Yuav Tsum Ntshai Leejtwg? – 20/7/2022

627

 

 

Mathais 10:28-31

Nqe cim:

“Nej tsis txhob ntshai tus uas tua tau nej lub cev, tiamsis tua tsis tau nej tus ntsujplig; nej yuav tsum ntshai Vajtswv tus uas muab tau nej lub cev thiab nej tus ntsujplig pov rau hauv ntujtawg” (Mathais 10:28).

 

Lus nug rau sawvdaws xav:

  • Tswv Yexus qhia cov thwjtim yuav tsum ntshai leejtwg? Vim licas?
  • Tswv Yexus siv daim duab dabtsi los piv txog Vajtswv kev tswj kav txhua yam?
  • Muaj yam dabtsi ua rau peb txhawj ntshai ua tsis tiav tus Tswv tes haujlwm?

Tswv Yexus paub hais tias, thaum Nws qhia rau cov thwjtim paub ua ntej txog tej kev khwv, kev tsimtxom uas lawv yuav ntsib, qee zaug tseem yuav raug ploj raug tuag; ces tej ntawd yuav ua rau cov thwjtim txhawj thiab ntshai. Yog li ntawd, Tswv Yexus thiaj piav qhia rau cov thwjtim txog lub vimchiv tsis txhob ntshai thaum ua tus Tswv haujlwm thiab lees hais tias lawv yog cov ntseeg Tswv Yexus. Nyob hauv nqe 28, tus Tswv muab piv nuj nqis ntawm lub cev thiab tus ntsujplig, dhau ntawd pab cov thwjtim paub xaiv saib leejtwg yog tus uas yuav tsum ntshai. Nqe lus “tus uas tua tau nej lub cev” xav hais txog Xatas lub hwjchim, Xatas tsuas ua tau rau sab nqaij tawv raug puastsuaj xwb, ua tsis tau rau sab ntsujplig raug puastsuaj, zoo li Yauj zaj (Yauj 2:4-6). Peb yuav tsum paub ntshai Tus uas pub peb muaj ntsujplig (Chivkeeb 2:7) thiab Tus uas muab tau peb sab nqaij tawv thiab ntsujplig pov rau hauv ntuj tawg ibtxhis (Tshwmsim 20:15). Tswv Yexus hais ib zaj lus pivtxwv txog Vajtswv kev tswjkav txhua yam. Tus noog tsev yog yam uas me thiab tsis muaj nqis siab dabtsi, tiamsis tus Tswv tseem saibxyuas, dhau ntawd Nws xav hais rau cov thwjtim thaum ub thiab peb cov uas tabtom ua Nws haujlwm hais tias, peb muaj nqis heev rau Nws.

Thaum ntsib kev khwv, kev txomnyem, kab mob kis huamvam, ua rau peb muaj lub siab txhawj ntshai xav tso tseg lossis xav thim rov qab. Peb ntshai tsam lubcev thiab tus ntsujplig raug puastsuaj; tiamsis Vajtswv Txojlus qhuab ntuas, txhawb peb lub zog hais tias, tsuas yog Tswv Yexus tus uas nqua hu, xaiv thiab cawm peb dim xwb thiaj muaj cuabkav tuav peb lubcev thiab tus ntsujplig. Xatas tsuas ua rau peb lub cev puastsuaj xwb, nws ua tsis tau rau tus ntsujpig puastsuaj; yog li ntawd, cia li rau siab ntso ua tus Tswv haujlwm vim Nws tabtom tswjkav txhua yam. Nws paub zoo txog peb, txawm yog peb “tej plaubhau los Vajtswv twb suav txhua txoj huv tibsi lawm” (nqe 30), yog li ntawd yuav tsum paub ntshai thiab ua tus Tswv haujlwm mus txog thaum kawg. Tswv Yexus hais hauv Mathais 16:26 hais tias: “Yog leejtwg tau ib puas tsav yam hauv ntiajteb no los ua nws tug, tiamsis nws txojsia tu lawm, tej ntawd yuav muaj nqis dabtsi rau nws? Yeej tsis muaj ib yam dabtsi uas nws yuav coj mus txhiv tau nws txojsia rov qab los?” Qhov no qhia peb paub hais tias, tsis muaj dabtsi piv tau tus ntsujplig; yog li ntawd, yuav tsum rau siab ua tus Tswv haujlwm, vim paub hais tias Nws tabtom saibxyuas, tiv thaiv yam muaj nqis tshajplaws ntawm peb lubneej.

Peb puas zeem paub txog tus Tswv lub hwjchim tswjkav thiab saibxyuas peb lubneej lawm tau?

 

Tus Tswv, nyuam yaus ua Koj tsaug, vim Koj coglus pub nyuam yaus tau txojsia ibtxhis saum Ntuj Ceebtsheej, thov pab nyuam yaus muaj kev ntseeg ruaj khov rau ntawm Koj, kom nyuam yaus lubneej muaj kev kaj siab, muab siab rau ua Koj tes haujlwm. Amees.

Nyeem Vajluskub hauv peb lub xyoos: Phau Ntawv Nkauj 137:1-138:8

Kênh Youtube BHKTHN:

https://www.youtube.com/c/bhkthn

Bài trướcThơ: Trở Về Bên Chúa!
Bài tiếp theoKơ Hlei Pô Brei Huĭ ? – 20/7/2022