Daniyees 9:1-3
Nqe cim:
“Kuv kub siab lug thov tus Tswv uas yog Vajtswv. Kuv yoo mov, kuv hnav ntaubtsaj thiab kuv zaum hauv qhov tshauv” (Daniyees 9:3).
Lus nug rau sawvdaws xav:
- Lub sijhawm “vajntxwv Xawxes uas yog neeg Medes tus tub Dali-us ua vajntxwv” tseemceeb licas rau Daniyees?
- Lub sijhawm ntawd nws tau ua dabtsi?
- “Kawm Vajtswv tej ntawv” thiab “kub siab lug thov tus Tswv” muaj kev sib txuas licas?
- Yuav ua licas peb thiaj rau siab kawm Vajtswv Txojlus thiab kub siab lug thov Vajtswv li tus cev lus Daniyees?
Daniyees 9 pib ntawm qhov uas hais ob zaug txog lub sijhawm “Vajntxwv Xawxes uas yog neeg Medes tus tub Dali-us ua vajntxwv kav”, thiab “thawj xyoos uas Dali-us ua vajntxwv kav tebchaws” (nqe 1-2). Ntawd yog sijhawm kwv lam xyoo 539 UT, yog xyoo tebchaws Npanpiloos raug poob rau cov Medes – Pawxias txhais tes, uas muaj tiav raws li tus Tswv tej lus hais tseg nyob hauv tshooj 8. Yog ib tug nom loj rau tebchaws Npanpiloos ib nrab tiam, ces zaj no yog ib qhov xwmtxheej loj heev nyob hauv Daniyees lubneej vim tsis yog hloov vajntxwv hauv lawv lub tebchaws li ibtxwm, tiamsis yog raug lwm tus vajntxwv “uas yog neeg Medes” tuaj hloov (nqe 1).
Tshaj lwm tus, Daniyees paub thiab pom meej txog tus Tswv tej lus hais tseg tabtom tshwmsim zuj zus. Thaum zoo li ntawd, nws “kawm Vajtswv tej ntawv” kom paub; thaum paub lawm, Nws “kub siab lug thov tus Tswv uas yog Vajtswv,… yoo mov,… hnav ntaubtsaj thiab… zaum hauv qhov tshauv” (nqe 2-3). Hais ua lwm seem, mas thaum pom caijnyoog pauv hloov, pom tej uas tus Tswv ua, yim ua rau Daniyees xav paub tus Tswv lub siabnyiam los ntawm kev tshawb nrhiav tus Tswv Txojlus, nws thiaj kub siab lug thov tus Tswv. Nyeem Vajtswv tej ntawv pab Daniyees paub txog tus Tswv tej lus cogtseg thiab Nws lub siabnyiam. Thaum paub Vajtswv Txojlus lawm ua rau Nws kub siab lug, tas siab tas ntsws taij thov tus Tswv.
Muaj qee leej tsuas xav nyeem thiab kawm Vajluskub xwb, lawv tseg ntau sijhawm thiab dag zog los tshawb ntau phau txhais, tshawb nrhiav tej uas lawv tsis totaub, nyeem ntau phau ntawv tshawb fawb, nrhiav tej kevcai ntseeg… Tiamsis kuj muaj qee leej tsuas thov Vajtswv nruab hnub hmo ntuj xwb. Tus cev lus Daniyees ua tagnrho ob txoj ntawd. Nws tsis nyeem Vajluskub kom dhau xwb. Tiamsis, nws saib caijnyoog, tshawb nrhiav tus Tswv tej lus cogtseg saib puas haum rau sijhawm ntawd. Daniyees tsis ntim txhua yam nws kawm kom puv hlwb thiab nyob twjywm li ntawd xwb, tiamsis nws tshawb nrhiav, thiab dhau qhov ntawd coj nws los txhos caug thov Vajtswv. Nws ntseeg hais tias, tus Tswv yuav zoo siab ua tiav li tus Tswv teem tseg los ntawm cov neeg dawbhuv tej lus taij thov.
Tus uas nquag tshawb nrhiav Vajluskub tiamsis tub nkeeg thov Vajtswv ces tsuas yog nws nrhiav kom paub Vajluskub xwb, tsis yog nrhiav tus Tswv tiag. Thiab, tus uas kub siab lug thov Vajtswv tiamsis tsis nyeem thiab tsis kawm Vajtswv Txojlus ces yog nrhiav Vajtswv raws kev xav xwb. Cia li nyeem Vajtswv Txojlus thiab kub siab lug thov Vajtswv ib yam li Daniyees tus qauv.
Peb puas pheej tshawb nrhiav Vajtswv Txojlus thiab kub siab lug thov Vajtswv?
Tus Tswv, thov pab nyuam yaum xam pom txog ob yam tseemceeb uas tseg tsis tau, ntawd yog kawm Koj Txojlus thiab taij thov Koj. Thov koj pub nyuam yaus muaj lub siab nyiam Koj Txojlus thiab xav txuas lus nrog Koj. Amees.
Nyeem Vajluskub hauv peb lub xyoos: Phau Ntawv Nkauj 119:1-48
Kênh Youtube BHKTHN:
