Daniyees 4:29-33
29 Tom qab ntawd kaum ob lub hlis, muaj ib hnub vajntxwv ncig mus ncig los saum nws lub tsev uas nyob hauv lub nroog Npanpiloos. 30 Vajntxwv hais tias, “Lub nroog Npanpiloos no yog lub nroog uas loj kawg kuv tsim lub nroog no ua kuv lub tuamceeb nroog kom sawvdaws thiaj pom kuv lub hwjchim, kuv lub meejmom thiab kuv lub koob lub npe.”
31 Thaum vajntxwv tseem hais lus tsis tau xaus, txawm muaj ib lub suab hais nrov ntxhe ntws saum ntuj tuaj hais tias, “Vajntxwv Nenpukajnexales, koj cia li mloog kuv hais! Kuv twb txo koj lub hwjchim, koj yuav tsis tau ua vajntxwv kav tebchaws lawm. 32 Luag yuav muab koj ntiab tawm tsis pub koj nrog neeg nyob, koj yuav mus nrog tej tsiaj nruab nrag nyob ua ke, koj yuav noj zaub ib yam li tej nyuj mus txog xya xyoo. Tom qab ntawd koj yuav lees hais tias Vajtswv tus uas muaj Hwjchim Loj kawg nkaus yog tus kav tej tebchaws uas sawv vajntxwv kav, thiab Vajtswv tsa neeg ua vajntxwv raws li nws pom zoo.”
33 Tamsim ntawd txawm muaj raws tej lus no. Luag cia li muab Vajntxwv Nenpukajnexales ntiab khiav tsis pub nws nrog neeg nyob thiab nws mus noj zaub li nyuj noj. Nws lub cev ntub lwg ntsuav, nws cov plaubhau ntev ib yam li tis dav, thiab nws cov rau tes ntev ib yam li tej rau noog.
Nqi cim:
“Vajtswv tus uas muaj fwjchim Loj kawg nkaus, nws muaj hwjchim loj dua tej tebchaws uas neeg ua vajntxwv kav, thiab nws xav tsa leejtwg ua vajntxwv kav tej tebchaws ntawd los tau; txawm yog tus ntse thiab tus ruam los nws yeej tsa tau.” (Daniyees 4:17b).
Lus nug rau sawvdaws xav:
- Yam dabtsi ua rau vajntxwv Nenpukajnexales uas muaj fwjchim raug mus nrog tej tsiaj nruab nrag nyob ua ke?
- Vim licas nws tsis dim dhau tej teebmeem no txawm nws twb tau ceebtoom ua ntej lawm?
- Yuav ua licas peb thiaj nco tau tej zaj uas tus Tswv twb qhia peb lawm?
Nenpukajnexales yog ib tug vajntxwv uas kawm qeeb, hnov qab sai sai. Tomqab uas tau tus cev lus Daniyees rov piav thiab txhais zaj npau suav, vajntxwv tau tawm lus hais tias: “Koj tus Vajtswv yog tus uas muaj fwjchim loj dua tej vajtswv, nws yog tus TSWV uas kav tagnrho tej vajntxwv…” (Daniyees 2:47a). Tiamsis tomqab ntawd, zoo li uas vajntxwv tsis nco qab hais tias, Vajtswv yog tus Tswv ntawm tej vajntxwv. Vajntxwv ua tau ib tug mlom, thiab tawm lus hais tias yuav muab cov neeg uas tsis pehawm tus mlom ntawd pov rau hauv qhov cub hluav taws.
Nws hais tias “tus timtswv twg yuav pab nej dim hauv kuv txhais tes? (Daniyees 3:15b-HMONGSV). Tiamsis tomqab uas pom Vajtswv cawm tau peb tug neeg Henplais lawm, nws ho rov tsa ncauj qhuas Vajtswv dua (Daniyees 3:28).
