Mathais 5:8
Nqe cim:
Cov uas muaj lub siab ncaj ncees, cov ntawd tau koob hmoov; lawv yuav pom Vajtswv!
Phau txhais tshiab Hmowsv hais tias: “Cov uas lub siab dawbhuv tau nyob kaj siab lug, rau qhov lawv yuav pom Vajtswv”.
Lus nug rau sawvdaws xav: Tus uas lub siab dawbhuv yog tus zoo li cas? Vim li cas tus neeg uas muaj lub siab dawbhuv tau koob hmoov? Pom Vajtswv txhais tau li cas? Txoj koob hmoov no qhia rau peb paub dabtsi txog yus lub neej sab ntsujplig?
Nyob hauv Vajtswv Txojlus, “lub siab” yog hais txog qhov tseemceeb ntawm tus neeg; xws li kev txawj ntse, rau siab, thiab kev xav (Loos 1:21; 2:5; 5:5). Lub siab yog lub hauvpaus txhua yam ntawm tus tibneeg (Pajlug 4:23; Yelemis 17:9; Mathais 12:34; 15:19). Kev txawj ntse, totaub tseemceeb heev tiamsis qhov no tsuas yog ib feem hauv lub siab xwb. Yam uas Tswv Yexus nqua hu tsis yog lub siab muaj kev txawj ntse paub hloov pauv kom zeem paub yus lub neej sab ntsujplig xwb, tiamsis tseem yog teebmeem rau lub siab, tibneeg, kev hlub thiab peb txojkev rau siab thiab.
“Dawbhuv” txhais tau hais tias yog “tau ntxuav kom huv” lossis “tsis ua phem ua qias lawm”. Cov neeg uas nyob hauv Vajtswv lub Tebchaws yuav tsum muaj lub siab dawbhuv, tsis ua phem ua qias vim Vajtswv lub Tebchaws yog lub tebchaws uas ci ntsa iab thiab Vajtswv yog tus dawbhuv (I. Petus 1:15-16; Tshwmsim 21:27). Tswv Yexus yog tus dawbhuv rau peb xyaum (Mathais 5:48). “Dawbhuv” tseem txhais tau hais tias yog “tsis sib xyaws”. Tus neeg uas muaj lub siab dawbhuv nws tsis muaj lub siab phem, nws lub siab xav ntsoov txog Vajtswv tib leeg xwb (Mathais 6:24; 7:13-14). Tswv Yexus qhia kom peb yuav tsum muaj lub siab nrog Nws mus tsis xyaw lwm yam thiab taw ntshis mus rau lub homphiaj ua haum Vajtswv siab nyiam xwb.
Cia kom muaj“lub siab dawbhuv”, cia li nco ntsoov tias tsuas yog tus Tswv xwb thiaj ua tau kom lub siab dawbhuv. Thaum Timthawj Yauhas hais tias, “txhua tus uas cia siab rau Yexus Khetos yeej yuav tswj kom nws ua tau lub neej dawbhuv” (I. Yauhas 3:3), Yauhas hais txog ob qhov chaw txawb tseemceeb rau tes haujlwm no: Qhov chaw txawb tim ib yog tej yam uas tus Tswv twb ua rau peb lawm (I. Yauhas 3:1). Peb tsuas “tswj tau lub neej dawbhuv” thaum tus Tswv twb ua rau peb dawbhuv, ua tau neeg tshiab yog thaum peb tau los ua Nws menyuam. Qhov chaw txawb tim ob yog Nws qhib peb lub qhovmuag siab kom peb ntsia pom Yexus tus qauv. “Dawbhuv” yog tes haujlwm Vajtswv xub pib ua ntej. Txuas ntxiv, vim zeem paub tej uas tus Tswv twb ua rau peb ces peb yuav zoo siab hlo ua kom haum Nws siab, mloog Nws lus, thiab cia Nws ua kom peb muaj lub siab dawhuv txhua hnub (Filipis 2:12-13; 4:8).
“Pom Vajtswv” txhais tau li cas? Tus neeg uas muaj lub siab dawbhuv yog tus neeg yug dua tshiab, yeej yuav tau ntsib Vajtswv tim ntsej tim muag hnub Yexus rov qab los. Tiamsis thaum tseem ua neej nyob no peb pom Vajtswv dhau los ntawm Nws Txojlus thiab los ntawm lub sijhawm nrog tus Tswv sib txuas lus. Vim qhov uas pom tus Tswv no yuav ua rau cov neeg muaj lub siab dawbhuv muaj kev ntseeg ruaj khov, zoo siab, pab tau cov uas ntog sawv taus, thiab muaj zog khov kho tom qab uas raug sim siab (Phau Ntawv Nkauj 24:3-6).
Thov Vajtswv,
Tus Tswv, nyuam yaus tabtom ua neej nyob rau lub ntiajteb uas tsaus ntuj sab ntsujplig thiab tsis muaj ib tug ua zoo, thov Koj pab kom nyuam yaus ua tau lub neej dawbhuv thiab nrhiav tus Tswv txhua hnub. Amees.
Peb puas pom Vajtswv thaum lub sijhawm peb tus kheej thov Vajtswv?
Nyeem Vajluskub hauv peb lub xyoos: Xalumoos Tej Nkauj 7:1-8:14
Kênh Youtube BHKTHN:
