Yelemis 29:24-32
24 – 25 Tus Tswv uas yog cov Yixalayees tus Vajtswv uas muaj hwjchim loj kawg nkaus kom kuv hais rau Semayas uas yog neeg Nehelas sau ib tsab ntawv swam nws lub npe xa mus rau cov pejxeem uas nyob hauv lub nroog Yeluxalees thiab xa mus rau tus povthawj Xefaniyas uas yog Ma-axeyas tus tub thiab cov povthawj txhua tus hais tias, 26 “Tus Tswv tsa koj ua povthawj hloov Yehauyadas chaw, thiab nimno koj yog tus thawj uas saib tus Tswv lub Tu.amtsev; koj cia li ntes txhua tus neeg vwm uas ua txuj ua tus cevlus, muab saw hlau khi nws thiab muab cuab hlau cuab nws cajdab. 27 Vim li cas koj tseem tsis ua li ntawd rau Yelemis uas nyob hauv Anathaus uas pheej cev Vajtswv lus rau sawvdaws? 28 Koj cia li txwv nws, vim nws tau sau ntawv xa tuaj rau cov uas nyob tim tebchaws Npanpiloos no hais tias lawv yuav nyob tim no ntev; kom lawv cia li ua vaj ua tsev nyob, ua liaj ua teb thiab cog txiv hmab txiv ntoo noj.”
29 Tus povthawj Xefaniyas nyeem tsab ntawv no rau kuv mloog, 30 ces tus Tswv hais rau kuv hais tias, 31 – 32 koj cia li sau ib tsab ntawv xa mus rau cov pejxeem uas raug ntes mus rau tebchaws Npanpiloos uas tus Tswv hais txog Semayas uas yog neeg Nehelas hais tias, “Kuv tsis tau txib Semayas tuaj cevlus rau nej, nws cia li tuaj cevlus li uas nws yog tus cevlus kom nej ntseeg nws tej lus dag. Kuv yuav rau txim rau Semayas thiab nws cov xeebntxwv, nws yuav tsis tshuav ib tug xeebntxwv ua neej nrog nej nyob thiab nws yuav tsis pom tej yam zoo uas kuv ua rau kuv haivneeg, rau qhov nws qhia kom lawv ntxeev siab rau kuv. Kuv yog tus Tswv uas hais li ntawd.”
Nqi cim:
“Tsis txhob nrhiav lus tsis tseeb liam lwm tus, thiab tsis txhob tua cov neeg uas tsis muaj txim dab tsi pov tseg. Kuv yuav rau txim rau txhua tus uas ua phem ntawd” (Khiavdim 23:7).
Lus nug rau sawvdaws xav:
- Semayas yog leejtwg?
- Semayas ua dabtsi rau haiv neeg Yixalayees?
- Tus Tswv ua licas rau tej uas Semayas ua?
- Koj yuav tsum ua licas thiaj tsis poob rau cov cevlus cuav tej lus dag ntxias?
Semayas yog ib tug cevlus cuav uas raug ntes mus rau tim tebchaws Npanpiloos ncaj xyoo 597 UY. Hauv nqe 24 hais tias Semayas yog neeg Nehelas.
“Nehelas” yog npe hu rau ib thaj tsam lossis tej zaum yog Xibfwb Yelemis siv lus zais los hais, vim raws li lus Henplais ces lub suab Helas txhais hais tias “npau suav” uas tau hais ua ntej hauv nqi 8 los txob thuam txog Semayas, kom cov Yixalayees txhob mus mloog tej lus dag ntxias ntawd (Yelemis 27:9).
Qhov tseeb tiag, tej yam uas Semayas ua qhia tshwm meej hais tias nws yog ib tug cevlus cuav. Semayas muab nws lub npe suam rau nws tsab ntawv xa rau cov pejxeem hauv Yeluxalees thiab cov povthawj, dag hais tias tus Tswv tsa nws ua povthawj hloov Yahauyadas chaw ua povthawj, yog tus saib Vajtswv lub Tuamtsev thiab yog tus sawv cev ntawm tus Tswv los ntes cov uas hais tias yog cov cev Vajtswv lus. Yog li ntawd, Semayas thiaj tawmtsam tej lus uas tus Tswv kom Yelemis sau tsab ntawv mus rau cov Yixalayees txog kev ua qhev tim Npanpiloos hais tias: “Lawv yuav nyob tim no ntev; cia li ua vaj tsev nyob, ua liaj ua teb thiab cog txiv hmab txiv ntoo noj” (nqi 28). Tus povthawj hlob Xefaniyas yog ib tug ntawm cov uas Semayas twb sau ntawv nqua hu kom yaum lwm tus nrog tawmtsam thiab dag ntxias sawvdaws, yog tus coj Semayas tsab ntawv mus nyeem rau Yelemis mloog (nqi 25, 29). Vim Semayas tej lus dag ntxias ua rau tus Tswv haiv neeg mus ntseeg raws tej lus dag tsis muaj tseeb (nqi 31), tus Tswv thiaj tawm lus rau txim rau Semayas thiab nws tsev neeg kom tsis muaj ib tug tau nrog tus Tswv haiv neeg nyob thiab tau pom tej yam zoo uas tus Tswv ua rau nws haiv neeg (nqi 32).
Ib zaug ntxiv uas peb rov ntsib nqi lus “Kuv tsis tau txib Semayas tuaj cevlus rau nej” (nqi 31) yog lo lus uas tus Tswv tsis lees paub cov uas tsis yog tus Tswv tug. Tej zaum tus Tswv tej lus hauv Yelemis tsab ntawv tsis ua rau Vajtswv haiv neeg muaj kev zoo siab nyob ncua sijhawm ntawd, tiamsis mloog tus Tswv lus yuav pab tau lawv pom yam zoo uas tus Tswv ua rau nws haiv neeg (nqi 32). Tiamsis cov cevlus cuav yuav nplig cov pejxeem siab los ntawm tej lus dag tsis tseeb thiab kev kaj siab ib ntu ntawm qhov muag pom. Yog li ntawd, tus Tswv haiv neeg yuav tau feeb meej kom zeem paub qhov twg yog tus Tswv lus thiab leejtwg yog Vajtswv tus neeg. Niaj hnub nimno tus Tswv tej lus muaj pub rau peb meej meej nyob hauv phau Vajluskub. Cia li nyeem, kawm xyaum thiab ua raws Vajtswv Txojlus qhia txhua hnub, kom peb tsis poob rau cov cevlus cuav tej lus haub ntxias.
Koj yuav xaiv yam muaj nqis ibtxhis lossis xaiv yam zoo mloog ib ntus ntawm qhov muag pom ntsoov?
Thov Vajtswv:
Vajtswv tus uas ncaj ncees thiab muaj kev hlub! Nyuam yaus zoo siab vim pom Koj saib xyuas, pov puag Koj haiv neeg zoo kawg. Thov pab nyuam yaus txawj txuas nrog Koj Txojlus, mloog raws li koj tej lus samfwm kom tau pom yam zoo uas koj ua rau cov uas yog koj tug. Ameeg.
Email: kawmvajluskubtxhuahnub@gmail.com
Kênh Youtube BHKTHN:
