Klei Aê Diê Blŭ: Y‑Đaniel 4:29-33
Êlan kliăng: “Pô Ti Dlông Hĭn kiă kriê hlăm ƀuôn ala mtao mnuih, leh anăn Ñu brei kơ hlei pô Ñu čiăng, leh anăn bi mđĭ mnuih hơăi mang hĭn brei kiă kriê.” (Y‑Đaniel 4:17b).
Klei êmuh ksiêm mĭn: Ya klei truh kơ mtao Nebukatnetsar mơ̆ng sa čô mtao bŏ hŏng kơhưm jing nao hdĭp hĕ hlăm kdrăn tač msĕ si hlô dliê? Si ngă ñu amâo dưi tlaih ôh mơ̆ng klei truh jhat anăn khădah hưn êlâo leh brei ñu răng? Si ngă čiăng kơ drei dưi hdơr dŭm klei hriăm Khua Yang mtô drei leh?
Nebukatnetsar jing sa čô mtao hriăm êmưt, wơr djăl. Leh hlăk khua pô hưn êlâo Y‑Đaniel lŏ yăl dliê wĭt leh anăn mblang brei klei ñu êpei, ñu hưn lač: “Sĭt nik Aê Diê ih jing Aê Diê kơ phung yang, Khua Yang kơ phung mtao” (Y‑Đaniel 2:47a). Ƀiădah êdei anăn, msĕ si ñu ka tuôm thâo kral ôh Aê Diê jing Khua Yang kơ phung mtao, ñu brei mdơ̆ng sa rup tuh, bi huĭ hlei pô amâo buôn kkuh kơ rup tuh anăn srăng bhĭr hlăm kpur pui, “leh anăn hlei yang dưi bi mtlaih diih mơ̆ng kngan kâo?” (Y‑Đaniel 3:15b). Êdei anăn leh ƀuh bruă Aê Diê bi mtlaih tlâo čô Hêbrơ hŏng klei yuôm bhăn, ñu lŏ myơr klei blŭ bi mni kơ Aê Diê (Y-Đaniel 3:28).
Klei yăl dliê hruê anei truh lu thŭn êdei kơ klei truh hlăm kpur pui trơ̆ng. Hlăk anăn, mtao Nebukatnetsar bi blah dưi leh hŏng jih jang phung roh (êlan 4), mtao bi leh jih bruă lŏ mdơ̆ng, mkra mjing lu hdrĭng bruă prŏng hing ang hlăm ênuk đưm. Aê Diê thâo săng klă klei jing mtao Nebukatnetsar, ƀiădah kyua klei pap, Ñu mñă leh dua blư̆ kơ mtao êjai dôk hlap ai hưn ktưn brei ñu thâo săng “Kơ Pô Ti Dlông Hĭn kiă kriê hlăm ƀuôn ala mtao mnuih, leh anăn ñu brei kơ hlei pô ñu čiăng, leh anăn bi mđĭ mnuih hơăi mang hĭn brei kiă kriê.” (êlan 17, 25). Dơ̆ng mơ̆ng êlan 22-26 jing Klei Blŭ Aê Diê pioh hjăn kơ mtao đăo kơ yang mkăn hlăm čar arăng. Aê Diê phung Israel amâo djŏ knŏng hưn bi êdah kơ mtao ƀuh klei jing ti lăn ala hlăm hruê ti anăp ôh, wăt Ñu hưn êlâo leh anăn mñă klă kơ klei hdĭp mtao pô hlăm hruê ti anăp.
Mĭndah leh lu blư̆ Aê Diê bi êdah leh Ñu Pô kơ mtao leh anăn mñă kơ mtao, snăn mtao amâo srăng mluk mgu pah đah da hưn ktưn kơ ñu pô ôh. Ƀiădah knŏng mrâo pluh dua mlan, ñu amâo lŏ mđing răng ôh. Êjai ñu êbat ti čuôr sang mtao, dlăng kơ bruă kngan ñu mdơ̆ng, mtao lŏ jing mgao (êlan 29-30). Kyuanăn, klei hưn êlâo brei răng pioh kơ mtao truh sĭt kơ mtao. “Arăng suôt ñu mơ̆ng ti krah phung mnuih; ñu ƀơ̆ng rơ̆k msĕ si êmô; asei mlei ñu msah hŏng êa nguôm mơ̆ng adiê tơl ƀŭk ñu čăt msĕ si mlâo siap tlang leh anăn kkâo ñu msĕ si kkâo čĭm” (êlan 33).
Jing ênguôt êdi yơh, kyuadah mtao Nebukatnetsar kluôm dhuôm dưi tlaih mơ̆ng boh truh hêñ mlâo anăn. Ƀiădah, mtao lŏ hriăm leh klei hriăm hđăp hŏng ênhă êlan dleh dlan leh anăn hêñ mlâo hĭn. Hruê anei, Aê Diê ăt dôk gĭr hưn êlâo brei drei răng lu blư̆ hŏng Klei Aê Diê Blŭ, Yang Mngăt Jăk kčŭt ai tiê, klei hưn mơ̆ng ai tiê kpă, mơ̆ng phung huĭ mpŭ Khua Yang tiŏ hriê. Akâo kơ Khua Yang mtô drei đăm ruah ôh klei hriăm hđăp leh hŏng ênhă êlan dleh dlan msĕ si mtao anei.
Si ngă drei jing pô hriăm pral, hriăm êmưt, amâodah djăl wơr klei Khua Yang mtô mtă?
Wah lač: Ơ Khua Yang, mâo lu mta klei Khua Yang mñă kơ kâo lu blư̆ ƀiădah kâo ăt ka dưi hriăm ôh. Akâo kơ Yang Mngăt Jăk đru kâo ktưn ai bi mlih čiăng kơ kâo đăm ôh hriăm hŏng ênhă êlan dleh dlan ruă knap.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 9:1-29
Kênh Youtube BHKTHN:
