Klei Aê Diê Blŭ: Philip 2:14-18
Êlan kliăng: “Ti krah diñu diih mtrang msĕ si pui mngač hlăm lăn ala” (Philip 2:15b)
Klei êmuh ksiêm mĭn: Si mblang blŭ duñ duñ leh anăn kĭ kơ̆? Si khua ƀĭng kna Y-Pôl bi msĕ kơ lăn ala leh anăn si ñu mtă mtăn kơ phung anak Aê Diê brei dôk hdĭp? Si drei hdĭp čiăng mtrang msĕ si pui mngač hlăm lăn ala?
Khua ƀĭng kna Y-Pôl iêô mthưr: “Ngă bĕ jih jang bruă amâo blŭ dŭñ dŭñ amâodah kĭ kơ̆ ôh” (êlan 14). Klei anei amâo knŏng mtă mtăn kơ knuih hdĭp ôh, ƀiădah jing atur kơ sa klei hdĭp kpă ênô leh anăn doh jăk. “Blŭ dŭñ dŭñ” lač kơ klei blŭ čôñ ƀuah, amâo ư ai; bi “kĭ kơ̆” mblang mâo wăt klei čiăng tăng mgăl, bi mneh msao. Jih jang klei anei khăng mâo hlăm Phung Sang Aê Diê hlăk êlâo dih leh anăn wăt hruê anei mơh. Klei anăn amâo djŏ knŏng hjăn hlăm klei blŭ hrăm nao hriê ôh, ƀiădah bi êdah ai tiê kƀah klei đăo knang leh anăn ênưih hmăi kyua klei uêñ mĭn kơ pô. Tơdah čôñ ƀuah, drei khăng bi luč hĕ klei mơak leh anăn klei jăk mơak hlăm klei mă bruă. Ƀiădah tơdah ruah knuih thâo hdơr knga leh anăn đup gưt, drei bi êdah sa klei hdĭp dưm Khua Yang jing phŭn.
Khua ƀĭng kna Y-Pôl bi msĕ lăn ala hŏng “ênuk phung soh leh anăn jhat”, anôk klei soh jhat jing klei bhiăn yang đar. Tinăn, klei kñăm kơ klei krơ̆ng pioh drei pô tlaih mơ̆ng klei blŭ čôñ ƀuah jing čiăng kơ drei “jing êngeh amâo mâo klei dưi ƀuah ôh, jing phung anak Aê Diê amâo mâo klei čhŏ ôh” (êlan 15). Mta klei anei kñăm kơ klei doh jăk amâo djŏ klah đuĕ mơ̆ng lăn ala ôh, ƀiădah dôk hdĭp mdê hĭn ti krah lăn ala. Drei ăt dôk hdĭp hlăm kdrŭn anôk bŏ hŏng klei soh jhat, ƀiădah hdĭp klei hdĭp mtrang mngač klei kpă ênô Aê Diê. Knhuah hdĭp kpă ênô mâo ênoh yuôm sĭt tơdah drei dôk kjăp ti anăp klei mplư leh anăn klei măk ƀai hlăm ala ƀuôn. Wăt tơdah dôk hdĭp ti krah “ênuk phung soh leh anăn jhat” anăn, phung anak Aê Diê brei “djă pioh klei blŭ klei hdĭp” leh anăn “mtrang msĕ si pui mngač hlăm lăn ala” (êlan 15b). Tơdah klei hdĭp drei mâo klei bi mlih kyua Yang Krist, klei mngač srăng mtrang hlăm knhuah hdĭp, klei blŭ leh anăn klei dôk dơ̆ng ƀơ̆ng huă hŏng mnuih mkăn. Leh anăn kliăng čiăng krơ̆ng pioh nanao klei hdĭp doh jăk jing “djă pioh klei blŭ klei hdĭp”. Tơdah amâo djă păn kjăp Klei Aê Diê Blŭ, drei ênưih hlue klei lăn ala yap yuôm. Ƀiădah tơdah mâo Klei Aê Diê Blŭ hlăm ai tiê, Klei Aê Diê Blŭ yơh srăng atăt gai klei mĭn, klei blŭ leh anăn klei ngă drei. Klei năng mđing mĭn snei, khua ƀĭng kna Y-Pôl amâo dlăng kơ klei hdĭp anei jing knông ktrŏ ôh ƀiădah jing klei mơak. Ñu yap kơ ñu pô jing mnơ̆ng myơr ngă yang, leh anăn ñu hơ̆k mơak kyua klei anăn (êlan 17-18).
Sa klei hdĭp doh jăk amâo djŏ ôh dôk hdĭp knap mñai ƀiădah dôk hdĭp mâo klei tŭ dưn, sa klei hdĭp myơr kơ Khua Yang leh anăn ba klei tŭ dưn kơ mnuih mkăn. Hlăm boh klei jing sĭt, dôk hdĭp doh jăk ti krah lăn ala amâo ênưih ôh. Drei tlă anăp hŏng lu mta klei kpĭ ktư̆, klei mplư leh anăn hnơ̆ng čuăn hdĭp bi mklăk. Ƀiădah hlăm kdrŭn anôk anăn yơh, klei mngač drei jing klă mngač hĭn. Tơdah drei čuăn ruah klei kpă ti krah klei luar, ruah klei khăp ti krah klei čuôt klih, ruah klei luă gŭ ti krah klei mgao, snăn sĭt nik drei dôk mtrang mngač yơh.
Si klei hdĭp drei dôk mtrang klei mngač Yang Krist ti krah lăn ala?
Wah lač: Ơ Khua Yang, akâo Khua Yang đru kâo lui hĕ klei čôñ ƀuah leh anăn klei bi tăng mgăl, djă pioh Klei Aê Diê Blŭ leh anăn hdĭp kpă ênô grăp hruê. Brei klei hdĭp kâo jing klei mngač hlăm lăn ala, čiăng kơ Anăn Khua Yang mâo klei guh kơang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
