I Xamuyees 15:1-9; 19-23

Nqe cim:

“Mloog tus Tswv lus zoo dua qhov uas muab tej yaj zoo nkauj tua fij rau nws.  Tus neeg uas ntxeev siab rau tus Tswv ua txhaum loj ib yam li tus uas txawj tso dab, thiab tus neeg uas tawv ncauj ua txhaum loj ib yam li tus uas pe mlom” (I Xamuyees 15:22b-23a).

Lus nug rau sawvdaws xav:

• Thaum los ua vajntxwv, Xa-ules tau ua tej yam kev txhaum twg?
• Txhua zaus ua txhaum, Xa-ules hais daws nws zaj licas?
• Nqi zog thaum Xa-ules tsis lees kev txhaum yog dabtsi?
• Zaj kawm no qhia rau peb txog yam dabtsi?

I Xamuyees tshooj 13 hais txog thawj yam uas vajntxwv Xa-ules ua txhaum yog nws xwb tim tua tsiaj hlawv fij rau tus Tswv tsis tos Xamuyees tuaj ua. Thaum Xamuyees nug vim licas vajntxwv ua li ntawd ces nws teb hais tias: “Sawvdaws khiav zom zaws tso kuv tseg, thiab koj tsis tuaj raws li koj teem tseg; dua li ntawd, cov Filitees twb tuaj sib sau rau hauv lub nroog Mikemas lawm. Kuv thiaj xav hais tias, cov Filitees yeej yuav tuaj tua kuv hauv lub nroog Nkilenkas no, thiab kuv tseem tsis tau ua ib yam dabtsi kom tus Tswv pab kuv. Yog li ntawd, kuv thiaj xav hais tias cia kuv muab tsiaj tua fij rau tus Tswv” (I Xamuyees 13:11-12). Hauv tshooj 15, vajntxwv rov qab ua txhaum zaum ob ntxiv yog tsis tua cov Amalej li tus Tswv hais. Tiam vajntxwv Xa-ules kav, cov neeg Amalej uas yog Exaus cajces ua phem kawg nkaus thiab tsiv heev, yog li ntawd tus Tswv samhwm rau vajntxwv Xa-ules yuav tsum tua haivneeg no tu noob, tua lawv tej nyuj, yaj, ntxhuav thiab neesluav kom tuag tas zoo ib yam li hlais qhov mob hauv lub cev mus tagnrho, tsis txhob tseg ib yam dabtsi ua hiam tus Tswv haivneeg (nqe 2-3). Tiamsis vajntxwv Xa-ules tsis tua cov Amalej tus Vajntxwv Ankas, nws tseem tseg tej yaj thiab nyuj uas zoo los ua nws tug, tsuas muab cov tsis zoo nkauj thiab tsis muaj nqis tua xwb. Thaum Xamuyees nug tej ntawd, vajntxwv Xa-ules tsis lees kev txhaum tiamsis nws tseem cam hais tias nws twb ua raws li tus Tswv tej lus samhwm tseg, nws tseem liam txim hais tias sawvdaws tseg cov tsiaj ntawd cia yuav muab tua ua kevcai fij rau tus Tswv thiab (nqe 21).

Ob zaug uas ua txhaum no vajntxwv Xa-ules tsis lees txim, tiamsis nws pheej hais daws nws zaj tas zog xwb. Thawj zaug nws liam hais tias Xamuyees tuaj lig, nws txhawj txog cov pejxeem yog li nws thiaj tua tsiaj fij ua ntej lawm. Ua txhaum zaum ob, tsis yog liam txim rau sawvdaws xwb nws tseem siv kevcai dawbhuv los hais daws nws zaj txog khaws tej tsiaj zoo yuav ua khoom fij rau tus Tswv! Vajntxwv Xa-ules xav hais tias nws yuav dag tau tus cevlus Xamuyees thaum hais li ntawd, tiamsis vajntxwv tsis nco lawm hais tias tus Tswv yog tus uas paub txhua yam, tej lus uas vajntxwv tsis tau hais tawm tus Tswv twb paub huvsi (Phau Ntawv Nkauj 139:4). Nqi zog ntawm qhov uas tsis mloog li tus Tswv hais, tawv ncauj tsis lees kev txhaum ces raug tus Tswv tso tseg thiab tsis tau ua vajntxwv kav cov neeg Yixalayees ntxiv lawm (nqe 23).

Tibneeg tus yamntxwv thaum ua txhaum ces pheej nrhiav tswvyim los daws nws zaj tsis yeem lees kev txhaum, tsis yeem tso kev txhaum tseg, yog li ntawd thiaj tsis tau txais kev zam txim. Vajtswv paub txhua yam, nws paub tej kev txhaum uas peb ua zais nkoos huv tibsi tiamsis Nws xav kom peb nyias lees nyias tej kev txhaum tas siab, tso kev txhaum tseg ,ces Nws yuav zam txim thiab kho peb dua tshiab.

 Tus Tswv, nyuam yaus ua Koj tsaug vim Koj Txojlus hais khov kho hais tias, txawm yog nyuam yaus tej kev txhaum yuav liab cuag ntshav los Koj yuav ntxuav kom dawb paug li tej plaub yaj. Thov Koj pab nyuam yaus kam lees kev txhaum thiab tso kev txhaum tseg thiaj tau Koj zam txim thiab txais tau koob hmoov. Amees.

Peb puas kam lees kev txhaum thiab tso kev txhaum tseg tiag tiag?

Nyeem Vajluskub hauv peb lub xyoo: Exalas 7

Phab Xa Suab Lus nrog rau Phab Cob Qhia Tus Ntseeg koom tes txhim muaj.

Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com

Tshooj Youtube BHKTHN: https://www.youtube.com/c/bhkthn