1 Kauleethaus 10:14-22
Nqe cim:
“Nej haus tus Tswv lub khob thiab haus dab lub khob yeej tsis tau. Yog nej yuav noj tus Tswv rooj mov thiab noj dab rooj mov yeej tsis tau ib yam nkaus” (1 Kauleethaus 10:21)
Lus nug xav:
– Timthawj Paulus pab kom peb totaub meej txog qhov teebmeem ntawm kev noj tej zaub mov uas fij rau dab lawm li cas?
– Vim li cas “mus koom rooj noj haus” hauv tej kev kevcai fij dab kuj suav hais tias yog “koom nrog” dab?
– Timthawj Paulus tej lus ceebtoom hnub thaud kuj ntuas peb niaj hnub no li cas?
Qhov teebmeem noj tej khoom fij rau tej dab mlom yog qhov teebmeem muaj tseeb thiab tshwjxeeb uas kub heev, yog li ntawd Paulus thiaj rov qab hais txog qhov teebmeem no los ntawm lwm seem txawv. Tej zaum ntu Vajluskub no yuav ua rau peb ntxhov, vim zoo li tawmtsam tej lus uas timthawj Paulus hais hauv tshooj 8, uas hais tias tej mlom yeej tsis muaj qabhau, noj lossis tsis noj kuj tsis cuamtshuam dabtsi.
Timthawj Paulus pab peb totaub meej tseeb dua dhau los ntawm tus duab “rooj mov” (nqe 21). Thiab ntawm lo lus hais mus hais los “koom” txog plaub zaug (nqe 16-20), lo lus no yog lo lus tseeb uas yuav sib tham hauv tshooj no, timthawj Paulus qhia pom hais tias thaum koom tus Tswv rooj mov, yog peb tabtom koom noj haus hauv tus Tswv cov ntshav. Hais mus rau sab ntsujplig, thaum ntawd peb tabtom koom ib lub cev nrog tus Tswv uas sawv hauv qhov tuag los (nqe 16-17). ntawm nqe 18, ib zaug ntxiv Paulus rov siv tus duab ntawm tus neeg noj tej nqaij uas tau muab fij rau saum Vajtswv lub thaj los qhia qhov tseeb no. Noj ncuav, haus cawv txiv hmab, thiab noj tej nqaij uas muab fij rau saum lub thaj, txhua yam no puavleej ua rau lub sijhawm pehawm Vajtswv hauv Tuamtsev. Ib yam li ntawd, tus neeg uas mus koom “rooj mov” hauv kev pehawm tej dab tej mlom kuj yog nws “koom nrog dab” lawm (nqe 20). Lo lus qhia no meej heev: Vajtswv cov menyuam tsuas yog tau xaiv ib hauv ob qhov no xwb. Tsis yog li tshooj 8 uas tham txog kev ywjpheej noj cov zaub mov hauv khw lossis lwm tus caw mus noj; tiamsis ntawm no yog tabtom tham txog khoom “fij rau dab” thiab koom “rooj noj” kiag hauv chaw fij khoom rau dab, kev koom noj li ntawd yog koom tes nrog dab.
Timthawj Paulus tawm lus ceebtoom: “Yog li ntawd cov phoojywg uas kuv hlub, nej tsis txhob mus nrog luag pe dab pe mlom” (nqe 14). Lo lus ceebtoom no tsis yog ceebtoom rau cov ntseeg hauv Kauleethaus uas puv npo lwm haivneeg tej kev coj noj coj ua pe dab pe mlom hnub thaud xwb, tiamsis tseem ceebtoom rau peb niaj hnub nim no kom xeev tsim thiab. Tej zaum peb yeej tsis koom pe dab pe mlom ntawm tej chaw pe dab pe mlom, tiamsis yog tsis ceevfaj, tej sijhawm thiab tej qhov chaw uas peb tabtom koom yuav ua rau peb koom tes nrog dab tiamsis peb tsis paub. Kev mloog thiab nyiam tej zaj hais txog kev saib hmoov, saib dab, duab yees, video hu nkauj, lossis mus koom tej rooj hu nkauj uas txhawb nqa kev ua nkauj nraug, kev ua nruj ua tsiv, pojniam sib deev, txivneej sib deev… ces kuj yog koom nrog dab lawm. Thov Vajtswv pab kom peb yuav tsum ua tib zoo ceevfaj.
Thov Vajtswv,
Tus Tswv, thov koj zam txim rau nyuam yaus, vim ntau zaug nyuam yaus tau koom nrog dab los nyuam yaus tsis paub. Thov koj pab kom nyuam yaus muaj lub siab ceevfaj thiab paub cais tej qhov chaw, tej rooj uas nyuam yaus mus koom, kom nyuam yaus lub neej tsuas teev hawm Vajtswv tib leeg xwb. Nyuam yaus tuav Tswv Yexus Khetos lub npe thov, Amees.
Muaj yam dabtsi peb cheem tsum hloov pauv thaum kawm dhau zaj kawm no?
Nyeem Vajluskub hauv peb lub xyoo: 1 Thexalaunikes 4
Kênh Youtube BHKTHN:

































