Klei Aê Diê Blŭ: Klei Bi Hriêng 17:16-20
Êlan kliăng: “Leh anăn Yêsu lač kơ digơ̆, “Răng bĕ, đăm tluh kơ dŏ dô ôh, kyuadah klei hdĭp sa čô mnuih amâo djŏ ôh kyua ñu mâo lu êbeh dŏ ngăn.”… Ƀiădah Aê Diê lač kơ ñu, ‘Ơ mnuih mluk! Mlam anei Aê Diê srăng sua mă mngăt ih. Leh anăn mnơ̆ng ih mkra leh, hlei pô srăng dưn lĕ?’” (Y‑Luk 12:15, 20).
Klei êmuh ksiêm mĭn: Si klei mtao Salômôn bi hriăm anak kơ ênoh prăk ngăn leh anăn êlan hdră kiă kriê prăk ngăn? Si knhuah Khua Yang čiăng kơ drei mâo kơ prăk ngăn? Si ngă čiăng drei yua prăk ngăn hŏng klei thâo mĭn?
Mtao Salômôn bi hriăm anak thâo kiă kriê prăk ngăn hŏng klei thâo mĭn. Tal sa, prăk ngă dưi blei lu mta, ƀiădah amâo djŏ jih jang mnơ̆ng ôh. Klei mĭn, klei khăp sĭt leh anăn klei thâo mĭn amâo dưi blei hŏng prăk ôh. Wăt tơdah dưi blei klei thâo mĭn dưn ăt kăn mâo klei tŭ dưn kơ mnuih mluk mơh. Blŭ klă hĭn, mnuih mluk amâo thâo ôh si ngă čiăng bi djŏ, bi guôp hŏng klei kpă ênuah wăt tơdah mâo prăk hlăm kngan dưn. Tal dua, klei khăp anak mnuih tơdah mdơ̆ng ti dlông prăk ngăn amâo srăng kjăp ôh. Adôk prăk kăk adôk ƀĭng găp, ayŏng adei; jih prăk kăk, ayŏng adei phưi lui, ƀĭng găp ñĕ đuĕ. Anak mnuih dôk dơ̆ng ƀơ̆g huă êăt kba hdơ̆ng găp tơdah jih prăk kăk, ƀiădah hlăm klei thâo mĭn mơ̆ng Khua Yang, klei khăp ti krah ƀĭng găp, jih ai tiê bi đru hdơ̆ng găp hlăm klei truh jing yuôm hĭn kơ prăk ngăn. Tal tlâo, răng hlăm klei kiă kriê prăk ngă. Amâo djŏ ôh tuôm hŏng mnuih dôk găn klei truh drei phưi lui, ƀiădah kăn mơh kyua klei jing găp djuê drei ruăt kuăt rơ̆ng brei, klam brei nư klei kơ arăng. Mnuih thâo mĭn amâo ênưih tŭ klei dleh bi kgăn kyua djăl hmư̆ klei phung riêng gah akâo rơ̆ng klam brei nư kơ diñu. Lu blư̆ anak pô srăng tla brei nư leh anăn bi luč knuih khưm kyua klei rơ̆ng brei anăn (Klei Bi Hriêng 6:1‑5). Tal pă, đăm jing mgao kyua prăk ngăn ôh. Rup sa boh sang mâo ƀăng bhă dlông bi hmô kơ klei mdrŏng sah, klei hưn ktưn pô sang, ƀiădah klei hưn ktưn jing klei mluk. Klei mgao jing klei Aê Diê bi êmut kheh leh anăn Ñu srăng bi kmhal phung mgao (Klei Bi Hriêng 16:5). Aê Diê thâo jih jang klei, ƀuh jih klei mnuih bi mĭn, kyuanăn mnuih mâo klei mĭn wê, mâo êlah soh jhat sĭt nik srăng tŭ klei knap mñai.
Hlăm hdruôm hră Klei Mrâo Mrang Jăk Y‑Luk 12:16-21, Khua Yang Yêsu yăl dliê klei bi hriêng kơ sa čô mdrŏng mkăm pioh dŏ ngăn ti lăn ala ƀiădah amâo mkăm pioh dŏ ngăn hlăm adiê ôh, amâo uêñ mĭn kơ mngăt ñu ôh, Khua Yang lač anăn jing “mnuih mluk”. Prăk ngăn amâo dưi blei klei thâo mĭn čiăng mâo klei hdĭp hlŏng lar ôh. Aê Diê jao kơ drei prăk ngăn leh anăn Ñu čiăng kơ drei yua bi djŏ, thâo mĭn. Drei amâo čuôt klih kơ ayŏng amai adei drei ôh, ƀiădah kăn ênưih đei tơl arăng mjhua. Prăk kăk, ngăn drăp jing dŏ Aê Diê brei, drei jing mnuih kiă kriê, snăn đăm ôh kyua mdrŏng sah jing mgao. Klei yuôm hĭn đăm khăp kơ prăk tơl ngă soh leh anăn tŭ klei bi kmhal mơ̆ng mnuih, mơ̆ng Aê diê bi luč hĕ klei hdĭp hlŏng lar.
Ya klei drei čiăng bi mlih hlăm klei mĭn leh anăn klei kiă kriê prăk ngăn?
Wah lač: Ơ Khua Yang, bi mni lač jăk kơ Khua Yang kyua Ih brei kơ kâo klei hdĭp hlŏng lar. Akâo Khua Yang brei kâo thâo kiă kriê prăk kăk, ngăn drăp Khua Yang hŏng klei thâo mĭn. Akâo Khua Yang đru kâo đăm jing mgao ôh leh anăn đăm khăp kơ prăk ôh tơl ngă soh hŏng mnuih, hŏng Khua Yang.
Dlăng Klei Aê Diê Blŭ hlăm tlâo thŭn: Klei Bi Hriêng 19:1‑29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
