Klei Aê Diê Blŭ: Klei Mphŭn Dơ̆ng 4:8-16
Êlan kliăng: “Đăm jing msĕ si Y‑Kain ôh, pô kbiă hriê mơ̆ng yang jhat leh anăn bi mdjiê hĕ adei ñu. Ya ngă ñu bi mdjiê gơ̆? Kyuadah bruă ñu pô jing jhat leh anăn bruă adei ñu jing kpă.” (I Y‑Yôhan 3:12).
Klei êmuh ksiêm mĭn: Ya klei Aê Diê êmuh Y‑Kain leh ñu ngă soh? Si ñu lŏ wĭt lač? Klei ñu wĭt lač brei drei ƀuh si ngă knhuang klei soh bi hmăi kơ ñu?
Lu mnuih mĭn Y‑Kain bi mdjiê adei ñu jing klei ngă bluh ai bhiâo rit kyua tŭ klei Aê Diê wĭt lač amâo mtăp mđơr, ƀiădah Yang Mngăt Jăk brei leh klei wĭt lač kơ drei tơdah ñu lač Y‑Kain bi mdjiê adei ñu kyuadah bruă ñu ngă jing jhat, leh anăn bruă Y‑Aƀel ngă jing jăk (I Y‑Yôhan 3:12b). Snăn klă leh bruă myơr mnơ̆ng ngă yang Y‑Kain amâo djŏ ôh, jing klei soh. Mta phŭn jing si ngă Y‑Kain thâo klei soh leh anăn Aê Diê hưn êlâo leh brei ñu răng ƀiădah ăt ñu bi mdjiê Y‑Aƀel mơh? Kyuadah Y‑Kain jing pô kbiă hriê mơ̆ng yang jhat (I Y‑Yôhan 3:12a). Pô kkiêng ti lăn ala tal êlâo hĭn bi mdjiê pô kkiêng tal dua ti lăn ala jing adei ñu pô, anei jing bruă ngă mơ̆ng mnuih jing hlŭn kơ klei soh!
Klei Y‑Kain khăng ai tiê bi êdah sa klei sĭt kơ anak mnuih jing dŏ yang jhat, amâodah jing dŏ Aê Diê. Y‑Kain thâo kral Khua Yang, hmư̆ Ñu blŭ, myơr mnơ̆ng ngă yang kơ Ñu ƀiădah Aê Diê amâo jing Khua Yang ñu ôh kyuadah ñu amâo gưt asăp Khua Yang ôh, kyuanăn ñu jing anak yang jhat, čiăng lač jing hlŭn kơ klei soh (II Y‑Pêtrôs 2:18-19; Rôm 6:16). Klei Y‑Kain khăng ai tiê amâo djŏ knŏng bi êdah hlăm klei ñu bi mdjiê Y‑Aƀel ôh ƀiădah wăt hlăm klei ñu wĭt lač kơ klei jăk leh anăn klei pap Aê Diê hlăk Aê Diê duah ñu leh ngă soh (êlan 9). Klei Y‑Kain wĭt lač hŏng Khua Yang jing sa klei blŭ luar ngơ ngăr čiăng hngah bruă klam ñu. Knhal tuč, mta klei Y‑Kain uêñ knŏng kơ klei hdĭp ñu pô đuč, amâo mâo sa mta klei bi êdah kơ ñu mâo klei kmhal ôh (êlan 13-14). Ñu hngah leh klei kmhal kơ klei soh!
Drei ƀuh klă klei bi hmăi huĭ mduĭ mơ̆ng klei soh kơ anak mnuih si jing. Tal êlâo, Y‑Ađam leh anăn H’Êwơ knŏng bi mplĕ êlư klei soh hdơ̆ng diñu (Klei Mphŭn Dơ̆ng 3:9-13), ƀiădah knŏng sa wưng ênuk, klei soh đĭ dlông hĭn leh, Y‑Kain amâo djŏ knŏng hngah kơ klei soh ñu ƀiădah wăt jhŏng luar hŏng Aê Diê mơh. Kdlưn hĭn dơ̆ng, ñu mklăk êmuh wĭt: “djŏ mơ̆ kâo jing pô răng kriê kơ adei kâo?” Anei jing klei êmuh tal êlâo mơ̆ng djuê mnuih čiăng lông dlăng Aê Diê leh anăn Klei Aê Diê Blŭ čih yăl dliê wĭt. Klei soh ƀrư̆ hruê ƀrư̆ đĭ hĭn hlăm djuê ana Y‑Ađam, tơl jing “êlan Y‑Kain”, amâodah hdră êlan hdĭp lu mnuih tui (Y‑Yut 11a)
Wăt tơdah tlă anăp hŏng sa čô mnuih jhat ƀai leh anăn khăng kŏ msĕ si Y‑Kain dưn ƀiădah Aê Diê ăt bi êdah klei pap tơdah răng mgang ñu (êlan 15). Hmăng hmưi drei thâo kral nanao klei Aê Diê pap čiăng êran nao kmhal hưn klei soh grăp blư̆ ngă soh čiăng bi knal klei Ñu pap brei klei soh (I Y‑Yôhan 1:9).
Ya klei mñă kơ drei mơ̆ng klei hriăm kơ Y‑Kain tơdah grăp blư̆ drei ngă soh?
Wah lač: Ơ Khua Yang, akâo Ih pap brei kơ kâo. Kâo ƀuh klei ktang huĭ mduĭ mơ̆ng klei soh. Akâo kơ Ih bi mtlaih kâo mơ̆ng klei jhat ƀai, leh anăn akâo kơ Ih brei kâo mâo ai tiê thâo kmhal sĭt êmĭt ti anăp klei khăp klei gĭr Ih.
Dlăng Klei Aê Diê Blŭ hlăm tlâo thŭn: Y‑Êsra 10:18-44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
https://www.youtube.com/c/bhkthn
