Klei Aê Diê Blŭ: Y-Mika 6:1-8
Êlan kliăng: “Hriăm ngă bĕ klei jăk, tui duah klei djŏ,” (Y-Êsai 1:17a)
Klei êmuh ksiêm mĭn: Ya mta klei Aê Diê mñă kơ phung ƀuôn sang Israel leh anăn si diñu lŏ wĭt lač? Ya klei Khua pô hưn êlâo Y-Mika brei thâo klei Khua Yang čiăng diñu ngă? Si brei phung ƀuôn sang Aê Diê tui tiŏ klei kpă ênô?
Aê Diê mñă kơ phung ƀuôn sang Ñu kơ klei sĭt suôr Ñu leh anăn bi êdah kơ diñu ƀuh si bruă ngă klei kpă ênô sĭt jing. Êlâo hĭn, Khua Yang lŏ mñă jih jang bruă Ñu ngă leh kơ phung ƀuôn sang Ñu: Bi mtlaih phung ƀuôn sang Israel kbiă mơ̆ng klei jing hlŭn ti čar Êjip, atăt ba diñu găn gao klei huĭ hyưt leh anăn răng mgang diñu jih ktuê êlan êbat (êlan 3-5). Klei hdĭp kpă ênô kčưm dơ̆ng nanao hŏng klei djă pioh klei pap Khua Yang. Leh hmư̆ klei Khua Yang mñă, phung ƀuôn sang lŏ wĭt lač hŏng klei bi êmuh diñu pô tui si klei diñu mưng ngă: “Hŏng ya mnơ̆ng kâo srăng bi êdah kâo pô ti anăp Yêhôwa …” (êlan 6a). diñu mĭn srăng ba mnơ̆ng ngă yang jăk siam myơr kơ Aê Diê čiăng bi tui klei soh diñu (êlan 6b-7). Ƀiădah Aê Diê amâo tui duah thiăm hdră bhiăn klei đăo ôh. Ñu tui duah ai tiê thâo đup gưt leh anăn klei hdĭp mâo klei bi mlih, hdĭp tui si klei Khua Yang čiăng. Khua pô hưn êlâo Y-Mika hưn mdah klei Aê Diê wĭt lač klă mngač hlăm êlan 8 snei: “leh anăn ya klei Yêhôwa mtă brei ih ngă. Jing klei ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ” . Klei mtă tal êlâo hĭn Khua Yang čoh čuăn kơ phung ƀuôn sang Ñu jing klei ngă klei kpă yơh.
Hdĭp kpă ênô mblang jing čuăn ruah ngă klei djŏ hlăm jih mnĭt mmông yang đar, amâo mâo arăng ƀuh. Anăn yơh jing kpă ênuah hlăm bruă ngă, mtăp mđơr hlăm jih klei čuăn ngă, sĭt suôr hlăm klei blŭ, leh anăn kpă ênuah hlăm jih jang klei bi mguôp hŏng pô mkăn. Klei ngă djŏ amâo knŏng djŏ tuôm hŏng phung sang bruă knŭk kna kiă kriê amâodah sang phat kđi ôh ƀiădah wăt klei bi knăl kơ knuih jing mdê mdê. Anăn jing si klei drei dôk dơ̆ng ƀơ̆ng huă hŏng phung mnuih awăt êdu hĭn kơ drei, si drei yua klei dưi drei mâo, leh anăn si drei wĭt ngă êjai amâo mâo pô ƀuh ôh. Ngă klei kpă ênô ăt mblang jing mkra mjuăt klei hdĭp drei tui si hnơ̆ng čuăn Aê Diê, amâo djŏ tui si drei pô ôh. Klei Aê Diê Blŭ mñă nanao kơ drei snei, Aê Diê ksiêm dlăng kơ ai tiê (I Y-Samuel 16:7). Khua Yang mđing uêñ kơ ya klei mtrŭt hlăm jih jang bruă drei ngă. Hdĭp kpă ênô brei mâo klei luă gŭ, hmiêt mkăp mkra mtam klei soh wê, kmhal kơ klei soh leh anăn bi mlih tơdah Klei Aê Diê Blŭ bi êdah klei soh drei.
Tui tiŏ klei kpă ênô jing mta klei brei grăp čô anak ƀuôn sang Aê Diê ngă, leh anăn wăt jing klei Khua Yang mtă kơ phung ƀuôn sang Ñu. Tơdah hdĭp kpă ênô, drei srăng răng mgang kơ mnuih mkăn tlaih mơ̆ng klei luč liê, mpŭ mni kơ Aê Diê hlăm grăp čô leh anăn bi êdah knuih Ñu, Pô kpă ênô leh anăn jăk klă. Dôk hdĭp ti krah lăn ala amâo mâo klei mtăp mđơr leh anăn amâo uêñ kơ klei sĭt kpă, Khua Yang ăt dôk iêô mthưr phung anak ƀuôn sang Ñu hdĭp kpă ênô. Tơdah drei čuăn ruah klei ngă djŏ hŏng klei kjăp, hgăm leh anăn luă gŭ, jing drei mpŭ mni kơ Aê Diê, Pô bi hriăm drei thâo kral ya klei jing jăk.
Ya mta hlăm knhuah hdĭp grăp hrue brei drei bi mlih tui si klei Khua Yang čiăng?
Wah lač: Ơ Khua Yang, akâo Ih đru kâo tui tiŏ nanao klei kpă ênô hlăm knhuah hdĭp kâo grăp hruê, brei kâo gưt klei Khua Yang čiăng hŏng jih ai tiê, čiăng kơ klei hdĭp kâo mpŭ mni kơ Anăn Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
