Klei Aê Diê Blŭ: Klei Bi Hriêng 31:8-9
Êlan kliăng: “Ha ƀăng êgei ih blŭ kđi hŏng klei kpă mgang klei djŏ kơ phung knap mñai leh anăn ƀun ƀin” (Klei Bi Hriêng 31:9)
Klei êmuh ksiêm mĭn: Si klei amĭ mtao Y-Lemuêl mtă mtăn kơ mtao? Ya klei mtă mtăn anei kñăm kơ phung khua kiă kriê? Si drei mă yua klei anei kơ drei pô?
Klei Bi Hriêng kdrêč 31 jing klei mtă mtăn mơ̆ng amĭ mtao Y-Lemuêl. Drei amâo thâo ôh kơ mtao Y-Lemuêl. Jih dua ƀuôn ala mtao krĭng dhŭng leh anăn krĭng dưr amâo mâo ôh mtao mâo anăn Y-Lemuêl, jing sa anăn amâo djŏ phŭn mơ̆ng găp djuê Hêbrơ ôh. Hlăm dŭm êlan 3-7, amĭ mtao Y-Lemuêl brei kơ mtao dŭm klei mtă mtăn ghă amâo dưi ngă: Đăm ngă! Bi êlan 8-9 jing klei mtă mtăn hŏng klei mĭn jăk: Ngă bĕ!
Dŏng mgang bĕ “mnuih kmlô” leh anăn “phung amâo mâo pô đru”. “Mnuih kmlô” tinei amâo djŏ ôh mnuih amâo dưi thâo blŭ, ƀiădah jing phung mnuih amâo mâo asăp blŭ ôh hlăm ƀuôn sang, amâodah amâo dưi mgang digơ̆ pô ôh ti anăp anôk phat kđi. Phung mnuih anei năng ai amâo thâo hră mơar, amâo thâo blŭ mgang digơ̆ pô ti anôk phat kđi, amâodah ƀun ƀin đei amâo dưi mâo djăp ôh klei hưn bi sĭt, amâodah mnuih điêt hơăi mang đei arăng amâo mpŭ ôh (Klei Mmuñ Hđăp 72:12-14). “Phung amâo mâo pô đru” năng ai jing mnuih arăng čuăn brei djiê, amâodah năng ai dưi thâo săng jing phung dleh dlan knap mñai.
Phung khua kiă kriê lăn čar jing phung, Aê Diê pô mgơ̆ng čiăng rơ̆ng pioh ngă klei djŏ, wăt hŏng phung arăng yap jing hơăi mang, amâo mâo pô đru, arăng amâo mđing uêñ. Kyuanăn, tơdah sa čô mtao ngă klei djŏ hŏng klei kpă ênô, snăn amâo knŏng răng mgang brei klei tŭ dưn kơ phung amâo dưi mgang digơ̆ pô, ƀiădah wăt răng mgang kơ jhưng mtao ñu pô mơh, kyuadah Aê Diê brei klei mưn kơ hlei pô kgŭ dơ̆ng kyua klei tŭ dưn kơ phung ƀun ƀin (Klei Bi Hriêng 20:28). Klei amâo mpŭ ôh kơ klei bhiăn leh anăn amâo răng mgang brei kơ phung kŏ krei asei hjăn, amâo knŏng jing bruă kđi čar amâodah klei jăk kpă ôh, ƀiădah klei anăn bi êdah knuih mưč kơ Aê Diê jing Pô Hrih Mjing (Klei Bi Hriêng 14:31; 17:5).
Ƀiădah lĕ, brei thâo bi kah hĕ bruă kgŭ dơ̆ng čiăng răng mgang klei djŏ kơ phung mnuih ƀun ƀin dôk tŭ klei hdĭp amâo mtăp mđơr hlăm ƀuôn sang, jing mdê hŏng bruă phat kđi dlăng kơ mnuih mdê mdê. Amĭ mtao Y-Lemuêl amâo mtô ôh mtao phat kđi brei klei tŭ dưn hĭn kơ phung ƀun ƀin, ƀiădah brei “Ha ƀăng êgei ih blŭ kđi hŏng klei kpă” (êlan 9a), mbĭt hŏng klei anăn kăn dưi brei phung djă bruă knŭk kna phat kđi hŏng klei ktư̆ juă rei (êlan 9b). Klei bhiăn amâo dlăng kơ mnuih mdê mdê ôh. Tơdah mnuih ƀun ƀin gao klei bhiăn, ăt srăng tŭ klei phat kđi msĕ. Mta phŭn jing brei phat kđi bi djŏ mnuih, djŏ tui si klei soh leh anăn amâo dlăng kơ mnuih mdê mdê kyua anôk bruă pô anăn hlăm ƀuôn sang.
Khua kiă kriê brei thâo săng nanao snei, mâo klei dưi nao mđrĭng mbĭt hŏng bruă klam. Lu mnuih tluh čiăng kơ klei ngă khua, anôk bruă dlông, mâo lu klei dưi ƀiădah hngah hĕ kơ bruă klam nao mđrĭng mbĭt hŏng klei dưi anăn (Y-Luk 12:48). Amĭ mtao Y-Lemuêl mtă mtăn kơ anak ñu pô brei răng, êjai ngă bruă hŏng klei dưi pô, brei thâo kiă kriê asei mlei pô, amâo mjhua klei dưi pô mâo čiăng bi hrăp klei kđeh tluh ôh (êlan 3-8), ƀiădah brei ngă bruă klam pô hŏng klei djŏ leh anăn kpă ênô.
Si ngă drei dôk mjhua klei dưi pô amâodah ngă klei kpă ênô hlăm anôk Khua Yang dưm?
Wah lač: Ơ Khua Yang, akâo Ih đru kâo hdĭp ngă klei djŏ leh anăn kpă ênô nanao, čiăng kơ kâo ngă bruă klam leh anăn klei dưi Khua Yang jao brei hlăm gŏ sang, hlăm Phung Sang Aê Diê leh anăn hlăm ƀuôn sang, bi djŏ tui si Klei Aê Diê Blŭ. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
