Klei Aê Diê Blŭ: Klei Bi Hriêng 3:27-28
Êlan kliăng: “Đăm hngah ôh ngă jăk kơ pô yuôm čiăng mâo klei anăn, tơdah ih mâo klei dưi ngă klei anăn kơ ñu.” (Klei Bi Hriêng 3:27)
Klei êmuh ksiêm mĭn: Ya klei ngă mtao Salômôn mtô mtă kơ anak ñu, čiăng wĭt lač kơ pô riêng gah dôk kƀah? Ya ngă? Si klei drei dôk ngă hŏng klei mtô mtă anei?
Klei Bi Hriêng kdrêč 3 jing sa klei mtô lač jăk siam mơ̆ng mtao Salômôn mtô anak ñu pô kơ klei thâo mĭn. Tơdah hlăm 26 êlan êlâo mtô kơ Yêhôwa jing akŏ phŭn klei thâo mĭn, jih jang klei tŭ dưn mơ̆ng klei thâo mĭn leh anăn hdră êlan dưi mă tŭ klei thâo mĭn, snăn bi dŭm êlan adôk, mtao Salômôn mtô kơ klei dôk dơ̆ng ƀơ̆ng huă thâo mĭn hŏng mnuih mkăn.
Mta klei êlâo hĭn mtao Salômôn mtô mtă kơ anak pô anăn jing “Đăm hngah ôh ngă jăk kơ pô yuôm čiăng mâo klei anăn”. Êlan 28 brei thâo “hlei pô” jing “pô riêng gah”. Pô riêng gah “yuôm čiăng mâo klei anăn” mblang jing “năng, djŏ găl”. Snăn, drei thâo kral pô čiăng drei “ngă jăk” amâo knŏng jing phung mnuih dôk hdĭp giăm sang pô ôh, khăng pia jing “pô riêng gah” amâodah sang yŭ ngŏ, ƀiădah jing phung mnuih dôk kƀah drei tuôm thâo. Klei Bi Mguôp Mrâo bi klă leh klei mblang kơ “pô riêng gah” hlăk sa čô khua mtô klei bhiăn nao êmuh Khua Yang Yêsu: “Hlei jing pô riêng gah kâo?” hŏng klei yăl dliê bi hriêng Sa čô Samari Jăk, Khua Yang Yêsu wĭt lač leh: Pô riêng gah năng ai jing sa čô tue ƀiădah yuôm čiăng mâo klei đru (Y-Luk 10:29-37). Snăn, êlan Klei Bi Hriêng anei mtô brei drei ngă jăk leh anăn wĭt lač kơ pô năng đru êjai dôk găn klei truh dleh dlan. Tinei amâo lač kơ mta klei čiăng “amâo mâo klă” ôh, ƀiădah boh blŭ “jăk” čiăng lač kơ klei đru, mnơ̆ng đru klă sĭt êmĭt (I Y-Yôhan 3:17-18).
Kdrêč tal êlâo êlan Klei Bi Hriêng anei hlăm klei blŭ phŭn jing: “Đăm djă krơ̆ng ôh klei jăk mơ̆ng phung dŏ digơ̆ pô”. Hlei dôk mâo jih “klei jăk” anei? Djŏ mơ̆ jing drei? Hơăi, amâo djŏ ôh! Drei amâo mâo jih “klei jăk” anăn ôh, drei knŏng kiă kriê klei anăn đuč! Boh sĭt gơ̆, “klei jăk” jing dŏ phung mnuih yuôm čiăng mâo klei đru. Drei čuôt klih, amâo bi mbha, kyua mĭn ngăn drăp jing dŏ drei pô, kơ hlei pô drei čiăng brei, amâodah amâo brei tui si drei pô, amâo mâo soh ôh! Ƀiădah Klei Aê Diê Blŭ mtô, ngăn drăp Aê Diê jao kơ drei amâo jing dŏ drei pô ôh, ƀiădah jing dŏ phung mnuih yuôm čiăng mâo klei đru. Kyuadah jih jang jing dŏ Aê Diê sơăi, leh anăn drei knŏng jing phung mnuih kiă kriê mnơ̆ng đuč! Jih jang “klei jăk” Khua Yang jao kơ drei amâo djŏ brei drei yua hŏng klei čuôt klih kơ hjăn pô ôh, ƀiădah Khua Yang brei kơ drei “klei jăk” anăn čiăng kơ drei kiă kriê leh anăn ba brei kơ phung mnuih yuôm čiăng mâo klei đru.
Drei ngă soh hdơ̆ng drei amâo knŏng kyua ngă klei jhat ƀai hdơ̆ng drei ôh, ƀiădah wăt hngah ngă klei jăk kơ hdơ̆ng drei mơh. Lu mnuih khăng mĭndah srăng jing jăk tơdah drei amâo ngă klei jhat ƀai kơ hlei pô ôh, ƀiădah boh sĭt lĕ, srăng jing soh tơdah drei knŏng amâo ngă klei jhat ƀai kơ hlei pô ôh! Mta phŭn brei drei ksiêm êmuh drei pô snei: mâo mơ̆ ya mta klei jăk kâo djă pioh kơ kâo pô, leh anăn hngah amâo “ngă jăk kơ pô yuôm čiăng mâo klei anăn”?
Ya klei jing dleh dlan hĭn kơ drei tơdah ngă tui si klei mtă anei?
Wah lač: Ơ Khua Yang, brei kâo thâo kral kâo knŏng jing mnuih kiă kriê, leh anăn đru kâo thâo yua jih klei Khua Yang brei pioh bi êdah klei khăp Khua Yang kơ mnuih mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 36
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