Zaj xwm yuav hais hauv hnub no yog tshwm muaj rau ntau xyoo tomqab zaj xwm qhov hluav cub taws. Lub sijhawm ntawd, vajntxwv Nenpukajnexales tau kovyeej nws cov yeebncuab huv tibsi lawm (nqi 4), vajntxwv kuj txhim kho thiab ua tau ntau lub nroog tshiab, nto koob nto npe heev nyob rau ncua caij nyoog ntawd. Vajtswv yeej paub zoo txog Nenpukajnexales, tiamsis los ntawm txojkev hlub, Vajtswv tau qhuab ntuas tus vajntxwv khav theeb no ob zaug kom nws zeem paub hais tias “Vajtswv tus uas muaj fwjchim Loj kawg nkaus, nws muaj fwjchim loj dua tej tebchaws uas neeg ua vajntxwv kav, thiab nws xav tsa leejtwg ua vajntxwv kav tej tebchaws ntawd los tau; txawm yog tus ntse thiab tus ruam los nws yeej tsa tau.” (nqi 17, 25). Txij li nqi 22-26 yog Vajtswv tej lus hais rau tus vajntxwv uas yog lwm haiv neeg nyob txawv lub tebchaws no. Cov Yixalayees tus Vajtswv tsis yog tsuas qhia rau vajntxwv paub txog tej uas yuav muaj los yav tomntej xwb, Vajtswv tseem qhia ua ntej thiab ceebtoom tuav nkaus vajntxwv lub npe txog tej yam uas yuav tshwm los raug nws.
Xav hais tias dhau ntau zaus uas Vajtswv qhia tshwm Nws tus kheej rau vajntxwv thiab qhuab ntuas vajntxwv lawm, ces vajntxwv yuav tsis ua neeg ruam npuaj hauv siab hu npe lawm. Tiamsis tsuas muaj kaum ob lub hli tomqab xwb, vajntxwv txawm tsis nco qab ceevfaj lawm. Muaj ib hnub vajntxwv ncig mus ncig los saum nws lub tsev uas nyob hauv lub nroog Npanpiloos, nws saib mus rau txhua yam uas nws ua tau, thiab nws txawm khav theeb (nqi 29-30). Yog li ntawd, tej lus ceebtoom rau vajntxwv txawm muaj tiav li hais tseg. Vajntxwv raug “ntiab khiav tsis pub nws nrog neeg nyob thiab nws mus noj zaub li nyuj noj. Nws lub cev ntub lwg ntsuav, nws cov plaubhau ntev ib yam li tis dav, thiab nws cov rau tes ntev ib yam li tej rau noog.” (nqi 33).
Tu siab kawg li, vajntxwv Nenpukajnexales yeej muaj sijhawm yuav dim dhau tej teebmeem yuav los raug nws. Tiamsis vajntxwv rov raug kawm dua zaj qub los ntawm kev khwv thiab raug poob ntsej muag heev dua qub. Niaj hnub nimno, Vajtswv tseem ua siab ntev ceebtoom peb ntau zaus dhau ntawm Vajtswv Txojlus, los ntawm Vaj Ntsujplig qhuab ntuas, los ntawm lub siab ua timkhawv qhia, thiab ntawm cov sawv cev uas Vajtswv txib los qhia. Thov Vajtswv qhia peb tsis txhob xaiv kawm zaj qub los ntawm txojkev txomnyem ib yam li tus vajntxwv no.
Peb yog cov uas kawm sai, kawm qeeb, lossis yog cov uas hnov qab sai sai Vajtswv tej lus qhuab ntuas?
Thov Vajtswv:
Vajtswv, muaj ntau yam Koj tau qhuab ntuas nyuam yaus ntau zaug tiamsis nyuam yaus kawm tsis tau. Thov Vaj Ntsujplig pab nyuam yaus txiavtxim siab pauv hloov kom xwv nyuam yaus thiaj tsis raug rov kawm zaj qub los ntawm txojkev txomnyem thiab mob siab. Ameeg.
Email: kawmvajluskubtxhuahnub@gmail.com
Kênh Youtube BHKTHN:
