Pajlug 3:28
Nqe cim:
“Yog kwvtij zej zog cheem tsum ib yam dabtsi uas koj muaj, mas tsis txhob hais tias, “Koj rov qab mus tagkis rov tuaj es kuv li muab” (Pajlug 3:28 HMOWSV)
Lus nug xav:
– Vajntxwv Xalumoos qhia tawm qhov yuam kev twg thaum peb xav pab lwm tus?
– Yog kev pab lwm tus tshaj yus lub peevpwm lawm ces yuav ua cas?
– Yuav ua cas kom peb ua neej yog raws tej lus qhia no?
Thaum ib tug neeg txais tau koob hmoov Tus Tswv pub, tau lub tswv yim saum ntuj los, tau lub tswv yim tsom kwm, lawv yuav xam pom feem xyuam rau cov neeg ib ncig. Tib neeg pub tsis tau yam uas lawv tsis muaj, thiab yam uas lawv tsis muaj ntawd yog kev hlub ntag (I Yauhas 4:7). Tiamsis thaum peb ntseeg tus Tswv, muaj txoj kev txawj ntse, tau Vajtswv pauv hloov ces peb muaj peev xwm ua lub neej muaj kev hlub thiab muab pub.
Nqe pajlug hnub no qhia pom peb ib leeg ua txhaum rau ibleeg tsis tsuas yog tsis kam ua yam zoo sib pab xwb tiamsis tseem yog ncua sijhawm tsis ua yam zoo. Ncua sijhawm yog txoj haukev uas yig tsis xav pab, thiab ncua sijhawm yuav poob lub cib fim ua yam zoo rau kwvtij zej zog. Tej Lus Qhia 3:6 qhia paub: “muaj caij khaws cia thiab muaj caij tso pov tseg” (HMOWSV). Txhua yam puav leej muaj caij. Yog peb ncua sijhawm tsis“tso pov tseg” yog caij, ces tej uas peb “tso pov” tom qab no tej zaum yuav tsis muaj qabhau. Timthawj Paulus qhia hais tias: “Txhua lub sijhawm uas peb pab tau lwm tus, peb yuav tsum pab, tiamsis peb yuav tsum pab cov ntseeg heev dua” (Kalatias 6:10).
Ib sab ntawd, nqe pajlug no tseem qhia hais tias peb tsis tsum pab lwm tus tej yam uas yus tsis muaj. Peb yuav tau npaj txhij pab los ntawm qhov uas tsis ncua sijhawm thaum “kwvtij zej zog cheem tsum ib yam dabtsi uas koj muaj …”. Phau Vajluskub tshiab kuj qhia hais tias: “Rau qhov yog nej zoo siab hlo pab raws li nej muaj, Vajtswv zoo siab yuav npaum li ntawd, yeej tsis muaj leejtwg thov tej uas nej tsis muaj.” (II Kauleethaus 8:12). Ntau zaug peb tsis kam pab tsis yog tsis muaj tej uas “kwvtij zej zog cheem tsum”, tiamsis vim peb xav hais tias yus muaj tiamsis tsis txaus lossis tsis muaj ntau tshaj kom muab tau pub, thiab cim civ xav tias: thaum twg kuv npluanuj, nplua mias, kuv yuav pab lwm tus!
Cov ntseeg Yexus yuav tsum nco tus Tswv cov lus qhia uas hais tias kuv yuav tsum pab cov neeg muaj kev cheem tsum vim lawv muaj cai lossis tsim nyog tau txais kev pab, thiab vim tej uas tus Tswv pub rau kuv yog cia los ua tej haujlwm ntawd ntag. Tej lus qhia no tsis yog tom lis (lý thuyết), npau suav, uas tsis muaj tseeb. Peb yuav tsis muaj hnub ua tau neej li no mus txog thaum uas Vajtswv lub hwjchim hloov peb, thiab mus txog thaum Vajtswv txoj kev txawj ntse kovyeej peb thiab ua rau peb nkag siab qhov tseeb no! Peb tabtom cia lub ntiaj teb uas yuam kev taw qhia rau peb ib txoj kev xav fab uas qia dub, thiab tsuas yog muaj Vajtswv Txojlus xwb thiaj hloov pauv tau peb txoj kev xav, cog rau hauv peb ib lub siab tshiab, ib txoj kev xav fab txog lub neej kom peb muaj peevxwm ua neej raws Vajtswv tej lus qhia.
Thov Vajtswv,
Tus Tswv, thov pab nyuam yaus loj hlob hauv koj zuj zus, thiab thov pab nyuam yaus muaj peev xwm qhia tshwm kev hlub rau cov neeg ib ncig dhau ntawm tes haujlwm uas pab lawv yog caij nyoog thiab yog yam cheem tsum. Tuav Tswv Yexus Khetos lub npe thov, Amees.
Peb tau qhuab ntuas txog leejtwg cheem tsum tau kev pab? Peb muaj kev txiav txim siab li cas?
Nyeem Vajluskub hauv peb xyoo: Yauj 37
Kênh Youtube BHKTHN:
