Pajlug 17:16-20
Nqe cim:
“Nej txhua tus yuav tsum ceevfaj tsis txhob ntshaw yam ub yam no. Txawm yog nej muaj nyiaj ntxiag thiab qhov txhia chaw ntau npaum li cas los tej ntawd yeej pab tsis tau kom nej muaj txojsia nyob ntev… Tus neeg ruam, hmo no koj txojsia twb yuav tu; yog li ntawd, tej qhov txhia chaw uas koj npaj tseg yuav yog leejtwg tug?” (Lukas 12:15, 20).
Lus nug rau sawvdaws xav:
- Vajntxwv Xalumoos qhia tej me nyuam txog nyiaj txiag thiab kev ceev nyiaj txiag li cas?
- Tus Tswv xav kom peb ua li cas rau peb tej khoom nyiaj txiag?
- Peb yuav tsum siv nyiaj txiag zoo li cas?
Vajntxwv Xalumoos qhia nws tej me nyuam yuav tsum muaj tswvyim siv nyiaj txiag rau qhov: Tim ib, nyiaj txiag yuav tau ntau yam, tiamsis tsis yog txhua yam. Kev txawj ntse, lub tswvyim thiab kev tseeb muab nyiaj yuav tsis tau. Txawm hais tias muab nyiaj them nqe yuav tau tswvyim los tsis muaj qab hau rau tus neeg ruam. Lossis meej dua yog, tus neeg ruam yuav tsis paub ua dab tsi, thiab ua yam twg thiaj yog txawm nws muaj nyiaj ntau ntawm tes. Tim ob, tibneeg kev sib paub sib pab tsuas nyob ntawm tej khoom nyiaj txiag xwb ces tsis ruaj khov. Thaum muaj nyiaj txiag ces muaj phoojywg, thaum tas nyiaj txiag ces tas phoojywg, thiab tej kwvtij los tso yus tseg. Tej neeg yuav tsis sib hlub thaum tsis muaj nyiaj txiag, tiamsis los ntawm tus Tswv lub tswvyim tej phoojywg yeej txawj sib hlub sib pab thaum ntsib teebmeem. Tim peb, ua tib zoo ceev thiab siv tej khoom nyiaj txiag.Txhob tsis quav ntsej tej neeg txomnyem, txhob maj lees nrog tej neeg txheeb ze them lawv tej nuj nqis. Tus neeg muaj tswvyim tsis yoojyim ntseeg txhua tus tej lus thiab tsis yoojyim nrog lwm tus them nqi. Tim plaub, txhob vim muaj nyiaj txiag ua rau yus khav theeb, khav txiv. Khav theeb yog xav kom tau luag qhuas, yog ua qhia qhua. Khav theeb yog yam uas Vajtswv ntxub kawg thiab yuav rau txim rau (Pajlug 16:5). Vajtswv yog tus pom txhua yam, Nws paub tej uas yus xav hauv nruab siab, yog li ntawd, cov muaj lub siab tsis ncaj, ua neeg dag puavleej yuav tau txais kev puas tsuaj.
Nyob hauv phau Moo Zoo Lukas 12:16-21, Tswv Yexus muab zaj lus piv txwv txog tus neeg npluanuj khaw nyiaj txiag cia hauv ntiajteb tsis khaws tseg rau saum ntuj thiab tsis xav txog nws txoj sia sab ntsujplig raug Tswv Yexus hu nws ua “tus neeg ruam”. Nyiaj txiag muas tsis tau lub tswvyim, kev txawj ntse uas nyob mus ibtxhis. Tus Tswv pub peb muaj khoom nyiaj txiag thiab Nws xav kom peb muaj tswvyim siv tej ntawd muaj nqis. Peb tsis ua neeg tsis paub txuag khoom nyiaj txiag uas yuav siv li cas los tau, tiamsis sis kuj tsis ua neeg qia dub dhau. Khoom nyiaj txiag txhua yam yog tus Tswv muab pub, peb yog cov uas tswj saib xyuas tej ntawd xwb, tsis txhob khav theeb thaum muaj nyiaj txiag ntau. Thiab tsis txhob vim muaj nyiaj txiag ua rau yus poob mus ua txhaum, thaum kawg raug txim mus ibtxhis.
Thov Vajtswv,
Tus Tswv, nyuam yaus ua Koj tsaug vim Koj pub rau nyuam yaus muaj txoj sia ibtxhis. Thov pab nyuam yaus paub txuag tej khoom nyiaj txiag qhov txhia chaw uas Koj muab pub thiab siv tej ntawd kom muaj nqis rau Koj tes haujlwm. Amees.
Muaj yam dab tsi peb yuav tau hloov ntsigtxog kev txwj tej khoom nyiaj txiag?
HNUB NO YOG HNUB VAJLUSKUB, THOV VAJ NTSUJPLIG TAW QHIA TXHUA TUS KOM PAUB UA LUB NEEJ MUS RAWS QHOV TSEEB HAUV VAJTSWV TXOJLUS THIAJ MUAJ QAB HAU RAU TUS TSWV.
Nyeem Vajluskub hauv peb lub xyoo: Pajlug 19
Kênh Youtube BHKTHN:
