab nws ntaus, tiamsis tus phoojywg ntawd tsis kam ntaus. Vim li ntawd, tus phoojywg no thiaj raug txim, uas yog thaum ncaim mus lawm, nws raug ib tug tsov ntxhuav tom tuag.
Vim licas tus phoojywg no thiaj raug tuag thaum tsis kam ntaus tus cevlus? Puas yog vim nws tsis nkag siab qhov keebtiv thiaj tsis kam ntaus tus cevlus? Tiamsis los ntawm tus cevlus lo lus teb qhia peb paub hais tias tsis yog li ntawd: “Vim koj tsis mloog tus Tswv lus, mas thaum koj ncaim kuv mus, tsov ntxhuav yuav tom koj. Ces thaum nws ncaim mus lawm, ib tug tsov ntxhuav txawm cia li tom nws lawm tiag” (nqe 36). Yog li ntawd, tus phoojywg raug txim tsis yog vim nws ua phem, tiamsis yog vim nws “tsis mloog tus Tswv lus”. Tus phoojywg no paub “tus Tswv lus” tiamsis nws tsis ua raws thiaj raug txim hnyav kawg li.
Vajntxwv Ahaj raug txim vim khavtheeb, vajntxwv xav hais tias nws txawjntse heev, nws thiaj ua raws tus kheej kev xav thiab tawmtsam Vajtswv tej lus samhwm. Tus cevlus tus phoojywg raug tsov ntxhuav tom vim tsis ua raws Vajtswv tej lus samhwm, rau qhov nws xav raws li tus kheej kev xav xwb, thaum kawg nws thiaj xav hais tias tus Tswv tej lus samhwm tsis yog lawm. Tagnrho ob zaj no qhia peb paub txog ib txojcai tseemceeb sab ntsujplig, uas yog: yuav tsum tuag nthi ua raws tus Tswv tej lus samhwm txawm nkag siab thiab tsis nkag siab. Ntawd yog yam uas tus Tswv xav kom cov ntseeg Nws thiab ua Nws haujlwm yuav tsum muaj. Niaj hnub nimno, peb pheej hais li ub li no los daws qhov uas tus kheej tsis mloog Vajtswv lus, tiamsis yuav tsum ceevfaj tej ntawd. Yuav tsum nco ntsoov Vajtswv Txojlus uas hais tias: “Tus Tswv xav kom neeg mloog nws lus lossis muab tsiaj tua fij rau nws? Mloog tus Tswv lus zoo dua qhov uas muab tej yaj zoo nkauj tua fij rau nws” (I Xamuyees 15:22).
Thov Vajtswv
Tus Tswv, thov pub nyuam yaus muaj lub pobntseg zoo li ib tug tub kawm ntawv thiaj hnov tau Koj tej lus hais; thiab pub nyuam yaus muaj lub siab, kev xav zoo li ib tug tubtxib thiaj ua tau raws li Koj tej lus qhia. Amees.
Peb puas pheej xav raws tus kheej kev totaub thiaj ua rau peb tsis ua raws Vajtswv Txojlus?
Nyeem Vajluskub hauv peb lub xyoos: Yaxayas 30:8-33
Kênh Youtube BHKTHN:
