Mathiơ 26:47-50
“Na Yêsu khan hloi kơ sư thoi âu: Ơ Juđa, lơliơ mă ih pơm pơrŏ chŭm Inh wă plơ̆ plĕch Inh Kon Bơngai?” (Luka 22:48)
Nơ̆r jet tơchĕng pơwao:
– Ju đa pơm chŭm Kră Yang wă kơnhăm tơdrong kiơ?
– ‘Bok Juđa pơma khan “kơkuh kơ Ih ơ‘Bok Thây!” Kră Yang Yêsu khan “Ơ buăl!” wă khan kiơ?
– Chăl dang ei, lăm Khul Bơngai Lui kơ Kră Yang kư̆m oei đei bơngai kiơ̆ Kră Yang nhen thoi Juđa noh thoi yơ?
Đơ̆ng rŏng kơ pơdrơ̆ng hăm lu ‘bok soi tih wă rôp Kră Yang Yêsu wă kơ gơh iŏk pêng-tĭt hlak jên hu (Mathiơ 26:14-16), ‘bok Juđa lăng lăm măng noh rŏ kơ ‘lơ̆ng hloh, na chông ba lu lĭnh năm rôp Kră Yang, wă huay kơ wơ̆l bơngai lăm măng noh, Juđa tơ ‘bôh kơ lu sư wă kơ kơnăl, noh sư chŭm bơngai ayơ athei rôp hloi bơngai ‘noh. Kiơ̆ kơ tơdrong juăt chŭm noh wă tơ ‘bôh lăm tơdrong ‘mêm , păng kuăr chŭm tơ ‘bŏk wă tơ’bôh jơhngơ̆m mơnat dêh. Mă-lei lăm pơgar Gêtsêmanê , Juđa chŭm Kră Yang Yêsu, mă noh ưh kơ trŏ chŭm hăm jơhngơ̆m ‘mêm păng lăng gĭt mă noh chŭm hăm jơhngơ̆m plơ̆ plĕch, yua kơ đơ̆ng rŏng kơ chŭm noh, lu khul linh truh rôp chô̆ Kră Yang Yêsu.
Kră Yang Yêsu khan kơ Juđa “Ơ Buăl!” wă khan Sư oei ‘mêm mơnat, lăng Juđa buăl tơpă, mă-lei Juđa khan kơ Kră Yang “kơkuh kơ Ih ơ ‘Bok Thây!” wă khan Juđa lăng Kră Yang nhen thoi bơngai bơtho sư lei lăI thoi bơngai nai đĕch ưh kơ trŏ Yang Mêsi, pơm ‘Bok Dŏng Pơklaih sư, mă khan anăn “Juđa” wă khan “Bơnê kơ Kră Yang” (Blŭng A 29: 35) mă-lei lăm kơplah oei kiơ̆ Kră Yang, sư ưh tam mă đei pơma khan Kră Yang Yêsu pơm ‘Bok Dŏng Pơklaih lăm chăl arih, sư kiơ̆ Kră Yang hăm jơhngơ̆m hưch ham păng khan Kră Yang gô blơ̆ lu bơngai Rôm na tŏk pơm pơtao wă kơ sư jing đei ư-ang hloh, gơh pơgơ̆r đei tơdrong jang tih, na tơdrong kơnhăm ưh kơ đei jing păng kư̆m ưh kơ đei yua kiơ thoi sư jing pơkă tĕch Kră Yang.
Chăl dang ei, oei đei bơngai kư̆m năm akŭm kơkuh kơ Kră Yang rim giĕng, kư̆m wang bơjang, phŏ kư̆m đei tơdrong tih lăm hnam akŭm….mă-lei lu sư tam mă jing kon Kră Yang tơpă, wă khan tam mă đei drơ̆ng lui sơng iŏk Kră Yang jing ‘Bok Dŏng Pơklaih lăm chăl arih kơdih, tam mă đei chu pôk atŏk Kră Yang. Thoi noh, lu sư kư̆m đei khan “‘mêm kơ Kră Yang” mă-lei lăm tơdrong tơpă noh hơngah kơ Kră Yang, phŏ kư̆m đei chă wă kơ đei lơi yua kơdih akâu đĕch, phara kiơ tơdrong tĕch Kră Yang. ‘Bok Pôl kư̆m đei pơma tơ’bôh tơdrong pơm gah ‘nguaih đĕch lăm khul bơngai lui tơ dêh Kret: “ Lu bơngai bơtho hơ’mon tơdrong bơngai Juđê ‘noh sư khan sư lui kơ ‘Bok Kei-Dei boih mă-lei sư ưh kơ kiơ̆ tơdrong ‘Bok Kei-Dei wă. Đon lu sư thoi noh, bơ̆n băt lu sư tam mă lui tơpă. ‘Bok Kei-Dei ưh kơ lăp đon kơ tơdrong lu sư pơm ôh. Lu sư bơngai kơnê̆ krưp ưh kơ chu. Lu sư ưh kơ đei pơm minh tơdrong kiơ ‘lơ̆ng thoi yơ.” (Tĭt 1: 16). Kră Yang ling lang tơ’bôh tơdrong ‘mêm mơnat Sư kơ lu bơ̆n, Sư ling lang oei jet lu bơ̆n gah tơdrong kơnhăm kiơ̆ Kră Yang păng bơ̆jang kơ Sư thoi mă Sư jet Juđa sơ̆: “Ơ buăl, pơm bĕ tơdrong ih wă pơm.” (trong 50). Athei ‘blŏk thoi âu Kră Yang băt tôm tơdrong. Sư băt rơđah kơplah lu bơ̆n tơ;bưh hăm Sư thoi yơ, ‘nĕ kơ pơm ăn kơ Kră Yang jet lu bơ̆n, “ih pơm pơrŏ chŭm Inh wă plơ̆ plĕch Inh Kon Bơngai?” (Luka 22: 48).
Ơ Kră Yang Yêsu, apĭnh Ih mơnat kơ inh yua kơ inh kư̆m oei đei nơ̆r pơma, bơ̆jang ưh tam mă trŏ, apĭnh ăn kơ nơ̆r pơma inh huay kơ pơma ‘bơ̆r đĕch ‘mêm, mă-lei tơgŭm inh arih tơ’bôh tơdrong ‘mêm Kră Yan lăm tơdong pơchrang anăn Kră Yang rim năr, krao khan yua anăn Kră Yang Yêsu Krist. Amen.
Tơdrong kiơ tơ’bôh lu bơ̆n kiơ̆ Kră Yang păng kơ Sư tơpă?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Jop 42
Kênh Youtube BHKTHN:
