Klei Aê Diê Blŭ: Y-Yôhan 14:1-4
Êlan kliăng:
“Đăm brei ai tiê diih rŭng răng ôh; đăo bĕ kơ Aê Diê, leh anăn đăo kơ kâo msĕ mơh” (Y-Yôhan 14:1)
Klei êmuh ksiêm mĭn: Ya klei dôk truh ti anăp phung ƀĭng kna Khua Yang Yêsu? Ya klei Khua Yang Yêsu lač hŏng diñu čiăng bi juh leh anăn bi mđĭ ai diñu? Si ngă drei mă yua klei mtô anei tơdah dôk ti anăp klei djiê truh kơ phung drei khăp hơiêng amâodah tơdah mĭn kơ klei djiê drei pô?
Phung ƀĭng kna dôk hlăm klei ênguôt êdu ai snăk kyuadah diñu amra bi ktlah hŏng Nai diñu khăp hơiêng jing Khua Yang Yêsu. Dơ̆ng mơ̆ng hlăk Khua Yang hưn kơ diñu thâo Ñu srăng tŭ klei knap mñai leh anăn klei djiê kyua klei soh mnuih, ai tiê klei mĭn diñu msĕ si dlưh dhiăp. Diñu ênguôt kyuadah amâo djŏ knŏng kơ klei Khua Yang dơ̆ng tŭ klei djiê ôh, ƀiădah wăt hŏng klei diñu bi mĭn kơ jih jang klei čang hmăng leh anăn hruê ti anăp diñu srăng ram luč mbĭt hŏng klei Khua Yang djiê.
Thâo săng kơ klei anăn, Khua Yang Yêsu bi juh diñu leh anăn brei kơ diñu sa klei čang hmăng mngač đrah. Khua Yang lač: “Đăm brei ai tiê diih rŭng răng ôh; đăo bĕ kơ Aê Diê, leh anăn đăo kơ kâo msĕ mơh” (êlan 1). Bi hrô bĕ kơ klei ênguôt hnĭng rŭng răng hŏng klei đăo kơ Aê Diê. Klei đăo kơ Aê Diê srăng mă mđuĕ hĕ klei rŭng răng ênguôt hnĭng wăt êjai tlă anăp hŏng klei djiê kyuadah Aê Diê jing Pô Hrih Mjing, Pô brei klei hdĭp kơ mnuih, leh anăn Pô dôk nanao hlŏng lar. Ăt brei đăo bĕ kơ Khua Yang Yêsu msĕ mơh kyuadah Ñu jing Aê Diê dôk ti krah phung drei. Khua Yang Yêsu hriê ti lăn ala jing klei kñăm knăl kơ klei sĭt suôr leh anăn klei khăp Aê Diê pioh brei kơ mnuih. Leh anăn tơdah Aê Diê jao Khua Yang Yêsu leh kơ mnuih, Ñu amâo srăng brei ôh hĕ kơ drei jih jang mnơ̆ng mbĭt hŏng gơ̆? (Rôm 8:32).
Khua Yang Yêsu lač kơ anôk Ñu srăng nao ăt jing anôk drei leh djiê srăng nao mơh, anăn jing “Sang Ama” (êlan 2). “Sang” jing rup lač kơ sa anôk sŭk suôr, khăp hơiêng, leh anăn “Ama” yơh jing phŭn, klei khăp, klei kơup mgang. Klei čang hmăng drei mâo tơdah tlă anăp hŏng klei djiê anăn jing klei Khua Yang Yêsu amâo djŏ ôh knŏng Ñu wĭt kơ “Sang Ama” ƀiădah wăt klei Ñu srăng “lŏ hriê leh anăn mă diih kơ kâo pô, čiăng kơ ti anôk kâo dôk diih dưi dôk msĕ mơh” (êlan 3). Phung đăo leh djiê amâo srăng čhuang mŭt hlăm sa anôk ƀuôn jăk ti adiê taih êgar ôh, ƀiădah nao wĭt kơ sa anôk tinăn dưi lŏ bi tuôm hŏng phung ayŏng amai adei mbĭt sa klei đăo, hŏng phung doh jăk mơ̆ng lu ênuk êgao, leh anăn boh nik nak dưi bi tuôm hŏng Khua Yang Yêsu khăp hơiêng, srăng dưi hdĭp mbĭt hŏng Ñu hlăm klei guh kơang nanao hlŏng lar.
Khua ƀĭng kna Y-Pôl yăl dliê leh hŏng phung đăo ti Philip snei: “Kyuadah Krist jing klei hdĭp kâo, leh anăn klei djiê jing tŭ dưn hĭn… Mâo dua nah klei kpĭ kâo: kâo čiăng đuĕ nao dôk mbĭt hŏng Krist, kyuadah klei anăn jing jăk hĭn. Ƀiădah yuôm hĭn kơ diih tơdah kâo ăt dôk hdĭp hlăm asei mlei” (Philip 1:21, 23-24). Akâo kơ Khua Yang brei kơ drei dôk êđăp ênang nanao wăt thâodah tlă anăp hŏng klei djiê, kyuadah thâo sĭt tơdah đuĕ nao dôk hŏng Yang Krist jing klei jăk hĭn snăk.
Si ngă drei mâo klei êđăp ênang mơ̆ tơdah mĭn kơ klei djiê drei pô?
Bi mni kơ Khua Yang brei leh kơ kâo klei bi mtlaih leh anăn kyua hŏng klei anăn yơh kâo dưi jing anak Ih, dưi hdĭp êđăp ênang, hơ̆k mơak amâo djŏ knŏng êjai ti lăn ala anei ôh ƀiădah wăt hlăm ênuk hlŏng lar.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
