Klei Aê Diê Blŭ: Y-Mathiơ 22:34-40
Êlan kliăng: “Yêsu lač kơ ñu, “Ih srăng khăp kơ Khua Yang Aê Diê ih hŏng jih ai tiê, hŏng jih mngăt, leh anăn hŏng jih klei mĭn ih.” (Y-Mathiơ 22:37)
Klei êmuh ksiêm mĭn: Ya klei khua klei bhiăn êmuh Khua Yang Yêsu? Si mblang klei Khua Yang lŏ wĭt lač kơ klei kpă ênô leh anăn klei khăp Aê Diê? Si drei dôk hdĭp kpă ênô hŏng klei khăp?
Tơdah arăng êmuh Khua Yang Yêsu ya klei mtă jing prŏng hĭn, Ñu amâo răk jih jang klei bhiăn ôh ƀiădah klah čŭn klei Aê Diê čiăng, hlăm dua mta klei mtă prŏng hĭn: “Ih srăng khăp kơ Khua Yang Aê Diê ih hŏng jih ai tiê, hŏng jih mngăt, leh anăn hŏng jih klei mĭn ih” leh anăn “Ih srăng khăp kơ pô riêng gah ih msĕ si kơ ih pô” (êlan 37, 39). Khua Yang bi klă hŏng klei kjăp ktang: “Jih jang klei bhiăn leh anăn klei phung khua pô hưn êlâo čih kbiă mơ̆ng dua mta klei mtă anăn”. Khua Yang Yêsu brei ƀuh klei kpă ênô sĭt amâo bi ktlah ôh hŏng klei khăp, ƀiădah bi êdah hŏng klei khăp pioh kơ Khua Yang leh anăn kơ phung riêng gah.
Hŏng lu mnuih, hdĭp kpă ênô jing gưt hdră bhiăn klei đăo hŏng jih ai tiê, ƀiădah Khua Yang bi mlih mta phŭn hŏng jih jang klei kbiă hriê mơ̆ng hlăm lam. Khăp kơ Aê Diê hŏng jih ai tiê, hŏng jih mngăt leh anăn hŏng jih klei mĭn, mblang jing klei kpă ênô kčưm dơ̆ng hŏng klei myơr asei mlei kluôm ênŭm kơ Aê Diê. Klei anăn amâo djŏ knŏng ngă bruă klei djŏ ƀiădah khăp kơ Khua Yang hŏng klei djŏ. Tơdah klei khăp pioh kơ Aê Diê bi mjing klei hdĭp hlăm lam ai tiê drei, snăn klei gưt asăp srăng wĭt lač hŏng klei hơ̆k mơak, amâo djŏ gưt klei bhiăn hŏng klei ktrŏ suăi ôh.
Lŏ tui čuê, Khua Yang bi mguôp klei khăp pioh kơ Aê Diê hŏng klei khăp pioh kơ mnuih mkăn. Klei mtă tal dua “msĕ snăn mơh” hŏng klei mtă tal êlâo, kyuadah kbiă hriê mơ̆ng klei bhiăn tal êlâo. Drei amâo dưi khăp sĭt ôh kơ Aê Diê ƀiădah wơr bĭt hĕ phung mnuih Aê Diê hrih mjing leh tui si rup Ñu pô. Klei kpă ênô bi mơak kơ Aê Diê bi êdah hŏng klei thâo pap, klei bi pap brei, klei kpă ênuah leh anăn klei luă gŭ. Jih jang klei drei bi mguôp hŏng mnuih mkăn, jing anôk lông dlăng klei đăo drei. Knhuah drei blŭ, klei pap brei, klei mă bruă leh anăn klei bi êdah klei tŭ gĭr, brei ƀuh klei khăp drei pioh kơ Khua Yang jing sĭt êdi amâodah hơăi.
Drei dưi mkă klei kpă ênô hŏng bruă ngă hlăm klei hdĭp myang, msĕ si klei kkuh mpŭ kơ Aê Diê, hriăm Klei Aê Diê Blŭ, wah lač, mă bruă, đa đa mkăn…, ƀiădah Khua Yang iêô mthưr brei drei ksiêm dlăng jih jang bruă ngă anăn kbiă hriê mơ̆ng ai tiê pioh kơ Khua Yang amâodah hơăi. Klei mtrŭt mơ̆ng lam ai tiê jing klei Khua Yang mđing uêñ. Klei khăp amâo phưi lui klei soh amâodah brei klei soh tŭ ư mbĭt hŏng klei kpă ênô ôh; ƀiădah jing, tui duah klei jăk hĭn tui si klei Aê Diê čiăng. Klei hdĭp Khua Yang Yêsu brei leh sa klei bi hmô jăk tloh ênoh kơ klei hdĭp kpă ênô hŏng klei khăp. Khua Yang khăp leh anăn gưt asăp Ama kluôm ênŭm, Ñu khăp wăt kơ anak mnuih hŏng klei khăp prŏng êlam msĕ mơh. Khăp kơ Aê Diê hŏng jih ai tiê leh anăn khăp kơ mnuih mkăn sĭt, jing klei tui tiŏ tơl jih klei hdĭp, bi mlih jih djăp mta klei hlăm klei hdĭp mdê pô grăp čô phung đăo kơ Krist.
Hŏng ya mta klei drei mkă knhuah dôk hdĭp kpă ênô leh anăn klei khăp drei?
Wah lač: Ơ Khua Yang, akâo Ih đru kâo kma hŏng dua mta klei mtă yuôm bhăn Khua Yang mtô, čiăng kơ kâo dôk hdĭp kpă ênô hŏng klei khăp khut khat pioh kơ Khua Yang leh anăn kơ mnuih mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
