Mathais 26:36-45
Nqe cim:
“Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis cev nqaij daim tawv qaug zog kawg li” (Mathais 26:41).
Lus nug rau sawvdaws xav:
- Tswv Yexus thov Leejtxiv yam dab tsi? Thiab kom Nws cov thwjtim yuav tsum ua li cas?
- Tswv Yexus qhia ua ntej rau Nws cov thwjtim paub txog yam dab tsi?
- Vim li cas peb yuav tau ceevfaj thiab thov Vajtswv?
- Peb tabtom ceevfaj thiab thov Vajtswv zoo li cas?
Ib tsoom mloog txhua tus,
Hauv ncua caij nyoog nco txog Tswv Yexus raug kev txomnyem, peb sawvdaws rov los xav txog Tswv Yexus kev twb taubhau nrog qhov uas Nws yuav raug tej neeg txhaum tuaj ntes thiab coj mus tua. Tom qab Yexus nrog cov thwjtim noj pluas hmo kawg tas (Mathais 26:17-29), Tswv Yexus nrog Nws cov thwjtim mus rau ntawm lub vaj Khexemanes thiab thov Leejtxiv hais tias: “…Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua li koj lub siab nyiam xwb” (nqe 39). Tswv Yexus cov lus thov lub ntsiab hais tias, “yog muaj dua lwm txoj kev pab tau kom kuv txhob haus lub khob iab khob daw ces thov Txiv Koj pab qhia, tiamsis yog tsis muaj dua lwm txoj kev txawv, uas yuav tsum raug tuag saum ntoo khaublig xwb ces thov ua raws li Koj siab nyiam”. Txawm hais tias twb taubhau rau kev tuag saum ntoo khaublig yog ib txoj kev tuag uas txaus ntshai heev los, Tswv Yexus mloog ua raws li Leejtxiv siab nyiam.
Tswv Yexus siv zog tawm tsam los ntawm kev thov Vajtswv thiab Nws kuj xav kom cov thwjtim ua ib yam li Nws ua. Tswv Yexus nqua hu Nws cov thwjtim hais tias,“…nej cia li nrog kuv nyob ntawm no tsis txhob tsaug zog” (nqe 38), “Nej twb yoo tsis taus dab ntub nrog kuv nyob ib txoos teev li los!” (nqe 40), thiab hais tias;“Nej tseem yuav tsaug zog thiab so kom txaus tso los!” (nqe 45). Tswv Yexus xav kom Nws cov thwjtim yuav tau tsim thiab ceevfaj thov Vajtswv pab lawv, ua li ntawd lawv thiaj tsi poob rau kev sim siab.
Tej ncua sijhawm uas ntsib kev txomnyem, tej zaum peb xav paub yam yuav tshwm tuaj, lossis xav paub lub vim chiv yog ua cas peb thiaj raug txomnyem. Tswv Yexus paub meej tej yam yuav muaj tuaj raug rau Nws thiab paub meej lub vim chiv uas Nws raug kev txomnyem huv tibsi. Txawm li ntawd los, thaum twb taubhau nrog tej kev txomnyem yuav muaj tuaj, Tswv Yexus siv zog thov Leejtxiv pab kom ua tau raws li Leejtxiv siab nyiam. Peb puas txaus siab “cia ua raws li Leejtxiv siab nyiam”? Kom yuav hais tau li Tswv Yexus, peb yuav tsum cia siab ruaj khov rau tej uas Vajtswv npaj tseg lawm yeej yog yam zoo, nco ntsoov ceevfaj thiab thov Vajtswv. Tej kev dag ntxhias yuav tuaj sim peb siab thaum peb tsis nco ceevfaj tawm tsam tej ntawd. Thov Vajtswv yog tes haujlwm tseemceeb, vim qhov ntawd yog los vam khom Vajtswv lub fwjchim, yuav ua rau peb muaj zog txaus los tawm tsam dab ntxwjnyoog tej fwjchim. Tswv Yexus kuj paub zoo peb kev tsis muaj zog thaum Nws hais tias: “Lub siab mas kub lug, tiamsis cev nqaij daim tawv qaug zog kawg li” (nqe 41), nimno Tswv Yexus yeej tseem thov Leejtxiv pab tej uas peb tsis muaj zog txaus. “Twb yog vim li ntawd, nws thiaj pab tau cov neeg uas nws coj los cuag Vajtswv, tsis hais nimno lossis yav tom ntej, rau qhov nws muaj sia nyob mus ibtxhis thiab thov Vajtswv pab cov neeg ntawd” (Henplais 7:25).
Thov Vajtswv,
Tus Tswv kev hlub, nyuam yaus paub Koj txoj kev txomnyem raug mob uas Koj tiv saum ntoo khaublig yog vim nyuam yaus. Thov Koj pab kom nyuam yaus nco ntsoov ceevfaj thiab thov Leejtxiv kom nyuam yaus tau lub fwjchim ntawm Vajtswv los ua lub neej muaj yeej txhua hnub. Amees.
Ib tsoom cov mloog uas hmov thiab tshua,
Peb puas nco ntsoov ceevfaj thiab thov Vajtswv?
Nyeem Vajluskub hauv peb lub xyoo: Yauj 18:1-19:20
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
