Klei Aê Diê Blŭ: Y-Mathiơ 10:28-31
Êlan kliăng: “Đăm huĭ ôh kơ phung dưi bi mdjiê asei mlei ƀiădah amâo dưi bi mdjiê mngăt, ƀiădah huĭ bĕ kơ Pô dưi bi mdjiê mngăt wăt asei mlei hlăm war pui” (Y-Mathiơ 10:28).
Klei êmuh ksiêm mĭn: Khua Yang Yêsu mtô phung khua ƀĭng kna brei huĭ ko hlei pô? Ya ngă? Ya rup Khua Yang Yêsu yua čiăng bi hmô kơ klei Aê Diê kiă kriê? Ya klei ngă kơ drei huĭ tơl amâo dưi mă bruă kơ Aê Diê?
Khua Yang Yêsu brei thâo sĭt Ñu mtô kơ phung tui hlue Khua Yang srăng tlă anăp hŏng ya klei dleh dlan, arăng ngă jhat, boh nik huĭ hyưt kơ klei hdĭp, hŏng klei mĭn mơ̆ng sa čô mnuih, phung ƀĭng kna ăt rŭng răng, huĭ hyưt. Kyua anăn Khua Yang Yêsu mblang kơ phung ƀĭng kna pô mta phŭn ya ngă đăm huĭ ôh hlăk êjai mă bruă kơ Khua Yang leh anăn hưn pô jing Phung đăo kơ Krist. Hlăm êlan 28, Khua Yang bi msĕ kơ ênoh yuôm asei mlei leh anăn mngăt, mơ̆ng anăn phung ƀĭng kna mâo klei ruah djŏ klă hlei jing brei pô huĭ. Boh blŭ “phung dưi bi mdjiê asei mlei” čiăng lač kơ klei dưi mơ̆ng Satan, Satan knŏng dưi ngă kơ asei mlei đuč, amâo dưi ngă ôh kơ mngăt anak mnuih, msĕ si klei yăl kơ Y-Yop (Y-Yop 2:4-6). Brei drei huĭ mpŭ kơ Pô brei leh kơ drei mngăt (Klei Mphŭn Dơ̆ng 2:7) leh anăn Pô dưi phat kđi leh anăn bi kmhal klei soh wăt asei mlei leh anăn mngăt hlăm war pui lă lar (Klei Bi Êdah 20:15). Khua Yang Yêsu bi hmô kơ klei Aê Diê kiă kriê hlăm djăp mta mnơ̆ng. Čĭm hrai jing čĭm điêt hĭn leh anăn amâo yuôm ôh ƀiădah Aê Diê ăt răng mgang, Ñu bi mklă hŏng phung ƀĭng kna hlăk đưm leh anăn drei jing phung mă bruă kơ Aê Diê hruê anei jing drei yuôm bhăn ti anăp Aê Diê.
Sĭt tlă anăp hŏng klei dleh dlan, arăng ngă jhat, klei ruă tưp drei khăng rŭng răng čiăng mdei, lui bruă, kdŭn tluôn. Drei huĭ luč liê kơ asei mlei leh anăn ai tiê pô; khădah snăn, Klei Aê Diê Blŭ mñă, mđĭ ai drei knŏng mâo Khua Yang Yêsu, Pô iêô mthưr, hrŏng ruah leh anăn bi mtlaih drei kơh dưi mâo klei dưi hlăm asei mlei leh anăn mngăt drei. Satan knŏng dưi ngă jhat kơ asei mlei, ñu amâo mâo klei dưi hlăm mngăt drei ôh; kyua anăn, brei kjăp ai tiê mă bruă Khua Yang kyua Ñu kiă kriê nanao hlăm djăp mta mnơ̆ng. Ñu thâo klă kơ drei, wăt jih “Ƀiădah wăt ƀŭk ti boh kŏ diih arăng yap leh jih” (êlan 30), kyua anăn brei huĭ mpŭ kơ Aê Diê leh anăn mă bruă kơ Ñu truh knhal tuč. Khua Yang Yêsu lač leh hlăm Y-Mathiơ 16:26, “Kyuadah ya tŭ dưn kơ sa čô mnuih tơdah ñu mâo jih lăn ala ƀiădah mngăt ñu luč? Amâodah ya mnơ̆ng ñu srăng brei čiăng bi tui mngăt ñu?” bi êdah kơ drei thâo amâo mâo ôh ya klei dưi mkă hŏng ênoh yuôm mơ̆ng mngăt, kyua anăn brei êđăp ênang čiăng mă bruă kơ Aê Diê kyua thâo Ñu dôk răng mgang klei jăk hĭn kơ pô.
Drei thâo mơ̆ klei dưi Aê Diê kiă kriê leh anăn răng mgang hlăm djăp mta bruă leh anăn hlăm jih klei hdĭp pô ?
Wah lač: Ơ Khua Yang, kâo bi mni lač jăk kơ Ih kyua Ih rơ̆ng kơ kâo klei hdĭp lă lar hlăm Ƀuôn Ala Mtao, akâo kơ Ih đru kâo đăo kjăp hlăm klei dưi Ih kiă kriê hlăm klei hdĭp kâo čiăng mâo dôk êđăp ênang nanao, kjăp ai tiê mă bruă kơ Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 137:1-9; 138:1-8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
