Klei Aê Diê Blŭ: Y-Đaniel 9:1-3
Êlan kliăng: “Snăn kâo wir ƀô̆ phă Khua Yang Aê Diê čiăng duah Ñu hŏng klei wah lač leh anăn klei kwưh hŏng klei kăm ƀơ̆ng huă leh anăn hơô klŭng ƀui hbâo.” (Y-Đaniel 9:3).
Klei êmuh ksiêm mĭn: Ya klei yuôm hŏng khua pô hưn êlâo Y-Đaniel hlăk “Thŭn tal sa Y-Đarius anak êkei Y-Ausêrus găp djuê phung Mêdơ”? Ya klei ñu ngă leh hlăm klei truh anăn? Si drei ngă čiăng dưi kjăp phĭt hriăm Klei Aê Diê Blŭ leh anăn jih ai tiê wah lač msĕ si rup bi hmô mơ̆ng khua pô hưn êlâo Y-Đaniel?
Y-Đaniel 9 kčưm dơ̆ng hŏng klei kñăm dua blư̆ hlăk “thŭn tal sa Y-Đarius”, “thŭn tal sa ñu kiă kriê anăn” (êlan 1-2). Anăn jing thŭn 539 Êlâo kơ Krist, thŭn čar Ƀaƀilôn lĕ hlăm kngan phung Mêdơ-Persơ, djŏ msĕ si klei khua pô hưn êlâo Aê Diê hưn hlăm kdrêč 8. Jing sa čô khua prŏng hlăm sang mtao Ƀaƀilôn jih mkrah gưl ênuk, anei jing sa klei truh mlih prŏng hŏng khua pô hưn êlâo Y-Đaniel, kyua amâo djŏ jing klei bi mlih khua hrô anôk jhưng mtao msĕ si yang đar ôh, ƀiădah jing klei bi mlih jhưng mtao kiă kriê jih lăn ala, čar Ƀaƀilôn ară anei tŭ klei kiă kriê mơ̆ng sa čô mtao “găp djuê phung Mêdơ” (êlan 1).
Hĭn kơ pô mkăn, khua pô hưn êlâo thâo săng leh anăn ƀuh klă hĭn si klei Klei Aê Diê Blŭ hưn leh êlâo anăn hlăk hlê dôk bi sĭt. Hlăm klei truh anăn, ñu ksiêm “hdruôm hră klei Yêhôwa blŭ leh” čiăng “thâo săng”; tơdah thâo săng leh ñu “wir ƀô̆ phă Khua Yang Aê Diê”, “duah, wah lač, kwưh hŏng klei kăm ƀơ̆ng huă, hơô klŭng leh anăn ƀui hbâo” (êlan 2-3). Blŭ mdê, ƀuh klei hƀuê ênuk bi mlih, ƀuh bruă kngan Aê Diê dôk ngă, ktang hĭn mơh mtrŭt ñu duah čiăng thâo săng klei Aê Diê čiăng mơ̆ng hdruôm hră Klei Aê Diê Blŭ, leh anăn tuh êyuh ai tiê kơ Khua Yang hŏng klei hur har wah lač. Dlăng Klei Aê Diê Blŭ đru ñu thâo săng klei Aê Diê ƀuăn leh anăn čiăng. Thâo săng Klei Aê Diê Blŭ atăt ñu truh kơ knuih hur har, sĭt klă leh anăn tuh êyuh ai tiê hlăm klei wah lač.
Mâo pô knŏng khăp dlăng leh anăn hriăm Klei Aê Diê Blŭ, pioh lu mmông snăk leh anăn hur har ksiêm lu hră mblang mdê bi klei blŭ, tui duah ya klei thâo săng ka klă, dlăng lu hdruôm hră mblang Klei Aê Diê Blŭ, ksiêm lu mta hră čih kơ klei đăo… Bi đa mâo mơh pô knŏng uêñ kơ klei hur har wah lač hruê mlam. Khua pô hưn êlâo Y-Đaniel ngă jih dua mta bruă anăn. Ñu amâo dlăng Klei Aê Diê Blŭ tŭ kơ leh ôh. Ñu amâo duah sa êlan Klei Aê Diê Blŭ čiăng mă yua kơ ñu leh anăn kơ klei truh kơ ñu ôh, ƀiădah amâo uêñ kơ klei thâo săng êlan Klei Aê Diê Blŭ anăn djŏ hŏng klei truh amâodah hơăi ôh. Ñu kăn hmăng kơ bi bŏ klei mĭn ñu hŏng klei knhâo mơ̆ng Klei Aê Diê Blŭ leh anăn mjưh hĕ mơ̆ng anăn rei, ƀiădah ñu tui ksiêm kjăp phĭt, leh anăn bruă ksiêm anăn atăt ñu kơ klei čuôn kơŭt wah lač. Ñu đăo Khua Yang mơak srăng bi truh sĭt ya klei Ñu čuăn leh hŏng klei phung doh jăk Ñu wah lač.
Sa čô khăp ksiêm Klei Aê Diê Blŭ ƀiădah alah wah lač jing mnuih knŏng duah klei knhâo mơ̆ng Klei Aê Diê Blŭ, amâo djŏ tui duah Khua Yang ôh. Bi klăk hŏng klei anăn, sa čô knŏng hur har wah lač ƀiădah amâo dlăng leh anăn hriăm Klei Aê Diê Blŭ hŏng klei kjăp phĭt ôh, jing mnuih knŏng tui duah klei bi bluh ai tiê ñu. Brei drei hriăm Klei Aê Diê Blŭ leh anăn hur har wah lač msĕ si rup bi hmô mơ̆ng khua pô hưn êlâo Y-Đaniel.
Si ngă drei khăng ksiêm dlăng Klei Aê Diê Blŭ leh anăn tuh êyuh ai tiê drei hŏng Khua Yang mơ̆?
Wah lač: Ơ Khua Yang, akâo Ih brei kâo ƀuh dua mta klei yuôm amâo dưi kƀah ôh, jing klei hriăm Klei Aê Diê Blŭ leh anăn wah lač. Akâo Khua Yang kiă kriê ai tiê kâo khăp kơ Klei Aê Diê Blŭ nanao leh anăn khăp snăk blŭ hrăm hŏng Ih.
Dlăng Klei Aê Diê Blŭ hlăm tlâo thŭn: Klei Mmuñ Hđăp 119:1-48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
